හිටපු නාවික හමුදා බුද්ධි අංශ ප්‍රධානියා අතුරුදහන් කිරීම් ගැන ‘සැකකරුවකු වීමේ ඉඩක් (VIDEO)

0

සිසුන් පිරිසක් අතුරුදහන් කිරීම සම්බන්ධ සැකකරුවකු බවට පත්වීමට ඉඩකඩ ඇති හෙයින් යුද සමයේ ශ්‍රී ලංකා නාවික හමුදා බුද්ධි අංශ ප්‍රධානියාට රටින් බැහැර වීමේ අවසරය ලබා නොදීමට අධිකරණය තීන්දු කොට තිබේ.

කොළඹින් සහ ත්‍රිකුණාමලයෙන් සිසුන් එකොළොස් දෙනකු පැහැරගෙන ගොස් අතුරුදහන් කිරීම සම්බන්ධයෙන් විමර්ශනයට භාජන වී සිටින කොමදෝරු  ඩීකේපී දසනායක විසින් පුහුණුවක් සඳහා විදේශගත වීමට යැයි කරන ලද ඉල්ලීම ලංකා ඩී ජයරත්න කොළඹ කොටුව මහේස්ත්‍රාත්වරිය විසින් 6 අඟහරුවාදා ප්‍රතික්ෂේප කරන ලදී.

එම විමර්ශනයේ ලිපිගොනු නීතිපති වෙත යොමු කර තිබෙන බවත්, අතුරුදහන් වීම් සිදුවන අවස්ථාවේ නාවික හමුදා බුද්ධි අංශ ප්‍රධානියා ලෙස කටයුතු කිරීම නිසා කොමදෝරු වරයාට පැවරෙන වගකීම පිළිබඳවත් අධිකරණයේ අවධානය යොමු වූ බව අතුරුදහන් කර ඇති සිසු දරුවන් ගේ ඥාතීන් වෙනුවෙන් පෙනී සිටි නීතිඥ අචලා සෙනෙවිරත්න මාධ්‍යවේදීන්ට කියා සිටියාය.

විශේෂ මෙහෙයුම් ඒකකය

2008-2009 කාල වකවානුව තුල සිසුන් අතුරුදහන් වීම සම්බන්ධයෙන් කොමදෝරු දසනායක 2015 මාර්තුවේ අත් අඩංගුවට ගෙන ප්‍රශ්න කිරීමෙන් අනතුරුව පොලිසිය ප්‍රකාශ කොට තිබුනේ කොළඹ කොටුව සහ ත්‍රිකුණාමලය පදනම් කොටගෙන ක්‍රියාත්මක වූ නාවික භට පිරිසක් විසින් ඒ පැහැරගැනීම් කළ බවයි.

විශේෂ මෙහෙයුම් ඒකකය නමින් හැඳින්වුනු ඒ කණ්ඩායම කොමදෝරු දසනායක විසින් මෙහෙයවන ලද බවයි ඔහු අත් අඩංගුවට ගත් සමයේ පොලිස් ප්‍රකාශක අජිත් රෝහණ කියා සිටියේ.

පරීක්ෂණ දිගටම පවත්වාගෙන යන ලෙස පොලිසියට නිර්දේශ කළ මහේස්ත්‍රාත්වරිය ඊළඟ නඩු විභාගය සැප්තැම්බර් 27 දාට නියම කළාය.

විසි අටදෙනකුගේ අතුරුදහන් කිරීම් පිළිබඳව සැකපිට හිටපු නාවික හමුදා ප්‍රකාශක කොමදෝරු ඩී කේ පී දසනායක, ලුතිනන් කොමදෝරු සම්පත් මුණසිංහ, රණසිංහ ආරච්චිගේ හෙට්ටිආරච්චි සහ රණසිංහ පේඩිගේ සුමිත් රණසිංහ යන සිව්දෙනාට කොළඹ මහේස්ත්‍රාත් අධිකරණය විසින් විදේශ ගමන් තහනමක් ද පනවන ලද්දේ පසුගිය අප්‍රේල් මාසයේදීයි.

(Radiogagana)

Facebook Comments

wedding people