“බියෙන් සහ පක්ෂග්‍රාහිත්වයෙන් තොර මාධ්‍යකරණයක්” තේමා කොටගෙන අදට යෙදී ඇති ලෝක ජනමාධ්‍ය නිදහස පිළිබඳ දිනය ශ්‍රී ලංකාවේ සමරන්නට සිදුවී ඇත්තේ බලධාරීන් විසින් වසංගතයට මුවාවී ලේඛක ලේඛිකාවන් පිරිසක් දඟගෙයි ලා තිබියදීය.
අන්තර්ජාලයේ පලකළ ලියවිලි වලට උරණවූ පොලීසිය විසින් ඒවා “සාවද්‍ය පුවත්” ලෙස චෝදනා කරමින් මේ වනවිට අත් අඩංගුවට ගෙන ඇති පිරිස 17 කි.
සාවද්‍ය පුවත්, ජාතීන් අතර වෛරය ඇති කිරීමේ ප්‍රකාශ, සමාජ ජාල තුළට අන්තර්ගතයන් ලෙස එකතු කිරීම වැනි චෝදනා යටතේ කොරෝනා වසංගත සමය තුළ අපරාධ පරීක්ෂණ දෙපාර්තමේන්තුව විසින් ඔවුන් අත්අඩංගුවට ගත් බවයි පොලිස් මාධ්‍ය ප්‍රකාශක පොලිස් අධිකාරී ජාලිය සේනාරත්න පවසන්නේ.
අත් අඩංගුවට ගත් පිරිස අතර කාන්තාවන් දෙදෙනකුද වේ.
ඔවුන්ගේ නම් සහිතව අනන්‍යතාවය හෙළි කර නැති පොලීසිය පවසන පරිදි මෙසේ අත්අඩංගුවට ගෙන ඇත්තේ බණ්ඩාරගම, මහනුවර, මහරගම, දෙහිවල, නුගේගොඩ, ගාල්ල, වාද්දුව, අංගොඩ, පොල්ගහවෙල, බෙලිගල, කටුගස්තොට, දිවුල්දෙනිය, වැලිමඩ, රාගම සහ කඩවත යන ප්‍රදේශවලට අයත් පුද්ගලයන්ය.
සැකකරුවන් අත් අඩංගුවට ගනු ලබන්නේ හිරගත කිරීමේ ‘පරම චේතනාවෙන්ම’ බවට අන්තර්ජාල මාධ්‍ය ක්‍රියාකාරිකයන් පොලිසියට දැඩි ලෙස චෝදනා කර තිබේ.
අධිකරණය විසින් අපරාධ පරීක්ෂණ දෙපාර්තමේන්තුවට අවවාද කර ඇත්තේ අන්තර්ජාලයේ සාවද්‍ය පුවත් පළ කළ බවට චෝදනා නගමින් පුද්ගලයන් අත්අඩංගුවට ගෙන උසාවියට ගෙන ඒමට පෙර ඔවුන් සිතා මතාම යම් වරදක් සිදු කර තිබේ දැයි පළමු කොට තහවුරු කරගත යුතු බවයි.
කොළඹ කොටුව මහේස්ත්‍රාත් විසින් එම අවවාදය දෙන ලද්දේ සමාජ මාධ්‍ය තුළ මෙන්ම පුවත්පත් හා ජනමාධ්‍ය තුළත් සිංහල, දමිළ හා ඉංග්‍රීසි තෙබසින්ම සිය අදහස් දක්වමින් සමාජ ක්‍රියාකාරිකයකු ලෙස කටයුතු කරන රම්සි රසික් අප්‍රේල් 9 දා, රහස් පොලීසිය විසින් අත්අඩංගුවට ගෙන රිමාන්ඩ් ගත කිරීම සඳහා ඉදිරිපත් කළ අවස්ථාවේය.
කෝවිඩ්19 වසංගතය තුළ පැතිර යන අන්තවාදය පරාජය කිරීමට ‘චින්තන ජිහාදයකට’ සුදානම් විය යුතු බවට ඔහු විසින් යොදා තිබු සටහනක් පාදක කොටගෙන සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත (ICCPR) යටතේ චෝදනා ගොනු කර තිබේ.
කෙසේ නමුත් අත්අඩංගුවට ගත් සැකකරුවන් සියලු දෙනා සම්බන්ධයෙන් ගෙන ඇති නීතිමය පියවර ගැන පොලීසිය මේතාක් නිසි පැහැදිලි කිරීමක් කර නැත.
ඔවුන් නිදහස් කරන ලෙස ඉල්ලා මාධ්‍ය සංවිධාන හඬ නගමින් සිටී.
නීතිය අනීතිය කිරීම
ICCPR යටතේ පොලිසිය විසින් පුද්ගලයන් අධිකරණයට ඉදිරිපත් කරනු ලබන්නේ නීතිය අයුතු ලෙස පාවිච්චි කරමින් බව ශ්‍රී ලංකා මානව හිමිකම් කොමිෂන් සභාව මෙන්ම අන්තර්ජාල මාධ්‍ය ක්‍රියාකාරීන් ද ලිඛිතවම චෝදනා කර තිබේ.
කොරෝනා ව්‍යසනය හමුවේ බලතල වැඩි කොට තිබෙන පොලිස් හා ආරක්ෂක අංශ විසින් ප්‍රකාශනයේ නිදහසට මෙන්ම සුළු ජාතික හා ආගමික අයිතීන්ට අවහිර වන ආකාරයෙන් කටයුතු කිරීම එක්සත් ජාතීන් ඇතුළු ජාත්‍යන්තර සංවිධාන වල මෙන්ම ශ්‍රී ලංකාවේ ජනමාධ්‍ය සංවිධාන හා වෘත්තීය සමිති ප්‍රමුඛ සිවිල් ප්‍රජාවගේ විවේචනයට ලක්වී තිබේ.
ලෝක ජනමාධ්‍ය නිදහස පිළිබඳ දිනය නිමිත්තෙන් පනිවිඩයක් නිකුත් කරන නිදහස් මාධ්‍ය ව්‍යාපාරය අවධාරණය කරන්නේ පවතින වසංගත තත්ත්වය තුළ ජනමාධ්‍ය සතු සමාජ වගකීම සියලු බලධාරීන් වටහා ගත යුතු බවයි.
ලෝක ජනමාධ්‍ය නිදහස් දිනයේදි, මාධ්‍යවේදීන්ට හා සමාජ මාධ්‍ය පරිශීලකයන්ට බියෙන් හා පක්ෂ පාතිත්වයෙන් තොරව ක්‍රියා කර පවතින දැඩි වසංගත තත්ත්වයෙන් සමාජය මුදවා ගැනීම සඳහා දායක වීමට අවස්ථාව සලසා දෙන ලෙසත්, විවේචනාත්මක වාර්තාකරණයන් නිසා මේ වන විට අත්අඩංගුවට ගෙන සිටින සමාජ මාධ්‍ය ක්‍රියාකාරීන් නිදහස් කරන ලෙසත් නිදහස් මාධ්‍ය ව්‍යාපාරය රජයේ සියලු වගකිවයුතු පාර්ශ්වවලින් ඉල්ලා තිබේ.
කොවිඩ්–19 වසංගත තත්ත්වය උග්‍ර වීමත් බියෙන් හා පක්ෂ පාතිත්වයෙන් තොර සමාජ වගකීමක් සහිත මාධ්‍ය භාවිතයක අවශ්‍යතාවය කැපී පෙනෙන තත්ත්වයකට පත්ව ඇති බව නිදහස් මාධ්‍ය ව්‍යාපාරය නිවේදනයක් මගින් අවධාරණය කර සිටී.
කොවිඩ්–19 ලොව පුරා ව්‍යාප්ත වන්නේ ප්‍රජාතන්ත්‍රවාදය වෙනුවට අධිකාරිවාදය විසින් ලෝක ප්‍රජාව ගෙන් බහුතරයක් යට කරගෙන ඇති දේශපාලන සන්දර්භයක් තුළ බව පවසන එම ව්‍යාපාරය තව දුරටත් අවධාරණය කරන්නේ මෙම හදිසි තත්ත්වයට ප්‍රතිචාර දැක්වීම පිණිස බොහෝ ආණ්ඩු ක්‍රියා කරන්නේ ආණ්ඩුවල ප්‍රජාතන්ත්‍රික ව්‍යුහයන් සහ ජනතාවගේ ප්‍රජාතාන්ත්‍රික අයිතිවාසිකම් වලට ගරු කරන ක්‍රියා වෙනුවට අධිකාරිවාදී ක්‍රියාමාර්ග ඔස්සේ බවයි.
“මෙම ප්‍රවණතාවය විසින් අභියෝගයට ලක් කර ඇති ක්ෂේත්‍ර අතර මාධ්‍ය ක්ෂේත්‍රය ප්‍රමුඛ ස්ථානයක් ගනී. ශ්‍රී ලංකාව සම්බන්ධයෙන්ද එය එසේම අදාළ වන බව නිදහස් මාධ්‍ය ව්‍යාපාරය නිරීක්ෂණය කරයි,” යනුවෙන් එහි වැඩි දුරටත් සඳහන්ය.
Facebook Comments
