සේවක විරෝධය මැද්දේ කොරෝනා පඩි කැපිල්ල පටන් ගනී

කොවිඩ් 19 සහන සැලසීමේ අරමුදලට රාජ්‍ය හා අර්ධ රාජ්‍ය සේවකයන්ගේ දිනක වැටුප බලහත්කාරයෙන් කපාගැනීමක් සිදු වන බවට චෝදනා කරන වෘත්තිය සමිති නායකයෝ එය අනීතික, බලහත්කාරී හා කාලෝචිත නොවන ක්‍රියාවක් ලෙස හෙළා දැක තිබේ.

නැගෙනහිර පළාත් රාජ්‍ය සේවකයන්ගේ දිනක වැටුප බලහත්කාරයෙන් කැපීමට ඇති සුදානම් පිළිබදව ලංකා ගුරු සංගමය අනාවරණය කරද්දී, සමස්ත ලංකා වරාය පොදු සේවක සමිතිය පෙන්වා දී ඇත්තේ වරාය සේවකයන්ගේ එක් දිනක වැටුප කපා හැරීම සදහා යෝජනා ඉදිරිපත් වී ඇති බවයි.

කොවිඩ් 19 තත්ත්වය හමුවේ සහන සැලසීමේ අරමුදලට දිනක වැටුප ලබාගන්නේ සේවකයන්ගේ කැමැත්තෙන් පමණක් බවට රජය ප්‍රකාශ කර තිබියදී නැගෙනහිර පළාත් රාජ්‍ය සේවකයන්ගේ කැමැත්ත විමසීමකින් තොරව ඔවුන්ගේ දිනක වැටුප අයකිරිම අනීතික මෙන්ම බලහත්කාරී ක්‍රියාවක් බව ලංකා ගුරු සංගමය පවසයි.

එම සංගමයේ ප්‍රධාන ලේකම් ජෝසප් ස්ටාලින්ගේ අත්සනින් යුතුව මැයි 12 අගහරුවාදා නිකුත් කර තිබේන නිවේදනක ඒ බව දැක්වේ.

“නැගෙනහිර පළාත් ප්‍රධාන ලේකම්ගේ අත්සනින් යුතුව EP/01/1/Gen අංකයෙන් 2020.03.31 දිනැතිව නිකුත් කර ඇති ලිපියෙන් දන්වා ඇත්තේ නැගෙනහිර පළාත් ආණ්ඩුකාරවරිය සහ නැගෙනහිර පළාත් ලේකම්රු අතර පැවති සාකච්ඡාවකදී නැගෙනහිර පළාත් සියලුම රාජ්‍ය සේවකයන්ගේ දිනක වැටුප පරිත්‍යාග කිරීමට එකග වූ බවත්, ඒ අනුව සියලුම සේවකයන්ගේ දිනක වැටුප අය කරන ලෙසත්ය.”

සියලුම ගුරුවරුන්ගේ සහ විදුහල්පතිවරුන්ගේ වැටුප් කපා ගන්නා ලෙස මේ වනවිට පළාත් අධ්‍යාපන අධ්‍යක්ෂවරයා සියලුම කලාප කාර්යාලය වලට දන්වා ඇති බව පවසන ගුරු නායක ජෝසප් ස්ටාලින් පෙන්වා දෙන්නේ වැටුප් කැපීමට අකමැත්ත ප්‍රකාශ කළ අයගේ ද මේ අනුව වැටුප් කැපීම සිදු වන බවයි.

මේ ආකාරයට රාජ්‍ය සේවකයන්ගේ කැමැත්තෙන් තොරව බලහත්කාරයෙන් වැටුප් කැපීම නතර කරන ලෙස නැගෙනහිර පළාත් ආණ්ඩුකාර අනුරාධා යහම්පත්ගෙන් ලිඛිතව ඉල්ලා තිබේ.

ජනාධිපති ලේකම්වරයා මැයි මස වැටුප පරිත්‍යාග කරන ලෙස ලිඛිතව ඉල්ලා තිබීයදී ඇමතිවරු මෙන්ම ආණ්ඩු පක්ෂයේ හිටපු මන්ත්‍රීවරු එම ඉල්ලීම වෙනුවෙන් පෙනී සිටීමෙන් රාජ්‍ය සේවක වැටුප කපා ගැනීමේ බලහත්කාරී වුවමනාව මනාව පෙනී යන බව ලංකා ගුරු සංගමය වැඩි දුරටත් පවසයි.

“දිනක වැටුප කපා ගැනීමේ දී නැගෙනහිර පළාතේ මෙන්ම සබරගමුව පළාතේ ආණ්ඩුකාරවරු සහ නිලධාරීන් කටයුතු කරන බලහත්කාරී ස්වභාවය අනුව මසක වැටුප කපා ගැනීමේ බලහත්කාරීත්වයක් ඇතිවන බවද මනාව පැහැදිලි වේ,” යි ලංකා ගුරු සංගමය නිකුත් කළ නිවේදනයේ වැඩි දුරටත් සදහන්ය.

වරාය සේවක විරෝධය

කොරෝනා වසංගතය හේතුවෙන් මසකට අධික කාලයක් රට තුල පවතින හදිසි තත්වය යටතේ කොළඹ වරායේ සියලූ මෙහෙයුම් කටයුතු අඩපනවීමට ඉඩ නොදී වරායේ සේවකයන් මැදිහත්ව කටයුතු කර ඇති පසුබිමක එක් දිනක වැටුපක් වරාය සේවකයින්ගෙන් ලබාගැනීම කාලෝචිත ක්‍රියාවක් නොවන බව වරාය වෘත්තීය සමිතියක් විසින් පෙන්වා දී තිබේ.

ශ‍්‍රී ලංකා වරාය අධිකාරියේ සභාපතිවරයාට ලිපියක් යොමු කරමින් සමස්ත ලංකා වරාය පොදුසේවක සමිතිය පෙන්වා දී ඇත්තේ වරායේ කටයුතු නිසි පරිදි පවත්වාගෙන යාම සඳහා වරාය සේවකයා සූදානම්ව කටයුතු කරන මොහොතක ඒ සඳහා දිරි දීමනාවක් දීම වෙනුවට දිනක වැටුප් අයකර ගැනීමක් සිදුකිරීම කාලෝචිත ක‍්‍රියාවක් නොවන බවයි.

එය සේවකයන්ගේ රැකියා තෘප්තිමත් භාවයට බාධාවක් බව සමස්ත ලංකා වරාය පොදුසේවක සමිතියේ විධායක සභාව වෙනුවෙන් එහි ප‍්‍රධාන ලේකම් චන්ද්‍රසිරි මහගමගේ වරාය අධිකාරියේ සභාපතිවරයාට යොමු කළ ලිපියේ දැක්වේ.

රටේ ජනතාවට සහන සැලසීම වෙනුවෙන් මේ වන විට විදෙස් රටවල්වලින් විශාල ආ ධාර ප‍්‍රමාණයක් ලැබී ඇති අතර තවත් ආධාර ගලා එමින් පවතින බව පෙන්වා දෙන වෘත්තිය සමිති නායකයා ලැබී ඇති මුදල් මගින් එම කටයුතු සම්පූර්ණ කරගැනීමට හැකියාව පවතින බව පෙන්වා දෙයි.

“වරාය සේවකයන්ගෙන් දිනක වැටුපක් ඒ සඳහා ලබාගැනීමට ඉදිරිපත් කර ඇති ක‍්‍රියාවලියට අප එකග නොවන බවත්, කාර්යක්‍ෂමව මේ අවස්ථාවේ කටයුතු කරන වරාය සේවකයා ගැන සිතා මැයි මස එක්දින වැටුප් අය කිරීමට ගෙන ඇති තීරණය අත්හිටුවීමට කටයුතු කරන ලෙස කාරුණිකව ඉල්ලමි.” සමස්ත ලංකා වරාය පොදුසේවක සමිතිය යොමු කළ ලිපියේ වැඩි දුරටත් දැක්වේ.

ජනාධිපති මාධ්‍ය ඒකකයට අනුව COVID – 19 සෞඛ්‍ය හා සමාජ ආරක්ෂණ අරමුදලේ ශේෂය මැයි 8 වන විට රුපියල් මිලියන 900 ඉක්මවා තිබේ.

අවශ්‍ය තරම් ලෝකාධාර ශ්‍රී ලංකාවට ලැබී ඇති බැවින් කෝවිඩ් 19 වසංගතය පිටු දැකීමට අවශ්‍ය පියවර ගැනීමට මුල්‍ය අර්බුදයක් මෙරට තුළ නොමැති බව පවසන හිටපු අගමැතිවරයා ජනාධිපති ලේකම් රාජ්‍ය සේවක වැටුප ආපසු ඉල්ලීම ප්‍රශ්න කර ඇත.

COVID-19 වසංගතයට ශ්‍රී ලංකාවේ හදිසි ප්‍රතිචාර දැක්වීම සහ සෞඛ්‍ය අංශ සූදානම් කිරීම සඳහා ඩොලර් මිලියන 128.6 ක මුදලක් ලබාදීමට මේ වන විටත් අනුමැතිය ලබා දී තිබෙන ලෝක බැංකුව දිවයිනේ රෝහල් හා සෞඛ්‍ය ආයතන රැසක භෞතික හා මානව සම්පත් සංවර්ධනයට දෙවැනි වරටත් මුල්‍ය ආධාර ලැබීමට නියමිත බව සෞඛ්‍ය අමාත්‍යාංශය නිවේදනය කර තිබේ.