තම සමීපතමයන්ට යුක්තිය ඉල්ලා දෙදහසකට ආසන්න දින ගණනක් පුරා අඛණ්ඩ උද්ඝෝෂණයේ යෙදන අතුරුදහන්කළවුන්ගේ ඥාතීන්ගේ සටනට සහයෝගය ලබා දිය යුතු බවට දෙමළ ජාතික සන්ධානය දකුණේ සටන්කාමීන්ගෙන් ඉල්ලා තිබේ.
“ආණ්ඩුවේ හමුදා බලහත්කාරයෙන් පැහැරගෙන ගිහින් හරි හමුදාවට බාර වීමෙන් පස්සේ හරි අතුරුදහන් කරපු අයගේ නෑදෑයෝ දැන් අවුරුදු ගානක ඉඳන් සාධාරණයක් වෙනුවෙන් සටන් කරනවා. තරුණයෝ ඒ ගැනත් කල්පනා කරන්න ඕනෑ. මේ අම්මලාගේ සටනට සහයෝගය දෙන එක්වෙන තරුණයන්ව මල්මාලා දාලා පිළිගන්න අපි සුදානම්,“යැයි දෙමළ ජාතික සන්ධානයේ පාර්ලිමේන්තු මන්ත්‍රී සිවඥානම් ශ්‍රීධරන් පවසයි.
කිලිනොච්චියේ ධර්මපුරම්හි බහුජන සංවිධාන නියෝජිතයන් සමග පැවති හමුවකදී පාර්ලිමේන්තු මන්ත්‍රී ශ්‍රීධරන් කියා සිටියේ හමුදාවට බාර දුන් ස්වාමි පුරුෂයන්, කුඩා දරුවන් මෙන්ම එවකට ජනාධිපති ආර්යාව ශිරන්ති රාජපක්‍ෂට බාර දුන් දරුවන් කිසිවෙක් අද දක්නට නොමැති බවයි.
“දකුණේ සිංහල තරුණයන්ගේ සටනට සහාය දෙන්න ඕනෑ වගේම උතුරු නැගෙනහිර අම්මලා තමන්ගේ දරුවෝ කොහෙද කියලා හොයමින් කරන අරගලයට ශක්තියක් දෙන්න ඕනෑ.“
“ලක්ෂ හතරක් ජනතාව මුල්ලිවයිකාල් වලට කොටු කරලා හැත්තෑ දාහක් විතරයි ඉන්නේ කියලා රාජපක්ෂ ආණ්ඩුව කෑම කන්න නොදී මිනිස්සු මැරුවා. තුවාල වුනු අයට බෙහෙත් නොදී මැරුවා. ආරක්ෂාව දෙනවා කියලා ප්‍රදේශ වෙන් කරලා එහි එනකොට මිනිස්සුන්ට බෝම්බ ගහලා මැරුවා.“
දෙමළ ජාතික සන්ධාන මන්ත්‍රීවරයා චෝදනා කරනුයේ දෙමළ ජනතාව මෙසේ බෝම්බ හෙළා මරා දමද්දී සිංහල සහෝදරයන් නිහඬව බලා සිටි බවයි.
“ත්‍රස්තවාදීන් කියා දෙමළ ජනතාව මරා දමද්දී කිසිදු දෙයක් කතා නොකරපු සිංහල සහෝදරයෝ කිරිබත් කාලා ඒක සැමරුවා.“
“ගෝඨාභය රාජපක්ෂ ජනාධිපති හැටියට පත් කරගත්තෙත් 69 ලක්ෂයක් සිංහල ජනතාවයි.“
මහින්ද රාජපක්ෂ හා ගෝඨාභය රාජපක්ෂ එක්ව දෙමළ ජනයා සංහාරය කළ බවත්, ඊට එරෙහිව සටන් කළ උතුරු නැගෙනහිර ජනතාව තවමත් අරගල කරමින් සිටින බවත් ශ්‍රීධරන් සිහිපත් කරයි.
“ඉන්ධන, ගෑස්, විදුලිය වගේම කන්න කෑම නෑ කියලා, ලෙඩට බෙහෙත් නෑ කියලා නොවේ අපි අරගල කළේ. අපි මේ ඔක්කොම නැතිව ජිවත් වෙලා තියෙනවා.දෙ මළ මිනිස්සු සටන් කරන්නේ උදුරාගත්තු අයිතිවාසිකම් වෙනුවෙන්. කරුණාකරලා ඒක පිළිගන්න.“
“ අපේ සටන බාල්දු කරන්න එපා,“ යි ඔහු ඉල්ලයි.
Facebook Comments
