බෝට්ටුවෙන් රට දමා යන්නට ගිය තුන්සීයකට වැඩියෙන් නාවික හමුදාව අල්ලලා

0

රට තුල දිනෙන් දින වැඩි වන ආර්ථික අර්බුදය හමුවේ මුහුදු මාර්ගයෙන් රටින් පිටවීමට වෑයම් කරන සංඛ්‍යාව ඉහල යමින් පවතී.

ශ්‍රී ලංකා නාවික හමුදාව පවසන පරිදි නීති විරෝධී ලෙස මෙරටින් විදෙස් රටකට සංක්‍රමණය වීමට උත්සහ කළ බවට සැකකෙරෙන පුද්ගලයන් සීයකට වැඩි පිරිසක් සතියකටත් අඩු කාලයක් තුලදී අත්අඩංගුවට ගෙන ඇති අතර මාසයක් තුල තුන්සීයකට වැඩි පිරිසකගේ අනවසර සංක්‍රමණයන් නවතා තිබේ.

ජුනි මස 27 වනදා මඩකලපුවට නැගෙනහිරින් වූ මුහුදු ප්‍රදේශයේ සිදුකළ සෝදිසි මෙහෙයුමකදී අනවසරයෙන් මුහුදු මගින් විදෙස් රටකට සංක්‍රමණය වීමට සුදානම් වන බවට සැක කොට පිරිමි පුද්ගලයන් 52ක් සහ කාත්තාවන් 02ක් ඇතුළු 54 දෙනෙකු නාවික හමුදාව සිය භාරයට ගෙන ඇති අතර එදිනම මීගමුවට ඔබ්බෙන් වූ මුහුදු ප්‍රදේශයේදී ඔස්ට්‍රේලියාවට සංක්‍රමණය වීමට උත්සහ කළ බවට සැකකෙරෙන තවත් පුද්ගලයන් 47 දෙනෙකු අල්ලා ගෙන ඇත.

මඩකලපුව මුහුදු ප්‍රදේශයේදී සිය නාවික හමුදා භාරයට ගත් පිරිස වයස අවුරුදු 19 ත් 53 ත් අතර පසුවන ඔවුන් මඩකලපුව, ත්‍රීකුණාමලය, මුලතිව් හා යාපනය යන ප්‍රදේශයන්හී පදිංචිකරුවන් බව හඳුනාගෙන ඇති අතර ඉදිරි නීතිමය කටයුතු සඳහා ත්‍රීකුණාමලය වරාය පොලිසිය වෙත භාර දී තිබේ.

මීගමුවේදී අත්අඩංගුවට ගත් පිරිස අතර ජාවාරමට සම්බන්ධ පුද්ගලයන් 05 දෙනෙකු ඇතුළුව වැඩිහිටි පිරිමි පුද්ගලයන් 34 ක්, වැඩිහිටි කාත්තාවන් 06 ක් සහ ළමුන් 07 ක් සිටින බව පවසන නාවික හමුදා වයස අවුරුදු 01 ත් 50 ත් අතර වයසේ පසුවන සැකකරුවන් යාපනය, කිලිනොච්චිය, මන්නාරම, වෙන්නප්පුව, නාත්තන්ඩිය, හලාවත සහ මඩකලපුව යන ප්‍රදේශවල පදිංචිකරුවන් බවට හඳුනාගෙන ඇති බව පවසයි.

එම පිරිස ඉදිරි නීතිමය කටයුතු සඳහා කොළඹ වරාය පොලිසිය වෙත භාරදීමට නියමිතයි.

මීට අමතරව ශ්‍රී ලංකා නාවික හමුදාව ජුනි මස 23 වනදා පානදුර ප්‍රදේශයට ඔබ්බෙන් වූ මුහුදු ප්‍රදේශයේ සිදුකළ සෝදිසි මෙහෙයුමක දී මුහුදු මාර්ග ඔස්සේ ඔස්ට්‍රේලියාවට සංක්‍රමණය වීමට උත්සහ කළ බවට සැකකෙරෙන පුද්ගලයන් 35 දෙනෙකුගේ ගමන නාවික හමුදාව නැවැත්වීය.

තුන්සීයකට වැඩි පිරිසක්

නාවික හමුදාව නිවේදනය කර ඇති පරිදි නීති විරෝධී ලෙස මුහුදු මාර්ගයෙන් උපන් බිම හැර දමා යාමට ගිය තුන්සීයකට වැඩි පිරිසක් ජුනි මාසය දී මේ දක්වා සිය භාරයට ගෙන ඇත.

නාවික හමුදාවට අනුව ජුනි මස 07 වනදා මාරවිල ප්‍රදේශයේ සහ බටහිර මුහුදු ප්‍රදේශයේ සිදුකළ විශේෂ සෝදිසි මෙහෙයුමකදී පුද්ගලයන් 91 දෙනෙකුත්, ජුනි මස 11 වන දින අම්පාර ඔකඳ ප්‍රදේශයට ඔබ්බෙන් වූ මුහුදු ප්‍රදේශයේ සිදුකළ සෝදිසි මෙහෙයුමකින් රට හැර යන්නට ගිය පුද්ගලයන් 38 දෙනෙකුත්, නැගෙනහිර මුහුදු ප්‍රදේශයේ ජුනි 15 වනදා සිදුකළ විශේෂ සෝදිසි මෙහෙයුමකදී පුද්ගලයන් 64 දෙනෙකු සහ පානදුර ප්‍රදේශයට ඔබ්බෙන් වූ මුහුදු ප්‍රදේශයෙන් පුද්ගලයන් ජුනි 23 වනදා පුද්ගලයන් 35 දෙනෙකු නීති විරෝධී ලෙස මෙරටින් විදෙස් රටකට සංක්‍රමණය වීමට උත්සහ කළ බවට සැක පිට අත්අඩංගුවට ගෙන තිබේ.

ජුනි මස 27 වනදා මඩකලපුවට නැගෙනහිරින් වූ මුහුදු ප්‍රදේශයේ හා මීගමුවට ඔබ්බෙන් වූ මුහුදු ප්‍රදේශයේදී නාවික හමුදාව අත්අඩංගුවට ගන්නා ලද පිරිස 101 කි.

මිනිස් ජාවාරම් වලට හසුවී නීති විරෝධී ලෙස මෙරටින් සංක්‍රමණය වීමට උත්සහ කර නීතිය ඉදිරියේ වරදකරුවෙකු වීමෙන් වළකින ලෙස මෙන්ම අනාරක්‍ෂිත යාත්‍රා යොදා ගනිමින් නිතී විරෝධීව සංක්‍රමණය වීමට උත්සාහ දරා තම ජීවිත විශාල අවදානමකට හෙලීමෙන් වළකින ලෙසත් නාවික හමුදාව ජනතාවගෙන් ඉල්ලා සිටි.

Facebook Comments

wedding people