බෞද්ධ භික්ෂුන් විසින් මුලතිව් දිස්ත්‍රික්කයේ හින්දු පුදබිමක නටබුන් මත අලුතින් ගොඩනැගිලි ඉදිකිරීම ‘සංරක්ෂණ කටයුත්තක්’ ලෙස තහවුරු කිරීමට පුරාවිද්‍යා බලධාරීන් දරන උත්සාහය අධිකරණය හමුවේ අසාර්ථක වී තිබේ.
මතබේදයට තුඩු දී ඇති කුරුන්තුර් මලේ කරා ගිය අධිකරණ නිලධාරීන්ගේ නිරීක්ෂණය වී ඇත්තේ පුරාවස්තු යටපත් කොට නව ඉදිකිරීම් සිදුකොට ඇති බවයි.
කෙසේවෙතත්, එම අලුත් ගොඩනැගිලි ඉවත් කිරීමට යාමෙන් පුරාවස්තු තවදුරටත් හානියට පත්විය හැකි බව අධිකරණයේ මතය වී තිබේ.
නව බෞද්ධ ඉදිකිරීම් ගැන නිරීක්ෂණය කළ යුතු බව හින්දු බැතිමතුන්ගේ පෞරාණික පුදබිමක් ලෙස ප්‍රකට තන්නිමුරිප්පු, කුරුන්තුර් මලේ ආදිසිවන් අයියනායර් කෝවිලේ පරිපාලක සභාව වෙනුවෙන් උසාවියේ පෙනී සිටී නීතිවේදීන් විසින් ඉල්ලීමක් කර තිබුණි.
නීතිපති දෙපාර්තමේන්තුව නියෝජනය කරමින් මුලතිව් උසාවිය ඉදිරියේ 19 අඟහරුවාදා පෙනී සිටී නියෝජ්‍ය සොලිස්ටර් ජෙනරාල් සහ පුරාවිද්‍යා කොමසාරිස් ජෙනරාල් දෙපල කියා සිටියේ කුරුන්තුර් මලේ බෞද්ධ පුරා වස්තු නටබුන් සහිත ස්ථානයක් බැවින්, පුරාවිද්‍යා පනත අනුව සංරක්ෂණය කර ඇති බවයි. ආදිසිවන් අයියනාර් කෝවිල් පරිපාලනය අධිකරණය නොමග යවමින් තීන්දුවක් ලබා ගෙන ඇති බැවින් ඊට එරෙහිව නැවත නඩුවක් ගොනු කිරීමට තීරණය කළ බව ද ඔව්හු චෝදනා කළහ.
කුරුන්තුර්මලේ නිරීක්ෂණයෙන් පසු මුලතිව් මහේස්ත්‍රාත් ටී.සරවනරාජා කියා සිටියේ පුරාවස්තු සංරක්ෂණය මුවාවෙන් නටබුන් වසා දමා ඉදිකිරීම් හේතුවෙන් අලුතින් ඉදිකළ විහාර ගොඩනැගිල්ල ඉවත් කළ යුතු බවට ඉකුත් 14 දා පනවා තිබු නියෝගය අහෝසි කරන බවයි. මහේස්ත්‍රාත්වරයා පෙන්වා දුන්නේ නව විහාර ගොඩනැගිල්ල ඉවත් කිරීමේදී පුරාවස්තු වලට හානි විය හැකි බැවින් තමන් කලින් නිකුත් කළ නියෝගය මෙසේ සංශෝධනය කරන බවයි.
කුරුන්තුර්මලේ ඉදි කර තිබෙන නීතිවිරෝධී බෞද්ධ විහාර ගොඩනැගිලි ඉවත් කරන ලෙස කළ මහේස්ත්‍රාත් නියෝගයට එරෙහිව ජුලි 18 වැනිදා පැමිණිල්ලක් ගොනුකර තිබිණි. මුලතිව් පොලිසිය කියා සිටියේ මේ නියෝගය හේතුවෙන් දකුණේ ජාතීන් අතර නොසන්සුන්තාවක් ඇතිවිය හැකි බවයි.
ආදිසිවන් අයියනායර් කෝවිලේ පරිපාලක සභාව හා උතුරු පළාත් සභාවේ හිටපු මන්ත්‍රී තුරෙයිරාසා රවිහරන් විසින් 2018 වසරේ ගොනු කළ නඩුවක් අනුව කුරුන්තුර්මලේ කිසිදු නව ඉදිකිරීමක් කළ නොහැකි බවට අධිකරණ නියෝගයක් පනවා තිබිණි.
යුද්ධය අවසන් වීමෙන් පසු සොයා ගත් කුරුන්තුර්මලේ කැනීම් සඳහා වියදම් දැරීමට පුරාවිද්‍යා දෙපාර්තමේන්තුවට නොහැකි බව සැලවීමෙන් ශ්‍රීලංකා නිදහස් පක්ෂයේ පාර්ලිමේන්තු මන්ත්‍රීවරයෙකු වූ තිලංග සුමතිපාලගේ වැඩිමහල් සොයුරු,සමස්ත ලංකා බෞද්ධ සම්මේලනයේ හිටපු සභාපති,බෞද්ධාලෝක පදනමේ සභාපති ජගත් සුමතිපාල විසින් රුපියල් 15,44,000 ක් පරිත්‍යාග කර තිබේ.
ඒ අනුව උසාවියෙන් ලබා ගත් අවසරයක් මත 2019 වසරේදී පුරාවිද්‍යා දෙපාර්තමේන්තුව විසින් කුරුන්තුර්මලේ කැනීම් ඇරඹිණි.
වන්නි වාර්තාකරුවන් පවසන්නේ බෞද්ධ විහාරයේ ප්‍රධානි උතුරු පළාතේ සංඝනායක ගල්ගමුවේ ශාන්තබෝධි හිමියන් ප්‍රදේශයේ කඳවුරු ලා සිටින 59.1 සේනාංකයේ, 24 වැනි සිංහ රෙජිමේන්තුවේ සෙබළුන්ගේ හා සිවිල් ආරක්‍ෂක බලකායේ සෙබළුන් ද ඊට මැදිහත් කරගෙන ජගත් සුමතිපාලගේ මුල්‍ය අනුග්‍රහයෙන් පුරාවස්තු සංරක්ෂණය මුවාවෙන් බෞද්ධ විහාර අලුතින් ඉදි කරන බවයි.
2018 දී කැනීම් ආරම්භ කළ කුරුන්තුර් මලේ 2022 වන විට චෛත්‍යක් ඉදි කොට උත්සව ශ්‍රීයෙන් ධාතු තැන්පත් කිරීමට කළ සැලසුම ව්‍යවර්ථ වුයේ දෙමළ ජාතික ජනතා පෙරමුණේ නියෝජ්‍ය නායක පාර්ලිමේන්තු මන්ත්‍රී සෙල්වරාසා ගජේන්ද්‍රන් ප්‍රමුඛ දේශපාලන ක්‍රියාධරයන්ගේ දැඩි විරෝධය මැදය.
Facebook Comments
