ජනපති සමග සාකච්ඡාවේ මුල් දිනයේ දෙමළ මන්ත්‍රීවරුන් අතෘප්තියෙන්

දශක ගණනාවක් තිස්සේ දෙමළ ජනයා පීඩා විදින ප්‍රශ්න විසදාගැනීම සදහා වත්මන් ජනාධිපති සමග පැවැත්වු දෙවන සාකච්ඡා වටයේ පළමු දිනය නිමාවී ඇත්තේ දෙමළ ජනතා නියෝජිතයන් සෑහීමකට පත්වීමෙන් තොරවය.

“ගොඩක් දේවල් අපි කතා කරා. ඉඩම් සම්බන්ධයෙන්, සිරකරුවන් සම්බන්ධයෙන්, ඒ වගේම සත්‍ය සහ සංහිඳියාව ගැන කමිටුවක් පත්කරගැනීම සම්බන්ධයෙන්, PTA ගැන, මේ වගේ ගොඩක් දේවල් අපි කතා කරා. මේ විෂයන් ඔක්කොම තුළ අපේ පැත්ත තෘප්තිමත් නෑ. ”

දෙමළ ජාතික සන්ධානයේ පාර්ලිමේන්තු මන්ත්‍රී සහ ප්ලොට් නායක ධර්මලිංගම් සිද්ධාර්ථන් මැයි 11 වැනි බ්‍රහස්පතින්දා ඒ බව සදහන් කළේ, ජනාධිපති රනිල් වික්‍රමසිංහ උතුරු නැගෙනහිර දෙමළ ජනතා නියෝජිතයන් පිරිසක් සමග සංහිදියාවට අදාල ප්‍රශ්න සම්බන්ධයෙන් පැවැති සාකච්ඡාවෙන් පසු අගනගරයේ මාධ්‍යවේදීන් අමතමිනි.

උතුරු නැගෙනහිර දෙමළ ජනයාගේ පෞරාණික ආගමික සිද්ධස්ථානවල පුරා විද්‍යා දෙපාර්තමේන්තුවේ අනුදැනුම ඇතුව කෙරෙන සංස්කෘතික සංහාරය සම්බන්ධයෙන් එම සාකච්ඡාව තුලදී ජනාධිපතිවරයාගේ අවධානයට යොමු කළ බව පවසන ධර්මලිංගම් සිද්ධාර්ථන් මන්ත්‍රීවරයා කියා සිටියේ පුරා විද්‍යා දෙපාර්තමේන්තුවේ නිලධාරීන්ට සහ දෙමළ ජනතා නියෝජිතයන්ට එකතුව සාකච්ඡා කිරීම මගින් එම ගැටළුවට විසදුම් සොයා ගැනීමට හැකි බවට රනිල් වික්‍රමසිංහ ජනාධිපතිවරයා පැවසු බවයි.

දේශපාලන සිරකරුවන් නිදහස් කිරීම සම්බන්ධයෙන් වු සාකච්ඡාව තුලදී මේ වන විට සිටින්නේ සිරකරුවන් 20 දෙනෙකු පමණ පිරිස් බව අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජයදාස රාජපක්ෂ පැවසු බව කියා සිටි ප්ලොට් නායකයා සදහන් කරන්නේ ඔවුන් අතුරින් නිදහස් කළ හැකි පිරිස් නිදහස් කිරීමට කටයුතු කරන බවට අමාත්‍යවරයා පැවසු බවයි.

මැයි 11 වැනි බ්‍රහස්පතින්දා ජනාධිපතිවරයා සමග පැවැති සාකච්ඡා තුලදී බලහත්කාරයෙන් අතුරුදහන් කළ පිරිස් වෙනුවෙන් යුක්තිය ඉටු කිරීම සම්බන්ධයෙන් පැහැදිලි පිළිතුරක් නොලැබුන බව කී මන්ත්‍රීවරයා පෙන්වා දෙන්නේ එම සාකච්ඡාවට සහභාගී වි සිටි අතුරුදහන් වූ තැනැත්තන් පිළිබඳ කාර්යාලයේ (OMP) නිලධාරීන් මේ වන විට තමන් සිදු කර තිබෙන රාජකාරිය සම්බන්ධයෙන් විස්තරයක් පමණක් ඉදිරිපත් කළ බවයි.

අතුරුදහන් කරනු ලැබුවන් සොයාගැනීමට අඛණ්ඩ අරගලයක යෙදී සිටින ඥාතීන්ට එකම සමීපතමයකු හෝ සොයා දීමට සමත් වී නැති අතුරුදහන් වූ තැනැත්තන් පිළිබඳ කාර්යාලයට (OMP) පිහිටුවා මේ වන විට වසර පහකට වඩා වැඩි කාලයක් ගත වී තිබේ.

ජනපති – දෙමළ මන්ත්‍රී සාකච්ඡා පැවැත්වුනේ අතුරුදහන් කරනු ලැබුවන්ගේ ඥාතීන් දියත් කළ අඛණ්ඩ අරගලයට දින 2272ක් පිරෙන දිනයේය.

දෙමළ ජනතා ජාතික සන්ධානයේ නායක පාර්ලිමේන්තු මන්ත්‍රී සී.වී විග්නේෂ්වරන් පවසන්නේ උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගෙන සිටීම සම්බන්ධයෙන් සාකච්ඡා කළ මොහොතේ 1985 දී වන සංරක්ෂණ දෙපාර්තමේන්තුව සතුව පැවැති සිතියමට අනුව ක්‍රියා කළ යුතු බවට ජනාධිපතිවරයා පැවසු බවයි.

ආණ්ඩුවේ කොටස්කරුවන් වී දෙමළ ජනතාවගේ ප්‍රශ්න විසදාගන්නැයි ජනාධිපති රනිල් වික්‍රමසිංහ ද්‍රවිඩ පක්ෂ වලට ලෝක කම්කරු දිනයදා කළ ආරාධනයෙන් පසු පැවැත්වෙන දෙදින සාකච්ඡාවේ 2 වැනි දිනය 12 වැනි සිකුරාදාට නියමිතව ඇත. එහිදී බලය බෙදීම ගැන උතුරු නැගෙනහිර දෙමළ මන්ත්‍රීවරුන් සමග සාකච්ඡා කිරීමට නියමිතව තිබේ.

ගජේන්ද්‍ර කුමාර් පොන්නම්බලම්ගේ නායකත්වයෙන් යුත් දෙමළ ජාතික ජනතා පෙරමුණ ජනාධිපති සමග සාකච්ඡා වර්ජනය කර ඇත.