උතුරින්, දකුණින් හා කඳුකරයෙන් ශිල්පීන් සොයා විසාකේස හැදු “මනල්” සිනමාහලට

ජාත්‍යන්තර සම්මානලාභි සිනමා අධ්‍යක්ෂ විසාකේස චන්ද්‍රසේකරම්ගේ “මනල් மணல் Munnel” සිනමා කෘතිය, සීමිත දර්ශන වාර ප්‍රමාණයක් තෝරාගත් සිනමාශාලා කිහිපයක නොවැම්බර් 3 වන දා සිට ප්‍රදර්ශනය කෙරේ.

මනල් චිත්‍රපටයට පාදක වී ඇත්තේ යුද්ධය අවසානයේ සිරභාරයෙන් නිදහස් වෙන දෙමල අරගලකරුවෙකු තම අතුරුදහන් වූ පෙම්වතිය සොයා යන කථාවකි.

පැයකුත් විනාඩි 42ක් පුරා දිවෙන සිනමාපටයේ ප්‍රධාන භාෂාව දමිල වන අතර සිනමාපටය සිංහල සහ ඉංග්‍රීසි භාෂාවලින් උපසිරැසි ගන්වා ප්‍රදර්ශනය කෙරෙන බව අධ්‍යක්ෂ විසාකේස චන්ද්‍රසේකරම් පවසයි.

පාළොස් වසරක් අලුත් වු පිටපත

සිනමා අධ්‍යක්ෂ විසාකේස ලියූ පළමුවන තිර පිටපත මනල් වුවත්, වසර 15 කට වඩා වැඩි කාලයක් එය නැවත ලියමින් දියුණු කරන ලද පිටපතකි.

චිත්‍රපටයට රංගනයෙන් දායක වීමට උතුරින් පමණක් නොව, කොළඹින් ද, කඳුකරයෙන්ද දෙමල කතා කරන ශිල්පීන් පැමිණ ඇති අතර, ඔවුන්ගෙන් ඇතැමෙක් ප්‍රථම වතාවට කැමරාවට රඟපෑම් ඉදිරිපත් කළ අය වෙති.

මෙහි කැමරා ශිල්පි රිෂී සෙල්වම්, සංගීත ශිල්පි පත්මයන් සිවනාදන් සහ නිෂ්පාදක කණ්ඩායමේ ජෙනොෂන් ජෙයරාම් සහ භරත් පන්ජදාසම් යන අය යාපනයේ සිට නිර්මාණකරණයේ යෙදෙන ශිල්පීන් වීම සුවිශේෂය.

චිත්‍රපටයට දායක වූ ඇතැම් ශිල්පීන් යුද්ධයේ සෘජු වින්දිතයන් වන අතර ඉන් කිහිපදෙනෙක් 2009 වසරේ නන්දිකඩල් කලපුව තරණය කොට දිවිගලවාගත් අයවලුන් විමේ මෙම නිර්මාණයේ තවත් විශේෂත්වයකි.

මනල් සාරංශය

යුද්ධය අවසානයේ රජයේ හමුදා ග්‍රහණයට පත්වන තරුණ රුද්‍රන් වසර පහකට පසු රැඳවුම් භාරයෙන් නිදහස් වී උසාවියෙන් පිටතට එන්නේ ඔහුගේ අතුරුදහන් වූ පෙම්වතිය වන වානිගේ ඡායාරූපයක් තම ගෙලේ පළඳාගෙන එහි “දුටුවාද?” යන වචනය ද ලියාගෙනය.

රුද්‍රන් යන යන තැන වානිගේ ඡායාරූපය පෙන්වමින් ඇයව සොයද්දී, ඔහුගේ මව වන සෙල්ලම්මා තමා ලද දේව වරමකින් ආරූඪයෙන් සාස්තර කියමින් අවට ගම්නියම්ගම් වල වැසියන්ට යුද්ධයේදී අතුරුදහන් වූ තම දුවා දරුවන් ගැන සාස්තර කියන්නීය.

එහෙත් සෙල්ලම්මා තම පුතුගේ ආදරවන්තිය ගැන අනාවැකි කිසිවක් නොකියන්නීය. යුධ පරාජය හමුවේ දේශපාලනිකව ඇවතැන් වී සිටින අවට ගම් වැසියන් බුරුතු පිටින් දැවැන්ත දේවාල වලට ඇදෙමින් දේව ආරක්ෂාව අයාචනා කරද්දී රුද්‍රන් මුලදී කියන්නේ තමන්ට දෙවියන් ගැන විශ්වාසයක් නැති බවයි.

පසුව ඔහු කාලයත් සමඟ කෙමෙන් දෙවියන් වෙතට නැඹුරු වන අතර, සබරමලේ කන්ද නැග අය්යප්පා දෙවියන්ගේ ආශිර්වාදය ලබාගන්නට තීරණය කරන්නේ තම ආදරවන්තිය හා නැවත එක්වීමට කිසිවක් කළ නොහැකිව අන්ත අසරණ වූ අවස්ථාවේ විය හැක. එහෙත් ඔහුගේ ප්‍රාර්ථනා ඉටුවනු ඇත්ද?

ජාත්‍යන්තර සිනමා උළෙල නියෝජනය

මනල් චිත්‍රපටය 2023 වසර තුලදී ජාත්‍යන්තර සිනමා උළෙලවල් 10 කදී ශ්‍රී ලංකාව නියෝජනය කරමින් ජත්‍යන්තර සම්මාන 4 ක් දිනාගන්නට සමත් විය.

ඒ අතරින් අතර ප්‍රථම වතාවට ශ්‍රී ලාංකිකයෙකුට හිමිවූ Tiger Jury සම්මානය සුවිශේෂ වන්නේය.

මනල් 2023 දෙරණ ලකස් සිනමා උළෙලේ හොඳම “හෙට දිනයේ සිනමා කෘතිය” ලෙස ද සම්මාන ලැබීය.

2023 International Film Festival of Rotterdam, The Netherlands (Tiger Jury Award)
2023 ImagineIndia Film Festival of Barcelona, Spain (Best Film)
2023 Tasveer Film Festival, United States of America (Audience Choice Award)
2023 Bengaluru International Film Festival, India (Second Best Film Award)
2023 Sydney Film Festival, Australia
2023 Durban International Film Festival, South Africa
2023 Melbourne International Film Festival, Australia
2023 Nuremberg International Human Rights Film Festival, Germany
2023 San Diego Asian Film Festival, United States of America
2023 Hong Kong Asian Film Festival, Hong Kong