බටලන්දත්, මාතලේත් හැර තවත් වධකාගාර තිබේද?

අද පාර්ලිමේන්තුවේ කතාබහ කෙරෙන දශක හතරකට ඉහත වද කඳවුරක් වූ බටලන්ද හා සමාන තවත් රාජ්‍ය අනුග්‍රහ ලත් වධකාගාර ගණනාවක්ම ශ්‍රී ලංකාව තුළ පැවැති බව තහවුරු කෙරෙන තොරතුරු සමහරක් ශ්‍රී ලංකාවේ අතුරුදහන් කිරීම් පිළිබඳ ජනාධිපති කොමිසන් සභා කිහිපයක ලේකම්වරයා විසින් හෙළි කර තිබේ.

ජනතා විමුක්ති පෙරමුණේ දෙවැනි කැරැල්ල සමයේ අතුරුදහන් කිරීම් පිළිබඳව සොයා බැලීමට ජනාධිපති චන්ද්‍රිකා බණ්ඩාරනායක කුමාරතුංග විසින් පත් කරන ලද මධ්‍යම කලාප කොමිසමේ ලේකම්වරයා එම අනාවරණ සිදු කර ඇත්තේ ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP), ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සහ ශ්‍රී ලංකා කැම්පේන් (SLC) එක්ව සමාජ මාධ්‍ය ඔස්සේ ප්‍රකාශයට පත් කරන ලද වීඩියෝ දර්ශන ඔස්සේය.

ශ්‍රී ලංකාවේ වධකාගාර 200කට අධික සංඛ්‍යාවක් දැක්වෙන මුල්ම සිතියම මෙයින් අවුරුදු පහකට ඉහතදී සම්පාදනය කළ ITJP හා JDS විසින් මාතලේ වධකාගාර හා අතුරුදහන්වීම් හා බැඳුනු ගෝඨාභය රාජපක්ෂගේ භූමිකාව සම්බන්ධයෙන් 2022 දී හා ඉන් පසුවත් පල කොට ඇති වාර්තා පිළිබඳව විමර්ශනය කිරීමට කිසිදු රජයක් උනන්දුවක් දක්වා නැත. http://www.jdslanka.org/images/documents/18_06_2020_itjp_jds_press_release.pdf

වර්තමාන රජය බටලන්ද වධකාගාරය පිළිබඳ පාර්ලිමේන්තු විවාදයක් පැවැත්වීමට ඡන්ද සමයේ කඩිමුඩියේ උනන්දු වී ඇත්තේද අල් ජසීරා ජාත්‍යන්තර මාධ්‍ය ජාලය ඒ පිළිබඳව හිටපු ජනාධිපති රනිල් වික්‍රමසිංහගෙන් ප්‍රශ්න කිරීමෙන් අනතුරුව ඇතිවුණු බලපෑමෙන් පසුවයි.

පසුගිය දශකයකට ආසන්න කාලය තුලදී මාතලේ, මන්නාරම, කොක්කුතොඩුවායි හා කොළඹ වරාය යන සිව් දෙස සමූහ මිනීවලවල් හමුවී තිබුනත් ඒ ගැන මැතිසබේ විවාද පැවැත්වීමට කිසිදු ආණ්ඩුවක් යෝජනා කොට නැත.

අසුව දශකය අගභාගයේ සිදුවූ මානව හිමිකම් අපරාධ විමර්ශනය කිරීමට ජනාධිපති චන්ද්‍රිකා විසින් පිහිටුවන ලද අතුරුදහන් කිරීම් පිළිබඳ මධ්‍යම කලාප කොමිසමේ ලේකම් එම්.සී.එම්. ඉක්බාල් හෙළි කරන්නේ අද කාගේත් උනන්දුව අලුතින් යොමුවී ඇති බටලන්ද හුදෙක් එක වධකාගාරයක් පමණක් බවයි.

“නමුත් බටලන්ද කියන්නෙ ආරක්ෂක අංශ පවත්වාගෙන ගිය රැඳවුම් ස්ථාන ගණනාවකින් එකක් විතරයි. උදාහරණයක් ලෙස ගත්තම මහනුවර ශාන්ත සිල්වෙස්ටර් විද්‍යාලයේත් වධකාගාරයක් තිබුනා.”

එම ස්ථානයේ රඳවා සිටි තවත් සගයන් මෙන් මරු නොදැක, අහම්බෙන් ජීවිතය බේරාගැනීම නිසා ‘චාන්ස් කාරයා’ නම පටබැඳුණු තරුණයකු මධ්‍යම කලාපයේ අතුරුදහන් කිරීම් පිළිබඳ කොමිසමට ලබා දුන් සාක්ෂියකින් එය දැනගත් අයුරු පවසන එම්.සී.එම්. ඉක්බාල්ට සවන් දෙන්න. https://x.com/JDSLanka/status/1909262030101422349

එය ආපසු ගැළවී එන්නට ඉඩක් නොලද දස දහස් සංඛ්‍යාතයන් අතුරින් එක් අයකුගේ කතාවක් පමනි.

මේ බදුල්ලේ හාලිඇල මෝටර්ස් වධකාගාරය ගැනයි. https://x.com/SLcampaign/status/1909656056642306527?t=KG-1pG4p8rahfzRmlOWdAA&s=09

මධ්‍යම කලාප කොමිසම විසින් ලේඛනගත කරන ලද බලහත්කාරී අතුරුදහන්කිරීම් පිළිබඳ පූර්ණ නාම ලේඛනය පහත සබැඳියෙන් කියවා බලන්න. http://tinyurl.com/2zyhxeek