රටේ සියලු ජනතාවට තම ආත්ම අභිමානය ආරක්ෂා වන ලෙස ආණ්ඩුක්‍රම ව්‍යවස්ථාවක් සෑදිමේ මූලික කටයුතු අරඔා ඇති බවත් රටේ ආණ්ඩුක්‍රම ව්‍යවස්ථාව උල්ලංඝනය කරන කිසිවක් නොකරන බව මෙන්ම රටේ ආණ්ඩුක්‍රම ව්‍යවස්ථාව තුළ නිර්මාණය කළ හැකි මාර්ගයක් හරහා සංහිදියාව සොයා ගැනීමේ මාර්ගය ආරම්භ කර ඇති බව අධිකරණ හා බුද්ධ ශාසන අමාත්‍යවරයා පවසනවා.
උපරිම වශ‍යෙන් රටේ ජනතාවට යුක්තිය හා සාධාරණයත්වය ඉටුකිරීමට අවශ්‍ය බව පෙන්වා දෙන ඇමති විජයදාස රාජපක්ෂ සත්‍ය සෙවීමේ වගකීම රජයට පැවරී ඇති බව සහ සත්‍ය සොයා ගැනීමේ යාන්ත්‍රණයක් ගෙන ඒම අවශ්‍ය බව කියා සිටියේ අද (23) පාර්ලිමේන්තුවට ඉදිරිපත් කළ අපරාධ නඩු විධාන සංග්‍රහය (විශේෂ විධිවිධාන ) පනත යටතේ පැවති විවාදයේදී ය.
අද වන විට සියලු පක්ෂ එකතු වී රටේ සියලුම ජනතාවට තම ආත්ම අභිමානය ආරක්ෂා වන ලෙස ජිවත් විය හැකි නව ආණ්ඩුක්‍රම ව්‍යවස්ථාවක් නිර්මාණය කිරිමේ කටයුත්ත ආරම්භ කර ඇති බවත් ඇතැමුන් නව ව්‍යවස්ථාව පිළිබඳව අසත්‍ය ප්‍රකාශ කරමින් පටු දේශපාලන වුවමනා ඉටු කර ගැනීමට ජනතාව නොමඟ යවන්න උත්සාහ කරමින් සිටින බවද අමාත්‍යවරයා ප්‍රකාශ කළේය.
නව ව්‍යවස්ථාවෙන් බුද්ධාගමට හානියක් නොව බව අවධාරණය කල ඇමති විජයදාස රාජපක්ෂ සියලු ජනතාවගේ ජීවිත වැදගත් කම සළකන අලුත් ආණ්ඩුක්‍රම ව්‍යවස්ථාවක් සඳහා සියලු දෙනාගේ සහයෝගය බලාපොරොත්තු වන බව වැඩිදුරටත් කියා සිටියේය.
Facebook Comments
