ජනවාරි 8 ට පෙර මෙරට පැවති දේශපාලන රෙජීමය සම්පූර්ණයෙන් පරාජයට පත් කිරීමට නොහැකි වු බව සිවිල් සංවිධාන ක්‍රියාධර මහාචාර්ය සරත් විජේසූරිය පවසයි.
රාජපක්ෂ පාලනයේ සක්‍රීය දේශපාලන චරිත හරි අඬකටත් වඩා වත්මන් ආණ්ඩුව තුළ සිටීම මෙම තත්ත්වයට හේතුව බවත් එවැනි තත්ත්වයක් උදා වීම ඛේදවාචකයක් බව ඔහු කියා සිටියේ රාය හා නාවික කටයුතු පිළිබඳ ඇමැති අර්ජුන රණතුංග ගේ මාධ්‍ය ලේකම් තමීර මංජු විසින් රචනා කර විශාරද කපිල මැද්දේගොඩ සංගීතවත් කළ “රෙජීමයක රිදුම්” ගීතාවලිය කොළඹ නව නගර ශාලාවේ දී ජනගත කිරීමේ කලා ප්‍රසංගයේ දී දේශනයක් පවත්වමිනි.
පසුගිය පාලනයේ සක්‍රීය චරිත වර්තමාන රාජ්‍ය පාලනයේ හරි අඩකටත් වඩා ඉන්නා බව කී මහාචාර්ය සරත් විජේසුරිය “රෙජීමය හරියට පරාජය කරන්න බැරිඋනා” යැයි අනතුරු ඇඟවීය.
“රෙජීමය පරාජය කිරීමට ප්‍රධාන වශයෙන් පෙරමුණ ගත්ත දේශපාලන බලවේගයේ පුද්ගලයෝ ඉතිහාසයේ මොන ආකාරයේ පුර්වාදර්ශයන්ද ගත්තේ කියන එක අපිට තේරුම් ගන්න බැරිව ගියා,” යි ප්‍රකාශ කළ ඔහු “අපි අවාසනාවන්ත ගැටලුව නිරාකරණය කරගන්න බැරිව ඉන්නේ,” යි මැසිවිලි නැගීය.
වර්තමාන ආණ්ඩුව බලයට පත්කළ සිවිල් සමාජ බලවේග පාලක පක්ෂයේ පුද්ගලයන් විසින්ම අර්බුදයකට යවා ඇති බවද සාධාරණ සමාජයක් සඳහා වූ ජාතික ව්‍යාපාරයේ මහාචාර්ය සරත් විජේසූරිය මෙහිදී චෝදනා කළේය.
වර්තමාන පාලනය යටතේ ප්‍රකාශනයේ නිදහසට වැඩි අවකාශයක් ලැබී ඇතැයි සුබවාදී බැව් පවසන මහාචාර්ය සරත් විජේසුරිය ඒ අවසරය සමාජයේ මතුපිට දැවෙන ප්‍රශ්න කීපයක් ගැනුමට වඩා ප්‍රඥා සම්පන්න ජන සමාජයක් ගොඩ නැගීමට යොදා ගත යුතු වන ලෙස මාධ්‍යවේදීන්ගෙන් ඉල්ලා සිටියේය.
Facebook Comments
