ජනපති ජාතිවාදීන් ආරක්ෂා කරනවා දැයි බාහුට සැකයක්

0

සිංහල බෞද්ධ නොවන ප්‍රජාවට එරෙහිව කිසිඳු බාධාවකින් තොරව රට තුල සිදුවන ප්‍රහාර වලට පොලීසිය විසින් නිසි ක්‍රියාමාර්ග ගත යුතු යැයි අග්‍රමාත්‍යවරයා පවසා ඇති නමුත් මේ සම්බන්ධයෙන් ජනාධිපතිවරයාගේ මැදිහත්වීම සම්බන්ධව සෑහීමකට පත්විය නොහැකි බව වාමාංශික දේශපාලන පක්ෂ නායකයෙක් පවසයි.

ජනාධිපති මෛත්‍රීපාල සිරිසේන ජාතිවාදය වපුරවන පුද්ගලයන් ආරක්ෂා කරමින් සිටනවා දැයි සැක සහිත බවට නව සම සමාජ පක්‍ෂ නායක වික්‍රමබාහු කරුණරත්න කියා සිටියේ 6 අඟහරුවාදා පැවති මාධ්‍ය හමුවකදීය.

මුස්ලිම් විරෝධී ප්‍රහාර ලෙස ආරම්භ වු මෙම පහරදීම් මේ වන විට ක්‍රිස්තියනු භක්තිකයන්ට එරෙහි ප්‍රචන්ඩත්වයක් දක්වා වර්ධනය වී ඇති බවයි ආචාර්ය වික්‍රමබාහු පෙන්වා දෙන්නේ.

ජාතිවාදී ක්‍රීයා මැඩලීමට ජනාධිපතිවරයාගේ මැදිහත් වීම සම්බන්ධයෙන් තෘප්තිමත් විය නොහැකි බව පවසන නව සම සමාජ පක්‍ෂ නායකයා ජනපති මෛත්‍රීපාල සිරිසේන තම පක්‍ෂය ආරක්‍ෂා කර ගැනීම සඳහා ජාතිවාදීන්ට පක්‍ෂපාතීව කටයුතු කරනවා දැයි සැක මතු වන බවද ප්‍රකාශ කළේය.

සාගලට අනතුරු ඇඟවීමක්

ජාතිවාදි හා ආගම්වාදි ප්‍රහාර මැඩලීමට අසමත් වන්නේ නම් නීතිය හා සාමය බාර අමාත්‍ය සාගල රත්නායක එම ධුරයෙන් ඉවත් කිරීමට සිදු වන බවට ජනාධිපතිවරයා විසින් 7 බදාදා පැවති ආණ්ඩු පක්ෂ රැස්වීමේදී අනතුරු අඟවා ඇත.

ආණ්ඩුව අපහසුතාවයට පත් කරමින් දිගින් දිගටම සිංහල බෞද්ධ නොවන කණ්ඩායම් වෙත එල්ල වන ප්‍රහාර වලට සම්බන්ධ පුද්ගලයන් මැඩලීමට පොලිසය අසමත් වන්නේ නම් හමුදාව යොදා මෙම ප්‍රහාර මැඩලීමට පියවර ගන්නා බව ජනාධිපතිවරයා එහිදී අවධාරණය කර තිබේ.

රාජපක්ෂ පාලන සමයේ අවසන් කාලයේදී මුස්ලිම් ජනයා මුහුණ දෙමින් සිටි බිය ජනක තත්ත්වය නැවත උදා වී ඇති බව පෙන්වා දී ඇති මුජිබර් රහුමාන් මන්ත්‍රීවරයා මෙම ප්‍රහාර සම්බන්ධයෙන් වත්මන් රජය මුණිවත රකිමින් සිටීම කිසිඳු ලෙසකින් අනුමත කල නොහැකි බවට චෝදනා කර ඇත.

 

Facebook Comments