ශ්‍රී ලංකාවේ ආරක්ෂක ලේකම්වරයා සහ ගුවන් හමුදා නිලධාරින් පිරිසක් යුද නෞකා මිලදී ගැනීමට රුසියාවේදී ඉහල මට්ටමේ රාජ්‍යතාන්ත්‍රික සාකච්ඡා පවත්වා තිබේ.
ආරක්ෂක ලේකම්වරයාගේ නායකත්වයෙන් යුත් ශ්‍රී ලංකා හමුදා නියෝජිත මණ්ඩලය තම හමුදා අවශ්‍යතා සම්බන්ධයෙන් රුසියානු නියෝජ්‍ය ආරක්ෂක අමාත්‍ය ඇලෙක්සැන්ඩර් ෆෝමින් ඇතුළු එරට යුද බලධාරීන් සමග 23 බදාදා සාකච්ඡා පැවැත්වීය.
“සාකච්ඡා කෙරෙමින් පවතිනවා… දැනට අපි නැව් මිලදී ගන්නවා,” යි ආරක්ෂක ලේකම් කපිල වෛද්‍යරත්න රුසියානු රාජ්‍ය පාලිත ස්පුට්නික් මාධ්‍ය ජාලයට පවසා තිබුනි.
ආරක්ෂක ලේකම් කපිල වෛද්‍යරත්න ප්‍රමුඛ හමුදා නිලධාරීන් පිරිසක් මොස්කව් නුවර පැවැත්වෙන නවීන පන්නයේ යුද්ධෝපකරණ පිලිබඳ ජාත්‍යන්තර ආයුධ වෙළෙඳ ප්‍රදර්ශනයකට සහභාගි වෙමින් සිටින අතර “ආමි 2017” නම් ජාත්‍යන්තර ආයුධ ප්‍රදර්ශනය සංවිධායකයන් විසින් හඳුන්වා ඇත්තේ “දියුණු හමුදා සහ ද්වි කාර්ය තාක්ෂණය විදහා දක්වන හමුදා-ආර්ථික සහයෝගිතාව සඳහා වන ජාත්‍යන්තර වේදිකාවක්” ලෙසිනි.
ඊට සහභාගි වීමට ලැබීම ‘වාසනාවක්’ ලෙස හඳුන්වන ආරක්ෂක ලේකම් වරයා මොස්කව් නුවරදී පවසා ඇත්තේ “දැනුම ලබාගැනීම සහ ජාත්‍යන්තර සහයෝගිතාව පුළුල් කර ගැනීම,” සඳහා ඒ අවස්ථාව ප්‍රයෝජනයට ගන්නා බවයි.
අතිරේක ආරක්ෂක ලේකම් සරත් කුමාර, ශ්‍රී ලංකා ගුවන් හමුදා කාර්ය මණ්ඩල ප්‍රධානී එයාර් වයිස් මාර්ෂල් ඩී එල් එස් ඩයස්, ගෘප් කපිතාන් ජේ පී බාලසුරිය, ලුතිනන් කමාන්ඩර් එරංග බුද්ධික යන ගුවන් හමුදා නිලධාරීන් සමග මොස්කව් හි ශ්‍රී ලංකා තානාපති කාර්යාලයේ ආරක්ෂක උපදේශක ගෘප් කපිතාන් චන්න දිසානායකද සාකච්ඡාවට සහභාගි වූ බව තානාපති කාර්යාලය නිවේදනය කර තිබේ.
රටේ ජාතික ආරක්ෂාවට තර්ජනයක් නැතැයි හමුදා බලධාරීන් සහ ශ්‍රී ලංකා ආණ්ඩුව දිගින් දිගටම සහතික කර තිබියදී මෙලෙස යුද නැවි මිලදී ගැනීමට සාකච්ඡා පැවැත්වීම විශේෂත්වයකි.
Facebook Comments
