යහපාලන රජයේ අගමැති රනිල් වික්‍රමසිංහට විරුද්ධව ඒකාබද්ධ විපක්ෂය විසින් පාර්ලිමේන්තුවට ඉදිරිපත් කරන ලද විශ්වාස භංග යෝජනාව වැඩි ජන්ද 46 කින් ජය ගැනීමට අගමැතිවරයා සමත් විය.
විශ්වාසභංග යෝජනාවට පක්ෂව ජන්ද 76ක් එය විපක්ෂව ජන්ද 122 ලැබුණ අතර නෙපැමිණි මන්ත්‍රීවරුන් ගණන 26 කි.
අගමැතිට එරෙහි විශ්වාස භංග ලියවිල්ලට අත්සන් තැබූ නියෝජ්‍ය අමාත්‍ය නිශාන්ත මුතුහෙට්ටිගම සහ කාදර් මස්තාන් යන මන්ත්‍රීවරුන් 04 බදාදා විශ්වාස භංගයේ ජන්දය ප්‍රකාශ කරන අවස්ථාවේ පාර්ලිමේන්තු සභා ගර්භයේ රැඳී නොසිටීම විශේෂත්වයක් විය.
ශ්‍රී ලංකා නිදහස් පක්ෂය නියෝජනය කරන ටී. බී. ඒකනායක, සුසන්ත පුංචි නිලමේ, අනුර ප්‍රියදර්ශන යාපා, තිලංග සුමතිපාල, ලක්ෂමන් වසන්ත පෙරේරා, දයාසිරි ජයසේකර, එස්.බී.දිසානායක, තාරනාත් බස්නායක, සුසිල් ප්‍රේමජයන්ත, අනුරාධ ජයරත්න, සුමේධා ජයසේන, ලක්ෂ්මන් යාපා අබේවර්ධන, සුදර්ශනී ප්‍රනාන්දු පුල්ලේ, ඩිලාන් පෙරේරා, චන්දිම වීරක්කොඩි සහ ජෝන් සෙනෙවිරත්න යන මැති ඇමැතිවරුන් අගමැති රනිල් වික්‍රමසිංහට එරෙහිව සිය ජන්දය භාවිතා කළේය.
ජනතා විමුක්ති පෙරමුණ යෝජනාවට පක්ෂව සිය ජන්දය භාවිතා කරද්දි දෙමළ ජාතික සන්ධනයේ බහුතර මන්ත්‍රීවරුන් විශ්වාස භංග යෝජනාවට විරුද්ධව සිය ජන්දය ප්‍රකාශ කරන ලදී.
ශ්‍රී ලංකා නිදහස් පක්ෂයේ බහුතරය සහ අතුරුලියේ රතන හිමියන් ජන්දය විමසන අවස්ථාවට සහභාගී නොවීය.
මහ බැංකුවට ශ්‍රී ලංකාවේ පුරවැසියෙකු නොවන පුද්ගලයෙකු පත් කිරිම, ඇතුළු බැදුම්කර වංචාවට අනුබල දීම හේතුවෙන් අගමැතිවරයා කෙරෙහි විශ්වාසයක් නොපවතින බව පවසමින් ඒකාබද්ධ විපක්ෂයේ මන්ත්‍රීවරුන් 51ක් හා ශ්‍රී ලංකා නිදහස් පක්ෂ මන්ත්‍රීවරුන් 4 දෙනෙකුගේ අත්සනින් යුතුව අගමැතිවරයාට එරෙහි විශ්වාස භංග යෝජනාව පසුගිය මාර්තු 21 ඒකාබද්ධ විපක්ෂය කතානායකවරයාට බාර දෙන ලදී.
Facebook Comments
