මන්ද පෝෂණයට තිත තියන්න ධන්‍ය නිෂ්පාදනය ඉහලට

0

මන්දපෝෂණය තුරන් කිරීම සඳහා හොඳ විසඳුම ධාන්‍ය වර්ග වැඩියෙන් භාවිතා කිරීම බැවින් රට තුළ ධාන්‍ය නිෂ්පාදනය වැඩි කිරීමට තිරසාර වැඩපිළිවෙළක් යොදා තිබෙන බව කර්මාන්ත හා වාණිජ කටයුතු අමාත්‍යවරයා පවසයි.

ශ්‍රී ලංකාවේ ප්‍රෝටීන ලබා ගන්නා ප්‍රධානතම මාංෂ භෝග වන්නේ ධාන්‍ය වර්ග බවත් රතු පරිප්පු ඉන් ප්‍රධාන වන බව පවසන රිෂාඩ් බදියුදීන් ඇමැතිවරයා මාංෂභෝග ඇතුළු ධාන්‍ය අධි පෝෂණීය වටිනාකමකින් යුතු බවට පසුගිය දා කොළඹදී පැවති ගෝලීය මාංෂභෝග සම්මේලනයේ සමාරම්භක සමුළුව අමතමින් කියා සිටියේය.

” මාංෂභෝග – 18 ආහාරයේ අනාගතය ” තේමාව යටතේ මෙම ජාත්‍යන්තර සමුළුව පැවැත්වෙන බවයි කර්මාන්ත හා වාණිජ කටයුතු අමාත්‍යංශය නිවේදනය කරන්නේ.

මාංෂභෝග ඇතුළු ධාන්‍ය කර්මාන්තය නියෝජනය කරන එකම ජාත්‍යන්තර සම්මේලනය වන මෙම සමුළුව සඳහා රටවල් 40 ක පමණ ව්‍යාපාරික ප්‍රජාවක් සහභාගී වී ඇති අතර මෙය ගෝලීය මාංශභෝග සන්ධාන සම්මේලනය විසින් සංවිධානය කර තිබුණි.

ලොව පුරා පවතින 20 කට වැඩි ජාත්‍යන්තර සංගම්වල එකතුවකින් මෙය සමන්විත අතර පුද්ගලික අංශයේ සාමාජිකයින් සහ ක්‍රියාකාරීන් 600 කට වැඩි ප්‍රමාණයක් ද මෙයට එකතු වු බවයි එම අමාත්‍යංශය පවසන්නේ.

අඩු ආදායම්ලාභී රටවල්වල ප්‍රධාන ප්‍රෝටීන් ප්‍රභවය වන්නේ නිර්මාංශ මාංෂභෝග නිෂ්පාදනය බව පෙන්වා දී ඇති ඇමැතිවරයා මාංෂභෝග නිෂ්පාදනය වැඩි දියුණු කර ගැනීමට තිරසාර වැඩපිළිවෙළක් යෙදිය යුතු බවට අවධාරණය කර ඇත.

මෙම ජාත්‍යන්තර සමුළුවේදී ඇති කර ගන්නා ගිවිසුම ගෝලීය මාංෂභෝග නිෂ්පාදකයින්ගේ සමාජීය හා ආර්ථික අරමුණු ජාතික වශයෙන් හා ජාත්‍යන්තර වශයෙන් ළඟා කර ගැනීමට උපකාරී වන බව ද ඔහු ප්‍රකාශ කර තිබේ.

ශ්‍රී ලංකාවේ වාර්ෂික මාංෂභෝග ධාන්‍ය නිෂ්පාදනය මෙට්‍රික් ටොන් 1000 ක් පමණ වන බව ද කර්මාන්ත හා වාණිජ කටයුතු අමාත්‍ය රිෂාඩ් බදියුදීන් සමුළුව අමතමින් වැඩි දුරටත් කියා සිටියේය.

Facebook Comments

wedding people