OMP නිර්දේශ ක්‍රියාත්මක කිරීම ගැන ජනාධිපති ජාත්‍යන්තරයට කියයි

0
503
wedding people

අතුරුදහන් වුවන් පිළිබඳ සොයා බැලීමේ කාර්යාලය තමන් වෙත ලබා දුන් අතුරු වාර්තාවේ සඳහන් නිර්දේශ ක්‍රියාත්මක කිරීම වෙනුවෙන් ඉදිරියේ දී කැබිනට් අනුකමිටුවක් පත්කරන බවට ජනාධිපතිවරයා ජාත්‍යන්තර නියෝජිතයන් පිරිසක් හමුවේ සහතික වී තිබේ.

එම පවුල්වල ඥාතීන්ගේ සුබ සාධනය වෙනුවෙන් රජය ගෙන යන වැඩපිළිවෙළට සහය ලබාදෙන ලෙස ද ජනාධිපති මෛත්‍රීපාල සිරිසේන 05 බදාදා ශ‍්‍රී ලංකාවට සංවර්ධන ආධාර සපයන ජාත්‍යන්තර ආයතනවල නියෝජිතයෝ හමුවේ ඉල්ලීමක් කර ඇත.

යුද්ධය හේතුවෙන් විනාශයට පත් වූ උතුරු නැගෙනහිර ප‍්‍රදේශ සංවර්ධනය කරා ගෙන යමින් එම ජනතාවට ද සංවර්ධන අයිතීන් ලබාදීම වෙනුවෙන් රජය ප‍්‍රමුඛ අවධානයක් යොමු කරමින් කටයුතු කරන බව ජනාධිපතිවරයා ජාත්‍යන්තර නියෝජිතයන්ගේ අවධානයට ලක් කල බවද ජනපති මාධ්‍ය අංශය පවසයි.

උතුරු නැගෙනහිර අවතැන් වූ ජනතාව නැවත පදිංචි කිරීමේ කටයුතු 88‍% ක් මේ වන විට අවසන් කර තිබෙන අතර, ඉතිරි 12‍% ද කඩිනමින් සම්පූර්ණ විය යුතුය යන අරමුණ ඇතිව රජය කටයුතු කරන බව ජනාධිපතිවරයා පෙන්වා දී තිබේ.

රජය විසින් උතුරු නැගෙනහිර පළාත් තුළ ක්‍රියාවට නංවා තිබෙන මෙම සංවර්ධන ක්‍රියාදාමය සාර්ථක කර ගැනීමේ දී එහි සියලු දේශපාලන නියෝජිතයින්ගෙන් ලැබිය යුතු සහය ඉතා වැදගත් බව ද ජාත්‍යන්තර නියෝජිතයන් වෙත ප්‍රකාශ කර ඇති ජනපති සියලු දෙනා එක්කර ගනිමින් සංවර්ධනයේත්, සංහිඳියාවේත් අරමුණු ජයග‍්‍රහණය කිරීම තම අපේක්ෂාව බවයි අවධාරණය කර ඇත්තේ.

සංවර්ධනයේත්, සංහිඳියාවේත් අරමුණු ජය ගැනීමේ ශ‍්‍රී ලංකා ජනපතිගේ වෑයමට තම පූර්ණ සහය ලබාදීමට සූදානම් බව ශ‍්‍රී ලංකාවට සංවර්ධන ආධාර සපයන ජාත්‍යන්තර ආයතනවල නියෝජිතයෝ මෙම හමුවේදී පැවසු බවයි ජනාධිපති මාධ්‍ය අංශය වැඩි දුරටත් නිවේදනය කරන්නේ.

Facebook Comments