උතුරට පොකුරු බෝම්බ ගැසු හැටි එක්සත් ජාතීන්ගේ වාර්තාවකින් එළියට

යුද්ධයේ අවසාන මාස කිහිපයේදී ශ්‍රී ලංකාවේ හමුදා පොකුරු බෝම්බ ගැසූ බව සඳහන් කෙරෙන මෙතෙක් ප්‍රසිද්ධියට පත්වී නැති එක්සත් ජාතීන්ගේ අභ්‍යන්තර පණිවිඩ කිහිපයක් ජාත්‍යන්තර මානව හිමිකම් සංවිධානයක් එළි දක්වා තිබේ.

පොකුරු බෝම්බ භාවිතා කළ බව සනාථ කිරීම සඳහා එක්සත් ජාතීන්ගේ සංවිධානයේ දත්ත මෙන්ම වන්නි වැසියන් ගණනාවකගේ ප්‍රකාශ ද ශ්‍රී ලංකාවේ සත්‍යය හා යුක්තිය සඳහා වන ව්‍යාපෘතිය (ITJP) ප්‍රසිද්ධියට පත් කර ඇත.

යුද්ධය බරපතල ලෙස ඇවිල ගිය 2009 මාර්තුවේ එක්සත් ජාතීන්ගේ කාර්ය මණ්ඩල සාමාජිකයන් විසින් හුවමාරු කරගන්නා ලද කෙටි පණිවිඩ කිහිපයක දැක්වෙන පරිදි මාර්තු 5 සිට 19 දක්වා දෙසතියක කාලය තුල පොකුරු බෝම්බ ප්‍රහාරවලින් මියගිය පිරිස 225 ඉක්මවයි.

එයින් වැඩිම විනාශය සිදුවී ඇත්තේ මාර්තු 5 දා වන අතර එදින 134 දෙනකු මරුමුවට පත්ව 270 කට වැඩි පිරිසක් තුවාල ලද බව වාර්තාවෙහි දැක්වේ.

රජය විසින් යුද මුක්ත ලෙස ප්‍රකාශිත කලාපයේ සිටියදී 2009 ජනවාරියේ සිට මැයි දක්වා කාලය තුල පොකුරු බෝම්බ ප්‍රහාර වලින් තුවාල වූ බව පවසන 24 දෙනකුද තමන්ට තොරතුරු සැපයු බව ITJP සඳහන් කරයි.

“මහ පොකුරු වෙඩිල්ල ඉහල අහසේ පුපුරාපුවාම පුංචි බෝම්බ කැටිති වැස්ස වගේ සද්දෙට මලක් හැඩේට විහිදෙනවා,” යි විශ්වමඩුවට පොකුරු බෝම්බ හෙලනු දුටු බව පවසන අයකු ITJP හා පවසා තිබේ.

යුද්ධයේදී පොකුරු බෝම්බ ගැසූ බව ශ්‍රී ලංකාවේ රජය තරයේ ප්‍රතික්ෂේප කරන අතර “රටක් හැටියට අපි කිසි විටෙකත් පොකුරු අවි පාවිච්චි කර නැත,” යි ශ්‍රී ලංකාවේ නිත්‍ය නියෝජිත ඒ.එල්.ඒ. අසීස් සැප්තැම්බර් 3 දා ජිනීවා නුවරදී එක්සත් ජාතීන් අමතා කියා සිටියේය.

ආණ්ඩුවේ මෙම ‍ප්‍රතික්ෂේප කිරීම සිය ආදරණීයයන් පොකුරු බෝම්බ වැදී තුවාල වනු හෝ මියයනු දුටු, එසේත් නැතිනම් තමන්ටම තුවාල සිදුවුනු වින්දිතයන්ට කරන අපහාසයක් බවයි ITJP චෝදනා කරන්නේ.

“තමන්ගේ ප්‍රහාරක ජෙට් යානාවලින් නොවේ නම් මේ පොකුරු බෝම්බ වැටුනේ කෙසේදැයි ශ්‍රී ලංකාවේ ආණ්ඩුව කිසිදා පැහැදිලි කර නැත.”

බිම් බෝම්බ ඉවත් කරන ලෝකයේ ප්‍රමුඛතම සංවිධානය වන හේලෝ ට්‍රස්ට් (Halo Trust) කාර්ය මණ්ඩල සාමාජිකයකු විසින් දෙන ලද කිලිනොච්චි සහ මුලතිව් දිස්ත්‍රික්ක වලින් හමුවූ පොකුරු බෝම්බ දැක්වෙන ඡායාරූප සහිත සාක්ෂි ලන්ඩනය මුලස්ථාන කොට ගත් ගාඩියන් පුවත්පත විසින් 2016 ජූනි මාසයේදී පල කර තිබුනි.