අපරාධකරුවන්ට දඬුවම් කිරීමේ යහපාලන පොරොන්දුව රාජිත මතක් කර දෙයි

0

රාජපක්ෂ පාලන සමයේ දුෂණ, වංචා සහ මනුෂ්‍ය ඝාතන වලට සම්බන්ධ වරදකරුවන් නීතියේ ඉදිරියට ගෙන ඒම යහපාලන රජයේ වගකීමක් බව සුව ඇමැතිවරයා ජන හමුවක දී සිහිපත් කර තිබේ.

දෙබිඩි දේශපාලනයක් ‍නොකරන තමන් කිසිවකුගෙන් පළි නොගන්නා බවත් කිසිවෙකු හිරේ දැමීමට නොකැමති බව සෞඛ්‍ය, පෝෂණ හා දේශිය වෛද්‍ය අමාත්‍ය දොස්තර රාජිත සේනාරත්න 14 ඉරිදා “අරුණැල්ල” පදනම විසින් සංවිධානය කළ සුවපති ගාලු අභිෂේකය ප්‍රධානය කිරීමේ උත්සවයේදී කියා ඇත.

“මූල්‍ය අපරාධ කොට්ඨාසය පාලනය කරන්නේ, සැකකරුවන් හිරේ දාන්නේ, මමත්, චම්පිකත් කියලා හිටපු ජනාධිපති මහින්ද රාජපක්ෂ මහතා රත්නපුරයේ දී ප්‍රකාශ කර තිබෙනවා. මිග් යානා ගනුදෙනුවේ දුෂිතයින්, මාධ්‍ය වේදීන් ඝාතනය කළ සහ පැහැරගත් පුද්ගලයින්, මාධ්‍ය ආයතනවලට ගිනි තැබූ පුද්ගලයින්, තාඡුඩීන්ගේ ඝාතනයට සම්බන්ධ පුද්ගලයින් ඇතුලු දුෂණ වංචා සිදු කළ පුද්ගලයින් නීතිය හමුවට ගෙනඒම යහ පාලන රජය ලබාදුන් පොරොන්දුවක්. ජනතාව අපෙන් අහන්නේ හොරුන්ට සහ මිනීමරුවන්ට මොකක් ද කළේ කියලා.”

පසුගිය රජයේ එම අපරාධ වලට සම්බන්ධ පිරිසක් “උපාසකයන්, මහත්වරුන්” ලෙස හැඳින්වු අමාත්‍යවරයා ඔවුන්ගේ නීතිය ඉදිරියට පමුණුවා ජනතාවට සාධාරණය ඉෂ්ඨ කළ යුතු බව අවධාරණය කළේය.

යහපාලන රජය බිහි කිරීමේදී දුන් පොරොන්දු සිහි කරන විට රජයේම ඇමැතිවරුන් බැණුම් අසන බව ඇමැති රාජිත සේනාරත්න එසේ බනිනු ලබන්නේ කවුරුන් විසින්ද යන්න ප්‍රකාශ කළේ නැත.

“සියලු වරදකරුවන් නීතිය ඉදිරියට ගෙන ආ යුතු බව අපි දෙතුන් දෙනෙක් ප්‍රකාශ කරනවා. එම නිසා අපි බැනුම් අහනවා. අපි කථා කරන්නේ යහපාලන රජය බිහි කිරීමේ දී ලබාදුන් පොරොන්දු ඉටු කිරීමයි. කවුරුවත් බැන්නට කමක් නැහැ. අපි අදාල පොරොන්දුව ඉටු කරනවා.” යි අමාත්‍ය රාජිත සේනාරත්න වැඩි දුරටත් කියා සිටියේය.

Facebook Comments