ගින්නෙන් උපන් සීතලට පසුව “සුළඟ අප රැගෙන යාවි”

0
1002
Ivory Agency Sri Lanka
wedding people

ශ්‍රී ලංකාවේ සිනමාව පිළිබඳ මේ දිනවල බොහෝ දෙනෙක් කතා කරන්න පටන් අරන් තිබෙනවා.

එයට හේතුව ලංකාවේ සිනමාවට අලුතෙන් එකතු වන සිනමා නිර්මාණ දියුණු සහ නිර්මාණශීලී වීමයි.

එසේම එකී බොහෝ නිර්මාණ සිදුකර තිබෙන්නේ තරුණ සිනමාකරුවන් විසින්.

තරුණ සිනමාකරුවන් සිනමා කර්මාන්තය තුලට එකතු වීමත් සමඟ සිනමා කර්මාන්තය පිළිබඳ නැවුම් බලාපොරොත්තුවක් නැවත දළුලන ආකාරයක් පෙනෙන්නට වීමත් ඒ අතර වඩාත්ම සුබ කාරණාවක්.

එවන් නිර්මාණශීලී තරුණ අධ්‍යක්‍ෂවරයෙකුගේ සම්මානලාභී සිනමා කෘතියක් මාර්තු මස අගදී ලංකාවේ ප්‍රේක්ෂකාගාරයට තිළිණ වීමට නියමිතයි.

ඒ ‘සුළඟ අප රැගෙන යාවි’ සිනමා පටයයි. එහි අධ්‍යක්ෂවරයා නුවන් ජයතිලක.

තම කුලුදුල් සිනමාපටය වන සුළඟ අප රැගෙන යාවි රටවල් 68ක අතිශය සාර්ථක ලෙස තිරගත කර, ජ්‍යාත්‍යන්තර සම්මාන රැසකින් පිදුම් ලැබීමෙන් අනතුරුව ලාංකික ප්‍රේක්ෂකයන්ට නැරඹීමේ අවස්ථාව මාර්තු මස සිට ලැබෙන බව එහි අධ්‍යක්ෂවරයා අප සමඟ සදහන් කළා.

මී මුරේ ආශ්‍රිත වෙසෙන තවලම් කණ්ඩායමක පවුලක්, තම ජීවිකාව සරි කර ගැනීමට සහය දෙන වස්සා නැති වීම නිසා අසරණ වීමත් එම වස්සා සොයා කිසිදා නොදැකපු නගරයට පැමි‍‍ණෙන පවුලේ බාල දරුවා විෂය කොටගනිමින් දිගහැරෙන මෙම සිනමාපටය ආදරය, කුතුහලය පිරි පවුලේ සැමට එකට හිඳ නැරඹිය හැකි අනගි සිනමා කෘතියක්.

මෙම සිනමාපටය නිෂ්පාදනය කර ඇත්තේ ප්‍රවීණ සාහිත්‍යවේදියකු වන සයිමන් නවගත්තේගම මහතාගේ දියනියක වන මායා නවගත්තේගම විසිනි.

සුදම් කටුකිතුල, ප්‍රවීන් කටුකිතුල, සේමිනි හෙන්නනායක යන ළමා රංගන ශිල්පීන් ද අයිරාංගනී සේරසිංහ, සුජීව ප්‍රියාල්, ප්‍රියන්කර රත්නායක, අංජන ප්‍රේමරත්න, දයාදේව එදිරිසිංහ, සම්පත් ජයවීර, මයුර කාංචන, සුරංගා රණවක යන ප්‍රවීණ රංගන ශිල්පීන් ද රංගනයෙන් දායකත්වය ලබා දෙන මෙම සිනමාපටයේ සංගීතය චිත්‍රාල් සෝමපාලගෙනි.

සුළඟ අප රැගෙන යාවි ලංකාවේ ප්‍රේක්ෂකාගාරයට නවමු අසිරියක් එක්කරන්නට සමත් සිනමා නිර්මාණයක් වෙතැයි මේ වන විටත් බොහෝ විද්වතුන් මත පළකර තිබෙනවා.

ඒ නිසාම චිත්‍රපටය එළිදැක්වෙන මාර්තු මාසය ලංකාවේ සිනමාලෝලීන්ට නම් සුවිශේෂ වනු නිසැකයි.

Facebook Comments