කතෝලික දේවස්ථාන, සංචාරක හෝටල් ඉලක්ක කර ගනිමින් ප්‍රහාරයක් එල්ල විය හැකි බවට ජාත්‍යන්තර ඔත්තු සේවා මෙරට ආරක්ෂක අමාත්‍යංශයට අනතුරු අඟවා තිබු බව සුව ඇමැතිවරයා ප්‍රකාශ කර සිටී.
ප්‍රහාර මාලාව එල්ල වීමට විනාඩි 10 පෙර ද එම ඔත්තු සේවා ප්‍රහාර පිළිබඳව ආරක්ෂක අමාත්‍යංශය වෙත අනතුරු ඇඟවුවද වගකිව යුත්තන් ඒ සඳහා කිසිඳු පියවරක් ගෙන නොමැති බව රාජිත සේනාරත්න ඇමැතිවරයා 22 සඳුදා අරලිය ගහ මන්දිරයේ පැවති මාධ්‍ය හමුවේදී කියා සිටියේය.
“ජාත්‍යන්තර ආයතන මේ පිළිබඳව දැනුවත් කරලා තිබුණා. මේ 11 වෙනිදාට පස්සේ දවස් දෙකකට කළින් පැය 48 පෙර දන්වලා තිබුණා මේක සිදු වෙනවයි කියලා. ඒකෙදි ඔවුන් පැහැදිලිවම කිව්වා කතෝලික, ක්‍රිස්තියානී දෙවස්ථාන හා සංචාරක මධ්‍යස්ථාන වලට ප්‍රහාර එල්ල වෙනවා කියලා.”
“පෙර දින නැවත අවවාද කරලා තිබුණා. මේ සිද්ධිය වෙන්න විනාඩි 10 කලින් කියල තියෙනවා තව විනාඩි 10 න් මෙවැනි පිපිරිමක් සිදුවෙනවා කියලා. මේ ඔක්කොම තියාගෙන මේවට ක්‍රියාත්මක නොවන එක ගැන තමයි අපි පරික්ෂා කරන්න බලාපොරොත්තු වෙන්නේ.” යැයි අමැතිවරයා පැවසීය.
කෙසේ වෙතත් මෙම බුද්ධි අංශ වාර්තා පිළිබඳව අගමැතිවරයා හෝ අමාත්‍ය මණ්ඩලය දැන නොසිටි බව කී අමාත්‍යවරයා “කැබිනට් මණ්ඩලයට හෝ අග්‍රාමාත්‍යවරයාට කිසි වාර්තාවක් ලැබිලා තිබුනේ නැහැ ඊයේ වෙනකම්.” යැයි ප්‍රකාශ කළේය.
එම බුද්ධි වාර්තා 21 ඉරිදා මුල් වරට දුටු විට මවිතියට පත්වු පැවසු අමාත්‍ය රාජිත සේනාරත්න සිද්ධි සම්බන්ධ වගකීමෙන් නිදහස් නොවන බව ද මාධ්‍ය හමුවේ කියා සිටියේය.
ඔක්තෝම්බර් මාසයේ පැවති දේශපාලන කුමන්ත්‍රණයෙන් පසු පැවති කිසිදු ආරක්ෂක මණ්ඩල රැසවීමකට අගමැතිවරයාට හෝ ආරක්ෂක රාජ්‍ය අමාත්‍යවරයා හට ඇරයුම් නොකළ බව ද සුව ඇමැතිවරයා අනාවරණය කරන ලදී.
ප්‍රහාරයෙන් පසුව අගමැති රනිල් වික්‍රමසිංහ ආරක්ෂක මණ්ඩලය කැදවුවත් ආරක්ෂක මණ්ඩලය අරලියගහ මන්දිරයට නොපැමිණි බවත් අගමැතිවරයා ආරක්ෂක මණ්ඩලය කැදවන විට ආරක්ෂක මණ්ඩලය රැස් නොවූවේ ඉහළින් පැමිණි නියෝගයක් අනුව යැයිද රාජිත සේනාරත්න අමාත්‍යවරයා වැඩි දුරටත් කියා සිටියේය.
සිද්ධිය වන විට විදෙස් ගතව සිටි ජනාධිපතිවරයා ආරක්ෂක අමාත්‍යාංශය හෝ පොලීසිය කිසිඳු දේශපාලනාධිකාරියකට පවරා නොතිබු බව ද අමාත්‍ය රාජිත සේනාරත්න වැඩි දුරටත් සඳහන් කළේය.
Facebook Comments
