රනිල් වික්‍රමසිංහ අගමැතිවරයා සමග හවුලේ ශ්‍රී ලංකාව දෙකඩ කිරීමට සැරසෙන බවට මෛත්‍රිපාල සිරිසේන ජනාධිපතිවරයා මහින්ද රාජපක්ෂ හිටපු ජනාධිපතිවරයාගේ දැඩි ප්‍රහාරයකට ලක්විය.
තම පක්ෂයේ නායකයා වන ජනාධිපතිවරයා නමින් සඳහන් කරමින් හිටපු ජනාධිපතිවරයා සෘජු ප්‍රහාරයක් එල්ල කළේ රත්නපුරයේ පැවති එක්සත් ජනතා නිදහස් සන්ධානයේ විපක්ෂ පිළේ මහ රැළිය අමතමිනි.
එක්සත් ජාතික පක්ෂය සමග හවුල් ආණ්ඩුවක් ගොඩනැගීම මගින් වර්තමාන ජනාධිපති මෛත්‍රිපාල සිරිසේන ශ්‍රී ලංකා නිදහස් පක්ෂයේ ප්‍රතිපත්ති පාවා දී රට ‘කෑලි වලට කඩන්න හදන’ බව මහින්ද රාජපක්ෂ දහස් සංඛ්‍යාත ජනකායක් හමුවේ පැවසීය.
අලියාගේ ‘පස්ස පැත්ත’
එස්ඩබ්ලිව්ආර්ඩි බණ්ඩාරනායක හා එක්ව තම පියා වූ ඩීඒ රාජපක්ෂ 1951 දී එක්සත් ජාතික පක්ෂයෙන්ද, එහි ප්‍රතිපත්තියෙන්ද වෙන්වී පිහිටුවා ගත් ශ්‍රී ලංකා නිදහස් පක්ෂය එහි වර්තමාන නායක මෛත්‍රිපාල සිරිසේන විසින් පාවා දී ඇති බවට හිටපු ජනාධිපතිවරයා චෝදනා කළේය.
“මේක ගිහිල්ලා අලියාගේ පස්ස පැත්තේ තියලා තියෙනවා. ඒකයි වෙලා තියෙන්නේ සිරිසේන,” යි ඔහු ජනාධිපතිවරයාට දෝෂාරෝපණය කළේය.
තම විරෝධය පල කරන්නේ ඊට එරෙහිව විනා ජනාධිපතිවරයාට එරෙහි ‘පුද්ගලික තරහක්’ නිසා නොවන බවයි ඔහු කියා සිටියේ.
රටේ ව්‍යවස්ථාව සම්පුර්ණයෙන්ම වෙනස් කිරීම මගින් මෛත්‍රී රනිල් පාලනය ‘අපේ අයිතිවාසිකම් පාවාදෙන්නටත්’ රට කැබලි කරන්නටත් සැරසෙන බව පැවසූ ඔහු ‘අපි ඒකට ඉඩ දෙන්නේ නෑ’ යි තරවටුවක්ද කළේය.
“අද මෙයාලා දෙන්නම එක්ක එක්කහු වෙලා මේ රට දෙකට කඩන්න සුදානම් වෙනවා. කෑලිවලට කඩන්න හදනවා.”
‘ඔලුගෙඩි ගාන වෙනස් කිරීම’
ඒ සඳහා තමන්ගේ නායකත්වයෙන් මෛත්‍රිපාල සිරිසේන සහ රනිල් වික්‍රමසිංහ විරෝධී ආණ්ඩු බලයක් කල් නොගොස් පිහිටුවන බවට ඔහු තම අනුගාමිකයන්ට සහතික විය.
“පාර්ලිමේන්තුවේ ඔලුගෙඩි ගාන වෙනස් කරන එක එතරම් කජ්ජක් නෙවෙයි. වැඩිකල් යන්න ඉස්සර ඔලු ටික මාරු වේවි,” යි ඔහු උදම් ඇනීය.
නායකත්වයට එරෙහිව කටයුතු කරන පාක්ෂිකයන්ට එරෙහිව දැඩි විනය පියවර ගන්නා බව ශ්‍රී ලංකා නිදහස් පක්ෂයේ මහ ලේකම් දුමින්ද දිසානායක කිහිප වර අනතුරු අඟවා තිබිණි.
“මේ ඩාලී පාරේ තියෙන බෝඩ් ලෑල්ලකට හෝ කන්තෝරුවකට යටවෙන ශ්‍රී ලංකා කාරයෝ නෙවෙයි අපි. ශ්‍රී ලංකා නිදහස් පක්ෂයේ ප්‍රතිපත්තියත් එක්ක හිටගත්හු මිනිස්සු අපි,” යි පක්ෂයේ නිල නායකත්වයට අභියෝගයක්ද කළ ඔහු ජනාධිපති සිරිසේන කිහිපවර නමින් සඳහන් කරමින් විවේචනයටද, සමච්චලයටද ලක් කළේය.
(Radiogagana)
Facebook Comments
