ජනපති යටතේ ඉන්නා නිලධාරීන්ගෙන් දෙමළ ඉඩම් හිමියන්ට තර්ජන

සේනාධිනායකයා යටතේ පවතින ත්‍රිවිධ හමුදාව ඇතුළු රාජ්‍ය ආයතන විසින් බලහත්කාරයෙන් අත්පත්කරගත් උතුරේ දෙමළ ජනයාගේ ඉඩම් නිදහස් කිරීමට ජනාධිපතිවරයා පළාත් පාලන ඡන්ද වේදිකා තුළ පොරොන්දු දෙද්දී, ඔහුගේ පාලනය යටතේම වන සංරක්ෂණ දෙපාර්තමේන්තුව දෙමළ ජනයාට සිදු කරන හිරිහැර දෙමළ ජනතා නියෝජිතයකු විසින් හෙළි කර තිබේ.

මැයි 6 වැනිදා පැවැත්වීමට නියමිත පළාත් පාලන ඡන්දය ඉලක්ක කරගනිමින් අප්‍රේල් 26 වැනි දා කිලිනොච්චියේ පැවැති ජන රැලියකට එක්වෙමින් ජනාධිපති අනුර කුමාර දිසානායක පවසා තිබුනේ වන සංරක්ෂණ දෙපාර්තමේන්තුව විසින් යුද්ධයෙන් පවරා ගත් ජනතාවගේ ඉඩම් ‘නිසි පරීක්ෂාවකින් පසු’ නැවත ලබා දීමට කටයුතු කරන බවයි.

“සමහර ඉඩම්, පාරම්පරික වගා කරපු ඉඩම්, ගුගල් මැප් එක දිහා බලලා වන සංරක්ෂණ දෙපාර්තමේන්තුව පවරා ගත්තා. ඒවා මේ ප්‍රදේශයේ වගා කරපු ඉඩම්. ජනතාවගේ ඉඩම්. ඒවා නැවත නිසි පරීක්ෂාවකින් අපි ලබා දෙන්න කටයුතු කරනවා.”

පළාත් පාලන ඡන්දය ඉලක්ක කරගනිමින් අප්‍රේල් 25 වැනි දා වව්නියාවේ පැවැති ජන රැලියක් අමතමින් ඉලංගෙයි තමිල් අරසු කච්චි (ITAK) ජාතික ලැයිස්තු පාර්ලිමේන්තු මන්ත්‍රී වෛද්‍ය පත්මනාදන් සත්‍යලිංගම් හෙලි කර තිබුනේ නැවත පදිංචි වු යුද පීඩිතයන් පිරිසක් දෙසතියකට පමණ ඉහත දී සිය වගා කටයුතු සදහා ඔප්පු සහිත භුමිය පිරිසිදු කිරීමේකරමින් සිටියදී වන සංරක්ෂණ දෙපාර්තමේන්තු නිලධාරියෙක් විසින් එම ජනතාවට තුවක්කු එල්ල කර තර්ජනය කර ඇති බවයි.

“දෙමළ කතා කරන ජනතාව වසර 30 ක් තිස්සේ අවතැන් වී සිටියා. දැන්, ඔවුන් ඔවුන්ගේ ඉඩම් එළිපෙහෙළි කරන්න ගියාම, මේ දෙපාර්තමේන්තු ඒකට ඉඩ දෙන්නේ නැහැ. වන සංරක්ෂණ දෙපාර්තමේන්තු නිලධාරීන් මායිම් ගල් දානවා, මිනිසුන් අත්අඩංගුවට ගන්නවා. තුවක්කු පෙන්නනවා. මෑතකදී, පූවරසන්කුලම් ප්‍රදේශයේ ජනතාව තම ඉඩම් ඔප්පු පෙන්වූ විට, නිලධාරියෙක් ඔවුන්ට තුවක්කුව පෙන්නලා තර්ජනය කරලා තියනවා. ඒ ජනතාව මට දැනුම් දුන්නට පස්සේ මම එතනට ගියා. ගිහිල්ලා මේ සෙල්ලම මෙතන කරන්න එපා කියලා මම ඒ නිලධාරීන්ට කිව්වා.”

යාපනය දිස්ත්‍රික් ලේකම් මර්දලිංගම් ප්‍රදීපන්ට අනුව වන සංරක්ෂණ දෙපාර්තමේන්තුව සතු යාපනය දිස්ත්‍රික්කයේ ඉඩම් අක්කර 5397න් අක්කර 397 ක් දෙමළ ජනතාව ජීවත් වු භුමි වේ.

2025 අප්‍රේල් 26 වැනි දා කිලිනොච්චියේ ජන රැලිය අමතමින් ජනාධිපති අනුර කුමාර දිසානායක තව දුරටත් පවසා තිබුනේ යුද හමුදාව වාඩිලා සිටින දෙමළ ජනතාවගේ ඉඩම් අතුරින් ‘නිදහස් කළ හැකි’ සෑම බිම් අගලක්ම ආපසු ලබා දීමට කටයුතු කරන බවයි.

“අපි දන්නවා ආරක්ෂක හේතුන් මත ජනතාවගේ ඉඩම් හමුදා කදවුරු වෙත පවරාගෙන තිබෙනවා. අපි එම හමුදා නිලධාරීන් එක්ක, හමුදාපතිලත් එක්ක, අපි සාකච්ඡා කරලා තියනවා. නිදහස් කරන්න පුළුවන් හැම බිම් අගලක්ම ආපහු එම ජනතාවට ලබා දෙන්න අපි කටයුතු කරනවා. හොදයිනේ?”

උන්හිටි තැන් අහිමිවුවන්

උතුරේ දියත් කළ යුද්ධයේ පෙරමුනේ සිටි ත්‍රිවිධ හමුදාව විසින් යාපනය දිස්ත්‍රික්කයේ අත්පත් කරගත් ඉඩම් වලින් පමණක් අක්කර දෙදහස් පන්සීයකට වැඩි ප්‍රමාණයක් යුද නිමාවෙන් පහලොස් වසරක් ගත වී තිබියදීත් නිදහස් කර නොමැති බව මේ වසරේ ජනවාරියේදී හෙළි වී තිබුනි.

ඒ ඉඩම් වලින් වැඩිම කොටසක් දෙමළ ජනයාට අයත් පෞද්ගලික ඉඩම් වන අතර මේ වන විටත් එහි හිමිකරුවන් ජීවත් වන්නේ උන්හිටි තැන් අහිමිවුවන් ලෙසයි.

ඒ වන විටත් ත්‍රිවිධ හමුදාව වාඩිලා සිටි යාපනය දිස්ත්‍රික්කයේ ඉඩම් අක්කර 2624.29 ප්‍රමාණය වහාම නිදහස් කිරීමට අවශ්‍ය පියවර ගන්නැයි ජනාධිපතිවරයාගෙන් පසුගිය ජනවාරියේ ඉල්ලා සිටි යාපනය දිස්ත්‍රික් ලේකම්වරයා ඉදිරිපත් කළ සංඛ්‍යාලේඛන අනුව යුද්ධය නිමාවීමෙන් පසු ත්‍රිවිධ හමුදාව විසින් අධි ආරක්ෂිත කලාප බවට පත් කර ගත් රජයේ සහ පුද්ගලික ඉඩම් ප්‍රමාණය අක්කර 23850 කි.

යාපනය දිස්ත්‍රික් ලේකම් කාර්යාලයේ 2025 ජනවාරි 31 පැවැති දිස්ත්‍රික් සම්බන්ධිකරණ කමිටු රැස්වීමට සහභාගී වු ජනාධිපති අනුර කුමාර දිසානායකට ඒ බව දැනුම් දෙමින් යාපනය දිස්ත්‍රික් ලේකම් මර්දලිංගම් ප්‍රදීපන් වැඩි දුරටත් කියා තිබුනේ එම ඉඩම් අක්කර 23850 න් අක්කර 21226 ක් දැනට නිදහස් කර ඇති බවයි.

මේ වන විටත් ත්‍රිවිධ හමුදාව රැදී සිටින ඉතිරි ඉඩම් අක්කර 2624.29 ප්‍රමාණයෙන් ඉඩම් අක්කර 951 ක් රජයට අයත් අතර ඉතිරි ඉඩම් අක්කර 1673 පුද්ගලික ඉඩම් බව ඔහු වැඩි දුරටත් එදින ජනාධිපතිවරයාට දැනුම් දී තිබුනි.

පළාලි ගුවන් හමුදා කදවුරු පුළුල් කිරීම සදහා යැයි පවසමින් බලහත්කාරයෙන් අත්පත්කරගැනීමෙන් පසු සිවිල් ගුවන් සේවා අධිකාරියට පවරන ලද දෙමළ ජනයාට අයත් ඉඩම් අක්කර 1009.7 ප්‍රමාණය මේ වන විටත් ගුවන් හමුදාව ගුවන් ධාවන පථය සදහා පාවිච්චියට ගනිමින් සිටින බව ජනාධිපතිවරයාට එදින දැනුම් දෙමින් යාපනය දිස්ත්‍රික් ලේකම්වරයා සදහන් කර තිබුනේ එම භුමියේ දෙමළ ජාතිකයන් 643 දෙනකුට අයිති ඉඩම් පවතින බවයි.

ජනපති, අගමැති මන්දිර ඉදිරිපිට මාර්ග

2025 අප්‍රේල් 26 වැනි දා කිලිනොච්චියේ ජන රැලිය අමතමින් ජනාධිපති අනුර කුමාර දිසානායක යුද වින්දිත දෙමළ ජනයාගෙන් ප්‍රශ්න කර තිබුනේ කොළඹ පිහිටි ජනපති, අගමැති මන්දිර ඉදිරිපිට මාර්ග විවෘත කර තිබියදීත් කිලිනොච්චියේ මාර්ග වසා තබන්නේ ඇයිද යන්නයි.

බලයට පත්වූ අලුත පසුගිය ඔක්තෝබර් මාසයේ කොටුව ජනාධිපති මන්දිරය ඉදිරිපිට මාර්ගය විවෘත කිරීමට අණ දුන් ජනාධිපතිවරයා උතුරේ එසේ නොකරන්නේ ඇයිදැයි දෙමළ දේශපාලන ක්‍රියාධරයන් ඒ සමයේම විමසා තිබුණි.

“ඒ වගේම තවත් පාරවල් කිහිපයක් වහලා තියනවා. ජනාධිපති මන්දිරය ඉස්සරහ කොළඹ පාර ඇරලා තියෙන්නේ. අරලිගයහ මන්දිරය ඉස්සරහා කොළඹ පාර ඇරලා තියෙන්නේ. මොකටද කිලිනොච්චියේ පාරවල් වහන් තියෙන්නේ. ඒ හැම පාරක්ම ජනතාවට ගමන් කරන්න පුළුවන් යළි අපි විවෘත කරනවා,” යි කිලිනොච්චියේදී කියා සිටි ජනාධිපතිවරයා සිය රජය විසින් දැනටමත් උතුරේ මාර්ග විවෘත කර ඇති බව සදහන් කර තිබුනි.

“දැනටමත් අපි යාපනයේ උතුරේ පාරවල් විශාල ප්‍රමාණයක් යළි විවෘත කරලා තිබෙනවා. අපි මේ රට සාමාන්‍ය තත්වයට ගේන්න ඕන.”

යාපනයේ පාරට දැඩි කොන්දේසි

කෙසේවෙතත්, උතුරේ ඇවිලී ගිය යුද දැල් හේතුවෙන් තිස් හතර වසරක් පුරා වසා දමා තිබූ වසාවිලාන් පලාලි මාර්ගය අප්‍රේල් 10 වැනිදා උදෑසන යළි විවෘත කිරීමට කටයුතු කර තිබුනේ ජනාධිපති මන්දිරය ඉදිරිපිට පාරට දමා නැති දැඩි කොන්දේසි පනවමිනි.

මෙම මාර්ගය අධි ආරක්ෂක කලාපයක් සහ යුද හමුදා නිල නිවාස හරහා දිවීම හේතු කරගනිමින්, මාර්ගය ආරම්භක ස්ථානයේ එම නීතිරීති සඳහන් කරමින් බලධාරියකුගේ නමක් සඳහන් කිරීමකින් තොරව සවිකළ දැන්වීම් පුවරුවක අවධාරණය කර ඇත්තේ එම නීතිරීති කඩකරන පුද්ගලයන්ට එරෙහිව නීතිමය පිවර ගන්නා බවයි.

උදෑසන 6 සිට පස්වරු 5 දක්වා පමණක් මහජනතාවට විවෘත වන මෙම මාර්ගය ඔස්සේ ගමන් ගන්නා මගීන් සහ රියදුරන් අවශ්‍ය වූ ඕනෑම මොහොතක දී සිය අනන්‍යතාවය ආරක්ෂක අංශ වෙත තහවුරු කිරීමට සුදානමින් සිටිය යුතුය.

එම මාර්ගයේ කිසිවිටෙකත් පයින් ගමන් කිරීම හෝ පාපැදියෙන් ගමන් කිරීම තහනම් අතර මගී ප්‍රවාහන බස්රථ හැර අනෙකුත් බර වාහන කිසිවක් ධාවනය කළ නොහැක. එමෙන්ම කිසිවිටෙකත් රථ වාහන මාර්ගයේ නවතා තැබීමක් හෝ හැරවීමක් සිදුකළ නොහැකිය.

මෙම මාර්ගයේ ධාවනය කළ හැකි උපරිම වේගය පැයට කිලෝ මීටර් 40ක් වන අතර කිසිදු මොහොතක ඡායාරූප ගැනීම හෝ පටිගත කිරීම තහනම් බව ද අදාළ මාර්ගයේ සවිකර ඇති පුවරුවේ සඳහන් බවයි පළාත් බද වාර්තාකරුවන් පවසන්නේ.