කාන්තා දායකත්වය නොමැතිව රටේ ආර්ථිකය දියුණු කළ නොහැකි බව අග්‍රාමාත්‍යවරයා අවධාරණය කර තිබේ.
රටේ බහුතරයක් වන කාන්තාවන් දේශපාලන, ආර්ථික හා සමාජයීය වශයෙන් සෑම අංශයකින්ම බලගැන්වීම සඳහා වත්මන් රජය පියවර රැසක් ගෙන ඇති බවයි අගමැති රනිල් වික්‍රමසිංහ පෙන්වා දෙන්නේ.
“මේ රටේ කාන්තාවන් බලගැන්වීම සඳහා වැඩිම වැඩ කොටසක් සිදු කර තිබෙන්නේ අපේ ආණ්ඩුවයි. රටේ බහුතරයක් වන කාන්තාවන්, දේශපාලන, ආර්ථික සහ සමාජයීය ඇතුලූ සියලූ අංශයන්ගෙන් බලගැන්විය යුතුයි.” අගමැතිවරයා 26 අඟහරුවාදා අරලියගහ මන්දිරයේ පැවැති ධනාභිමානී කාන්තා සම්මේලනය අමතමින් පැවසීය.
ප්‍රාදේශීය සභා මට්ටමින් කාන්තා නියෝජනය වැඩි කිරීම සඳහා එක්සත් ජාතික පක්‍ෂය පියවර ගත් අවස්ථාවේ ඇතැම් පාර්ශ්ව ඊට විරුද්ධ වු බව සිහිපත් කළ අගමැතිවරයා කාන්තා නියෝජනය 25% දක්වා වැඩි කර ගැනීමට හැකි වී තිබෙන අතර එය කාන්තාවන් ලැබූ විශාල ජයග්‍රහණයක් බව ද සඳහන් කළේය.
පළාත් සභාවල සහ ප්‍රාදේශීය සභාවල කාන්තා නියෝජනය නිසි පරිදි තිබේ නම් පාර්ලිමේන්තුවටත් එම නියෝජනය තෝරාගැනීම අසීරු කටයුත්තක් නොවන බවද අගමැති රනිල් වික්‍රමසිංහ වැඩි දුරටත් පෙන්වා දුන්නේය.
Facebook Comments
