පස් වසරකට ඉහතී දී වැලිකඩ බන්ධනාගාරයේ විසි හත් දෙනකු ඝාතනය කිරීමේ සිද්ධියට අදාළව එම සිද්ධියෙන් මරණයට පත්වුවන්ට සහ තුවාළ ලැබුවන් හට වන්දි ලබා දීමට රජය ගත් පියවර සාධනීය බව පවසන බන්ධනාගාර රැඳැවියන්ගේ අයිතිවාසිකම් සුරැකීමේ සංවිධානය යහපාලන රජයෙන් ඉල්ලා සිටින්නේ වන්දී දීමෙන් පමණක් නොනැවති මෙම ඝාතන වලට අදාළ වැරදිකරුවන් හට දඬුවම් දෙන ලෙසටයි.
වන්දි ලබා දීමෙන් පමණක් වින්දිතයන්ට සාධාරණය ඉටු නොවන බවත් නියම සාධාරණයට ඉටු වීමට නම් සැබෑ වරදකරුවන්ට දඬුවම් ලබා දිය යුත් බවට එම සංවිධානයේ නීතිවේදී සේනක පෙරේරා අවධාරණය කර සිටියේ සිලෝන් ජර්නල්ස් හා සාකච්ඡාවකට එක්වෙමිනි.
සිද්ධිය සම්බන්ධව සොයා බැලීම සඳහා යහපාලන රජය විසින් පත් කරන ලද විමර්ශන කමිටු වාර්තාව විශ්‍රාම ලත් විනිසුරු නිමල් නම්බුවසම් අගමැති රනිල් වික්‍රමසිංහ හමුවේ අධිකරණ අමාත්‍ය විජයදාස රාජපක්ෂ වෙත භාර දෙන ලද්දේ 2015 ජුනි මාසයේදී වන අතර එය මෙතෙක් ප්‍රසිද්ධියට පත් නොකිරීම නීතිවේදී සේනකගේ දැඩි දෝෂ දර්ශනයට ලක් විය.
සැලසුම් කරන ලද ඝාතනයක්
වන්දි ලබා දීමට එම කමිටුව විසින් කරන ලද නිර්දේශ පිළිබඳවද තම සංවිධානය සෑහීමකට පත් නොවන බව පවසන ඔහු චෝදනා කරන්නේ විශේෂ කාර්ය බලකාය නීති විරෝධී ලෙස බන්ධනාගාරය තුළට ඇතුල් වී රැඳවියන් ප්‍රකෝප වන ලෙසට හැසිරී ගැටුමක් නිර්මාණය කල බව සහ මෙය සැලසුම් කරන ලද සමුල ඝාතනයක් බවට සාක්ෂී තිබියදී කමිටුව විසින් වන්දි ලබා නොදිය යුතු බවට රැඳවියන් නම් කිරීම අසාධාරණ බවටයි.
මෙම සිද්ධියට සම්බන්ධ පුද්ගලයන් වහා අත්අඩංගුවට ගන්නා ලෙසට නීතිපති වෙත රිට් අඥාවක් නිකුත් කරන ලෙස ඉල්ලා ඉදිරියේදී බන්ධනාගාර රැඳැවියන්ගේ අයිතිවාසිකම් සුරැකීමේ සංවිධානය විසින් ශ්‍රේෂ්ඨාධිකරණයට පෙත්සමක් ගොණු කිරීමට බලාපොරොත්තු වන බවද නීතිවේදී සේනක පෙරේරා සිලෝන් ජර්නල්ස් වෙත පැවසීය.
වැලිකඩ සිරගෙදරට සන්නද්ධව කඩා වැදුණු රජයේ ආරක්ෂක හමුදා සහ සිරකරුවන් අතර 2012 නොවැම්බරයේ ගැටුමකින් මියගිය අයට අමතරව හතළිහකට නොඅඩු පිරිසකට තුවාල සිදුවු අතර බන්ධනාගාරයේදී විසි හත් දෙනකු ඝාතනය කරන අවස්ථාවේ එහි සිටි ප්‍රධාන සාක්ෂි කරුවකුට ද පසුගිය වසරේ මරණිය තර්ජනයක් එල්ලවී තිබුනි.
Facebook Comments
