‘එක් ආගමකට මුල් තැන දීමට ජනාධිපති එකඟ නෑ’ සුමන්දිරන් (VIDEO)

0

අලුත් ආණ්ඩු ක්‍රම ව්‍යවස්ථාවෙන් බුදු දහමට මුල් තැන දීමට දෙමළ ජාතික සන්ධානය එකඟ වී ඇතැ’යි අගමැතිවරයා කරන ප්‍රකාශය තරයේ ප්‍රතික්ෂේප කරන ආණ්ඩුක්‍රම ව්‍යවස්ථා මණ්ඩලයේ මෙහෙයුම් කමිටු සාමාජික එම්ඒ සුමන්දිරන් මන්ත්‍රීවරයා ජනාධිපතිවරයා පවා ජාතියකට හෝ ආගමකට ප්‍රමුඛස්ථානය දීමට අකමැත්ත පල කොට තිබෙන බව පවසයි.

දෙමළ ජාතික සන්ධානය තිරසාරව පෙනී සිටින්නේ කිසිදු ආගමකට විශේෂ පිළිගැනීමක් හිමි නොවන අනාගමික ව්‍යවස්ථාවක් වෙනුවෙන් බව සුමන්දිරන් මන්ත්‍රීවරයාතරයේ කියා සිටියේ ගගන සමග විශේෂ සාකච්ඡාවකට එක්වෙමිනි.

“පාර්ලිමේන්තුව ව්‍යවස්ථා සම්පාදක මණ්ඩලයක් බවට පත් කරන යෝජනාව ජනවාරි 9 දා සභාගත කළ අවස්ථාවේ ජනාධිපතිවරයා පැහැදිලිවම කියා සිටියේ ජාතියකට හෝ ආගමකට ව්‍යවස්ථාවේ මුල් තැන දීම සුදුසු නැති බව,” යයිද දෙමළ ජාතික සන්ධාන මන්ත්‍රී සුමන්දිරන් කියා සිටියේය.

අගමැතිවරයා වැරදියි

සති අන්තයේ කොලොන්නාවේ පැවති බෞද්ධ උත්සවයක් අමතා අගමැති රනිල් වික්‍රමසිංහ පවසා තිබුනේ ව්‍යවස්ථාවෙන් බුද්ධාගමට දී ඇති මුල් තැන එලෙසම පවත්වාගෙන යාමට දෙමළ ජාතික සන්ධානය ඇතුළු පාර්ලිමේන්තුවේ සියලුම පක්ෂ එකඟවී සිටින බවයි.

ව්‍යවස්ථා සම්පාදනය සඳහා පිහිටුවා ඇති පාර්ලිමේන්තු මෙහෙයුම් කමිටුවේ සභාපති ද වන අගමැති වරයාගේ ප්‍රකාශය සත්‍යයෙන් තොර බව පවසන සුමන්දිරන් මන්ත්‍රීවරයා පෙන්වා දෙන්නේ ආගම පිලිබඳ කාරණය මෙහෙයුම් කමිටුවේ විසින් මේතාක් සාකච්ඡාවට පවා ගෙන නැති බවයි.

දැනට සාකච්ඡාවට ගෙන ඇත්තේ මැතිවරණ ක්‍රමය, විධායක බලතල හා බලය විමධ්‍යගත කිරීම යන මාතෘකා තුන පමණක් බවයි ඔහු ගගන හා කියා සිටියේ.

TNA දැඩි විරෝධය

ජාති, ආගම්, කුල, ලිංග හෝ වයස ආදී කිසිදු භේදයක් නොතකා සැමට සමානත්වය සහතික කරන බව පැවසෙන ව්‍යවස්ථාවක් මගින් එක් ආගමකට පමණක් විශේෂ කොට සැලකීම TNA මන්ත්‍රීවරයා විසින් හඳුන්වන ලද්දේ ‘මුළුමනින්ම පරස්පර විරෝධී, නොගැලපෙන සහ විරුද්ධ සංකල්පයක් රිංගවීමට’ දරන උත්සාහයක් ලෙසිනි.

අලුත් ව්‍යවස්ථාව අනාගමික කරනු වෙනුවට වර්තමානයේ පවතින ආකාරයෙන්ම අනාගත ශ්‍රී ලංකා රාජ්‍යයේත් එක් ආගමකට ප්‍රමුඛස්ථානය දීමට ගන්නා උත්සාහයට දෙමළ ජාතික සන්ධානය දැඩි සේ විරුද්ධ වන බව එම් ඒ සුමන්දිරන් මන්ත්‍රීවරයා අවධාරණය කළේය.

ව්‍යවස්ථා සම්පාදනය සම්බන්ධයෙන් තමන් නියෝජනය කරන ප්‍රජාව නොමග යවන ප්‍රකාශ දේශපාලකයන් විසින් කිරීම ගැන විපක්ෂ නායකයා පසුගියදා අනතුරු අඟවා සිටියේය.

“ගෞරවනීය, පිළිගත හැකි සහ සෑහීමකට පත් විය හැකි ව්‍යවස්ථාවක් එකිනෙකා රවටා ගනිමින් සම්පාදනය කළ නොහැකි,” බව විපක්ෂ නායක ආර් සම්බන්ධන් ත්‍රිකුණාමලයේ යහපාලනය සඳහා කාන්තාවෝ සංවිධානයේ නියෝජිත පිරිසක් අමතා කියා තිබුනි.

අගමැති රනිල් වික්‍රමසිංහගේ නායකත්වයෙන් යුත් මෙහෙයුම් කමිටුවේ සෙසු සාමාජිකයන් වන්නේ ආර් සම්පන්දන්, ලක්ෂ්මන් කිරිඇල්ල, නිමල් සිරිපාල ද සිල්වා, රවුෆ් හකීම්, විජයදාස රාජපක්ෂ, සුසිල් ප්‍රේමජයන්ත, රිසාඩ් බදියුදීන්, පාඨලී චම්පික රණවක, ඩී. එම්. ස්වාමිනාදන්, මනෝ ගනේෂන්, මලික් සමරවික්‍රම මහතා, අනුර දිසානායක, ඩිලාන් පෙරේරා, දිනේෂ් ගුණවර්ධන, ජයම්පතී වික්‍රමරත්න, එම්. ඒ. සුමන්තිරන්, බිමල් රත්නායක, ප්‍රසන්න රණතුංග, හා ඩග්ලස් දේවානන්ද යන මැති ඇමතිවරුන් සහ තුසිතා විජේමාන්න මන්ත්‍රී වරියයි.

(Radiogagana)

Facebook Comments

wedding people