ජගත් ජයසුරිය පලා යාමෙන් යුද අපරාධ නඩු වලට තවත් පහසුයි

උතුරු යුද්දයේ අවසාන අදියරට නායකත්වය දුන් හිටපු හමුදාපතිවරයකුට එරෙහිව යුද අපරාධ චෝදනා ගොණුකිරීම හමුවේ ඔහු සිය තානාපති ධුරය දමා පලාගොස් තිබේ.

සත්‍යය හා යුක්තිය පිළිබඳ ජාත්‍යන්තර ව්‍යාපෘතිය (ITJP) හා එහි ලතින් ඇමරිකානු හවුල්කාර සංවිධාන පහක් විසින් බ්‍රසීලයේ බ්‍රසීලියා නගරයේ හා කොලොම්බියාවේ බොගෝටා නුවරදී 28 සඳුදා ජෙනරාල් ජගත් ජයසූරියට එරෙහිව මෙසේ නඩු පවර ඇති බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) පවසයි.

ජෙනරාල් ජයසූරිය වෙත හිමිව ඇති රාජ්‍ය තාන්ත්‍රික මුක්තිය ඉවත් කරගැනීමේ තර්ජනය හමුවේ ඔහු ඉරිදා (27)දී ඩුබායි නගරය හරහා ශ්‍රී ලංකාවට පලාගොස් ඇති බවට විශ්වාසදායක තොරතුරු ලැබී ඇතැයි ජේඩීඑස් නිවේදනය කර තිබේ.

පලා යාම නඩුවට පහසුවක්

“ඔහු බ්‍රසීලයෙන් පලා ගියාට කමක් නෑ, නඩුව පටන් ගත්තා විතරයි,ඔහු දැන් අපේ කටයුත්ත පහසු කර තිබෙනවා. මොකද පලා යාමෙන් සිදුවන්නේ තිබුණු දණ්ඩ මුක්තියත් නැතිවීම පමණයි.” යි යනුවෙන් නඩු පැවරීම සම්බන්ධීකරණය කළ ස්පාඤ්ඤ නීතිපති කාලෝස් කස්ත්‍රසේනා ෆර්නන්දෙස් සඳහන් කරයි.

යුද්ධයේ අවසන් අදියරේ දී උතුරේ ආරෝග්‍යශාලා ඉලක්ක කරගනිමින් ප්‍රහාර එල්ල කළ, ඝාතන සිදු කළ, දහස් ගණනක් ජනතාව අතුරුදහන්කිරීමට සහ හිංසනයට ලක් කළ හමුදා බලසේනා ජගත් ජයසුරියගේ අධීක්ෂණය යටතේ ක්‍රියාත්මක වූ බව ඔහුට එල්ල වී ඇති චෝදනා වේ.

ශ්‍රී ලංකාවට අවස්ථාව

තමන්ගේ නිර්දෝෂීභාවය පිළිබඳව ඔහු අවංකව විශ්වාස කළේ නම් ස්වකීය තනතුරේ රැඳී සිටිමින් අධිකරණ ක්‍රියාමාර්ගයට මුහුණදීමට ජෙනරාල් ජයසූරිය කටයුතු කළ යුතුව තිබුණා. නීතියේ ආධිපත්‍යය සහ වගඋත්තරදායකත්වය පිළිබඳ ශ්‍රී ලංකාව සැබැවින්ම කැප වී ක්‍රියා කරන්නේ නම් ඔහුට විරුද්ධව චෝදනා ගොණුකිරීමට අවස්ථාව මෙය”යැයි ITJP සංවිධානයේ විධායක අධ්‍යක්‍ෂ හා දකුණු අප්‍රිකානු මානව හිමිකම් නීතිඥවරියක වන යස්මින් සූකා අවධාරණය කරයි.

හිටපු හමුදාපතිවරයා වන්නි මෙහෙයුම් අණදෙන නිලධාරියා ලෙස කටයුතු කළ 2007 සිට 2009 කාල පරිච්චේදය තුල 100,000 කට අධික සංඛ්‍යාවක් ඝාතනය වුයේ යැයි ගණන් බලා ඇති බව අපරාධ නඩුවේ ප්‍රකාශ වී තිබෙන අතර අවසන් යුද සමය තුල සාමාන්‍ය වැසියන් 70,000ක් අඩුම වශයෙන් ජීවිතක්ෂයට පත් වී ඇති බව එක්සත් ජාතීන් ගේ වාර්තා පෙන්වා දෙයි.

බ්‍රසීලය ඇතුළුව කොලොම්බියාව, පේරු, චිලි, ආර්ජන්ටිනා සහ සුරිනාම් යන රටවල් වල තානාපති ධුරයට හිටපු හමුදාපති ජගත් ජයසුරිය පත් කරන ලද්දේ මෛත්‍රිපාල සිරිසේන ජනාධිපතිවරයා විසිනි.