අතුරුදහන් කළ’වුන්ගේ ඥාතීන්ට බැංකුව නොසලකන්නේ ඇයි?

බලහත්කාරයෙන් අතුරුදහන් කරනු ලැබූවන් ගේ ඥාතීන්ට ගනුදෙනු කරගැනීමට නොහැකිවන ආකාරයට බැංකු විසින් පනවා ඇති බාධා ඉවත් කිරීමට ගන්නා පියවර නියමිත දිනට දැනුම් දීමට ශ්‍රී ලංකා මහ බැංකුව අසමත්ව සිටී.

අතුරුදහන් තැනැත්තන් පිළිබඳ කාර්යාලය නිකුත් කර ඇති දක්නට නොමැති බවට වන සහතිකය බැංකු විසින් ප්‍රතික්ෂේප කිරීමෙන් යුද පීඩිත වන්නියේ අතුරුදහන් පුද්ගලයන්ගේ ඥාතීන්ගේ ගනුදෙනු අවහිර වීම වැලැක්වීමට කඩිනමින් ගන්නා පියවර ඇතුලත් විස්තර වාර්තාවක් සපයන ලෙස ශ්‍රී ලංකා මානව හිමිකම් කොමිසම මහ බැංකු අධිපතිට නියම කර තිබුණි.

ඒ සඳහා ශ්‍රී ලංකා මානව හිමිකම් කොමිෂන් සභාවේ ලේකම් රන්ජිත් උයන්ගොඩ ශ්‍රී ලංකා මහ බැංකු අධිපති ආචාර්ය පී. නන්දලාල් වීරසිංහට යවන ලද ලිපියකින් ඉල්ලා තිබුනේ ශ්‍රී ලංකා මානව හිමිකම් කොමිෂන් සභාවේ පර්යේෂණ හා අධික්ෂණ අංශයේ අධ්‍යක්ෂ වෙත එම වාර්තාව එවන ලෙසයි.

කෙසේවෙතත්, නියම කර තිබූ අවසන් දිනය වූ 2025.01.14 වන විටත් වාර්තාව ලබා දී නොමැති බව හෙළි වී තිබේ. දින නියමයෙන් දිනකටත් පසුව ශ්‍රී ලංකා මහ බැංකුව විසින් එම ඉල්ලීම සම්බන්ධයෙන් ක්‍රියාත්මක වීම ආරම්භ කිරීම ඊට හේතුව බව පෙනී යයි.

“මුලතිව් දිස්ත්‍රික්කයේ ජනතාවගේ මානව හිමිකම් ආරක්ෂා කිරීම සම්බන්ධයෙන් සිදු කරනු ලැබු නිරීක්ෂණ චාරිකාව සම්බන්ධයෙන්” මැයෙන් 2025 ජනවාරි 02 වැනිදා වැනිදා යොමු කළ ලිපියේ වැඩි දුරටත් සඳහන්ව තිබුනේ මානව හිමිකම් කොමිෂන් සභාව පසුගිය වසර අවසානයේ මුලතිව්හි කරන ලද නිරීක්ෂණයකදී යුද පීඩිත දෙමළ වැසියන් පෙලන මෙම ගැටළුව හදුනා ගත් බවයි.

“පසුගිය දෙසැම්බර් මාසයෙහි ශ්‍රී ලංකා මානව හිමිකම් කොමිෂන් සභාවේ නිලධාරීන් කණ්ඩායමක් මුලතිව් ප්‍රදේශයේ නිරීක්ෂණයක් සිදු කළ අතර එහිදී හදුනාගත් විශේෂ කරුණක් වුයේ අතුරුදහන් වු පුද්ගලයින් සදහා වු කාර්යාලය මගින් නිකුත් කරන අතුරුදහන් වු පුද්ගලයින් වෙනුවෙන් ලබාදෙන සහතිකය බැංකු කටයුතු සිදුකිරීමේදී බැංකු මගින් නොසලකා හැර කටයුතු කිරීමයි. එබැවින් ඔවුන්ගේ පවුල් වල ඥාතීන් හට බැංකු කටයුතු වලදී අපහසුතා රැසකට මුහුණ පෑමට සිදු වේ.”

එයට හේතු සෙවීමට ශ්‍රී ලංකා මහ බැංකුව විසින් මුල් පියවර තබා ඇත්තේ ශ්‍රී ලංකා බැංකු කරුවන්ගේ සංගමය වෙත ජනවාරි 15 වැනිදා ඊමේල් පනිවිඩයක් යවමිනි. ඒ සම්බන්ධයෙන් බැංකු වෙතින් කරුනු විමසා ජනවාරි 21 වැනි දිනට පෙර පිළිතුරු සපයන ලෙස එමගින් ඉල්ලා තිබේ.

එදිනම ශ්‍රී ලංකා බැංකු කරුවන්ගේ සංගමය විසින් ශ්‍රී ලංකාවේ රාජ්‍ය හා පෞද්ගලික සියළු බැංකු ප්‍රධානින් වෙත ඊමේල් පනිවිඩයක් මගින් දැනුම් දී ඇත්තේ, දක්නට නොමැති බවට වන සහතිකය වලංගු ලියවිල්ලක් ලෙස පිලි නොගැනීමට හේතුව මෙන්ම අතුරුදහන් වූවන් සහ ඔවුන්ගේ පවුල් වල සාමාජිකයන්ට බැංකු කටයුතු සිදු කර ගැනීම සදහා දක්නට නොමැති බවට වන සහතිකය වෙනුවට බැංකුවෙන් ඉල්ලා සිටින වෙනත් ලියවිලි කවරේද යන්න ජනවාරි 20 වැනි දිනට පෙර එම තොරතුරු ලබා දෙන ලෙසයි.

මහ බැංකුවේ හේතු දැක්වීම පමා වන බවට දැනුම් දී ඇතිදැයි විමසීමට ශ්‍රී ලංකා මානව හිමිකම් කොමිෂන් සභාවේ පර්යේෂණ හා අධික්ෂණ අංශයේ නියෝජිතයකු සම්බන්ධ කරගැනීමට අප දැරු උත්සාහය පළ දැරුවේ නැත.