දහස් සංඛ්‍යාත සාමාජිකත්වයකින් යුත් කිලිනොච්චියේ ගොවි සංවිධානයක සිදුවන මුල්‍ය අපරාධ හෙළි කළ මාධ්‍යවේදියකුට පහර දුන් සැකකරුවකු ඇප මත මුදා හැරීමට අධිකරණය නියෝග කර තිබේ.
සිය නිවසටම පැමිණ තමාට පහර දුන් පුද්ගලයන් දෙදෙනා සම්බන්ධයෙන් තොරතුරු මාධ්‍යවේදියා විසින් පොලීසියට ලබා දී ඇතත් පොලිස් අත්අඩංගුවට ගෙන අධිකරණයට ඉදිරිපත් කර ඇත්තේ ඉන් එක් අයකු පමණකි. පොලිසිය පවසන්නේ එය ‘අතපසුවීමක්’ බවයි.
2025 ජනවාරි 15 වැනිදා උදෑසන යතුරු පැදි දෙකකින් නිදහස් මාධ්‍යවේදී සුබ්‍රමනියම් බාස්කරන්ගේ කිලිනොච්චියේ පිහිටි නිවසට පැමිණි ප්‍රහාරකයන් දෙදෙනා ඔවුන්ගේ හෙල්මට් වලින් පහර දී මාධ්‍යවේදියාගේ නිවසේ ගේට්ටුවද කඩා බිඳ මාධ්‍යවේදියාට ද පහර දී පිටව ගොස් තිබුනි.
එදිනම සිය නිවසට පැමිණි පොලිස් නිලධාරීන් හමුවේ මාධ්‍යවේදියා පැමිණිලි කර ඇත්තේ ඉරණමඩු කෘෂිකර්ම සම්මේලනයේ භාණ්ඩාගාරිකගේ පුත් පී කුරලිනියන් සහ ඉරණමඩු කෘෂිකර්ම සම්මේලනය යටතේ පවතින කුඹුරුවල වෙල් විදානේ මෙලෙස තමාට පහර දුන් බවයි.
සුබ්‍රමනියම් බාස්කරන් පවසන පරිදි එම පහර දීමට හේතු වී ඇත්තේ තොරතුරු දැනගැනීමේ පනත යටතේ තමා විසින් ගොවි ජන සංවර්ධන දෙපාර්තමේන්තුවෙන් ලබා ගත් තොරතුරු ආශ්‍රයෙන් කිලිනොච්චියේ ගොවි සමිතියක මහා පරිමාන මුල්‍ය වංචා ජනමාධ්‍ය ඔස්සේ හෙළි කිරීමයි.
මාධ්‍යවේදියා පවසන්නේ තොරතුරු දැනගැනිමේ පනතට අනුව තමන් ලබා ගත් තොරතුරු වල සදහන් පරිදි හත් දහසක සාමාජිකාවන් සංඛ්‍යාවක් සිටින ඉරණමඩු කෘෂිකර්ම සම්මේලනයේ භාණ්ඩාගාරය සතු වත්කම රුපියල් මිලියන 37 ක් බවයි. ඔවුන් එම සංගමය නිසි පරිදි ලියාපදිංචි කිරීමක් සිදු කර නොමැති අතර එම සාමාජික මුදල් බැංකු ගිනුමක තැන්පත් කර නොමැතිවාක් සේම ගොවි ජන සංවර්ධන දෙපාර්තමේන්තුවට විගණන වාර්තා ලබා දී නොමැති බවටත් ඔහු වාර්තා කර තිබේ.
පසුගිය වසරේ නොවැම්බර් මාසයේදී සිය මිතුරකු සමග එක්ව ජනමාධ්‍ය ආයතන කිහිපයකටම සිදු කළ වාර්තාකරණයේදී ඔහු තව දුරටත් හෙළි කර ඇත්තේ ඉරණමඩු කෘෂිකර්ම සම්මේලනය යටතේ පවතින වගා බිම් වල වෙල් විදානේ රාජකාරිය සදහා පත් කර සිටින තැනැත්තාට දිනකට ගෙවිය යුත්තේ රුපියල් 750 ක් පමණක් නමුත් පසුගිය වසරේ එක් මාසයකට රුපියල් එක් ලක්ෂ පහලොස් දහස බැගින් මාස නමයක කාලයක් ඉරණමඩු කෘෂිකර්ම සම්මේලනය විසින් ඔහුට දීමනා ගෙවා ඇති බවයි.
එම දීමනා ගෙවා ඇත්තේ ඉරණමඩු කෘෂිකර්ම සම්මේලනයේ සාමාජිකයන්ගේ දැනුවත් භාවයකින් තොරව බව පවසන නිදහස් මාධ්‍යවේදී සුබ්‍රමනියම් බාස්කරන් විශ්වාස කරන්නේ එම තොරතුරු අනාවරණය කිරීම නිසා තමන්ට මෙලෙස ප්‍රහාරයට ලක් වීමට සිදු වු බවයි.
නිවසට පැමිණ තමාට පහර දුන් දෙදෙනාගේම විස්තර මාධ්‍යවේදියා පොලීසියට ලබා දුන්නද කිලිනොච්චි පොලීසිය විසින් අත්අඩංගුවට ගෙන ජනවාරි 16 වැනිදා අධිකරණයට ඉදිරිපත් කර ඇත්තේ වෙල් විදානේ රාජකාරිය සිදු කරන තැනැත්තා පමණි.
ඔහු ඇප මත නිදහස් කිරීමට නියෝග කළ කිලිනොච්චි මහේස්ත්‍රාත් වරයා එම නඩුව ජුලි 02 වැනිදා යළි කැදවීමට නියෝග කර තිබේ.
තමාට පහර දුන් එක් අයකු පමණක් අධිකරණයට ඉදිරිපත් කිරීමට හේතුව කුමක්දැයි, නඩු විභාගය අවසන් වීමෙන් පසු මාධ්‍යවේදියා පොලීසියෙන් විමසා ඇති අතර පොලීසිය පවසා ඇත්තේ වාර්තා සකස් කිරීමේදී පොලීසිය අතින් අතපසුවීමක් සිදුව ඇති අතර අනෙක් තැනැත්තාද වහාම අත්අඩංගුවට ගෙන අධිකරණයට ඉදිරිපත් කිරීමට කටයුතු කරන බවයි.
Facebook Comments
