පාස්කු ප්‍රහාර පරීක්ෂණ විවේචනය කරන අයට ‘නීතියෙන් දඬුවම්’

පාස්කු ඉරුදින ප්‍රහාරය ගැන විමර්ශන, විවේචනය කරන පුද්ගලයන්ට එරෙහිව නීතිමය පියවර ගැනීමට පොලිස්පති සැරසෙයි.

දැනට කර ඇති පරීක්ෂණ ගැන අගරදගුරු මැල්කම් රංජිත් කාදිනල් හිමියන් විවේචනය කිරීමත්, චුදිත පොලිස් නිලධාරින් දෙදෙනෙක් නාහිමිවරුන් හමුවේ සිය දුක්ගැනවිල්ල කියා සිටීමෙන් අනතුරුව පාස්කු ප්‍රහාර පරීක්ෂණ ගැන විශේෂ ප්‍රකාශයක් කරමින් “ ඇතැම් පිරිස් ප්‍රකාශ කර ඇති කරුණු සත්‍යතාවයෙන් තොර හුදු ප්‍රකාශ බවට පරීක්ෂණ වලදී තහවුරු වුණා. මතක හා තර්ක ඉදිරිපත් කළ යුත්තේ අධිකරණයේ දී නීතිමය කටයුතු බලට අදාළ කර ගත හැකි අයුරින්“ යැයි පොලිස්පති සී.ඩි වික්‍රමරත්න පවසයි.

කොළඹ අගරදගුරු නිවසේ 13 වැනි සිකුරාදා මාධ්‍යවේදීන් ඇමතූ අගරදගුරු මැල්කම් රන්ජිත් කාදිනල් කියා සිටියේ “ සොනික් “ නම් රාජ්‍ය බුද්ධි අංශ නිලධාරියෙක් මාතලේ සහරාන් ලවා ඉන්දුනීසියාවේ කිසිවෙකුට දුරකතනයෙන් අමතා පාස්කු ප්‍රහාරයේ වගකීම බාරගන්නා ලෙස බල කර සිටි බවය.

ඒ අනුව ප්‍රහාරයේ වගකීම අයි,එස් අයි එස් සංවිධානයේ උරමත තබන්නට මෙතරම් උනන්දුවක් ගන්නේ කුමක් නිසා ද යන්න ගැටළුවක් බව කියන කාදිනල් හිමි “ යුද හමුදා බුද්ධි අධ්‍යක්‍ෂක මේ සහාරාන් හෂීම් ගේ කණ්ඩායමත් එක්ක යම් යම් ගනු දෙනු තිබිලා තියෙනවා ඒ මොනවද කියල අපිට ප්‍රශ්නයක් මතු වෙනවා. ආමි මොහිදීන් හරහා තිබුණු ගනු දෙනු මොනවා ද කියල පාස්කු කොමිසන් සභාවේත් සඳහන් වෙලා තියෙනවා. එත් ඒවා විමර්ෂණය කළා ද? වවුනතිව් පොලිස් නිලධාරින් දෙදෙනෙක් ඝාතනය කිරීම පිටුපස කතාව විමර්ශණය කළා ද ? ටාජ් සමුද්‍ර හෝටලයේ දී බෝම්බ පුපුරවා ගැනීමට පැමිණි ජමිල් සමඟ ගනුදෙනු කළ හමුදා බුද්ධි නිලධාරියා කවුද ?“ යැයි ප්‍රශ්න කරමින් ආණ්ඩුවට චෝදනා කළේය.

“ පොඩි මාළුන් දැලට අහුකරගෙන තෝරු මෝරුන්ට නිදහසේ යන්න දීලා“ යනුවෙන් පාස්කු ප්‍රහාරය ගැන 25 දෙනෙකුට නඩු පැවරීම ගැන සිය අදහස් දැක්වූ අගරදගුරු මැල්කම් රංජිත් කියා සිටියේ මේ විමර්ශන ගැන කතෝලික සභාවට ප්‍රශ්නයක් ඇති බවය.

“පොලිස් පරීක්ෂණ වලින් සැකපිට අත් අඩංගුවට ගත් පුද්ගලයින් 723 කගෙන් 311 දෙනෙක් තවමත් රිමාන්ඩ් බාරයේ සිටිනවා, රුපියල් මිලියන 360 මුදල් රාජසන්තක කර තවත් රුපියල් මිලියන 168 ක දේපොළ තහනම් කර තිබෙනවා.“ පැවසූ පොලිස්පති “ සැකකරුවන් 46 දෙනෙකුට එරෙහිව මහාධිකරණයේ අධිචෝදනා 11 ක් ගොනු කර තිබෙනවා“ යැයි ද පොලිස්පති පවසයි.

මහජනතාවගේ අදහස් ප්‍රකාශන අයිතියට ගරු කරන බව පවසන පොලිස්පති වික්‍රමරත්න “ පොලිසියේ විමර්ශනයෙන් පසු පවරා ඇති නඩු වලට අගතියක් වන නිසා ඒවා විවේචනය හා හෑල්ලු කිරීම ගැන නීතිමය පියවර ගැනීම කෙරෙහි සැලකිල්ල දක්වනවා“ යනුවෙන් අනතුරු අඟවයි.

පාස්කු ප්‍රහාරය ගැන කිසියම් පාර්ශවයකට යම් අදහසක් තහවුරු කිරීමට හැකියාවක් ඇත්නම් අපරාධ පරීක්ෂණ දෙපාර්තමේන්තුවට පැමිණ කරුණු ඉදිරිපත් කරන ලෙස ද පොලිස්පති ඉල්ලා සිටී.

පාස්කු ඉරුදින ප්‍රහාරය ගැන විමර්ශනයට පත් කළ ජනාධිපති කොමිසම චුදිතයන් ලෙස නම් කළ නියෝජ්‍ය පොලිස්පතිවරුන් වන නන්දන මුණසිංහ හා දේශබන්දු තෙන්නකෝන් තමන් ඉන් ගලවා ගන්නා ලෙස නා හිමිවරුන් වෙත කන්නලව් කිරීම ගැන විශ්‍රාමික රාජ්‍ය හා පොලිස් නිලධාරින් ප්‍රශ්න කර තිබිණි. ඒ ගැන පොලිස් පති හා පොලිස් කොමිසම පරීක්ෂණ පවත්වා නීතිමය පියවර ගත යුතු බව ඔව්හු අවධාරණය කළහ.

නියෝජ්‍ය පොලිස්පතිවරුන් දෙදෙනා නා හිමිවරුන් මුණ ගැසීමට තමන්ගේ අවසරය ලබා දුන්නේද යන්න පොලිස්පති සිය ප්‍රකාශයේ සඳහන් නොකළේය.