කිරි ගොවීන් වසර ගණනාවක සිට ගවයන්ට කැවීම සඳහා භාවිත කළ තණ බිම් සිංහල ගොවීන් පිරිසක් බලහත්කාරයෙන් අත්පත්කරගනිමින් වගා කිරීම නිසා තමන් දිනෙන් දින මහත් අපහසුතාවයකට පත් වෙමින් සිටින බවට නැගෙනහිර පළාතේ දෙමළ කිරි ගොවීහු චෝදනා කරති.
ඔවුන් පෙන්වා දෙන්නේ සිය ගවයන්ට තණකොළ කෑම සදහා රජය විසින් වෙන් කර තිබු ඉඩම් ප්‍රමාණයෙන් හතරෙන් එකක පමණ භුමි භාගයක් සිංහල ගොවීන්ගේ වගා කටයුතු වෙනුවෙන් යොදා ගැනීම නිසා ඉදිරි මාස කිහිපය තුලදී මෙම තත්වය වඩාත් උග්‍ර වන බවයි.
පළාත් බද මාධ්‍යවේදීන් පවසන්නේ ත්‍රිකුණාමලය දිස්ත්‍රික්කයේ කන්තලේ, කින්නියා, තම්බලගාමම් සහ මුල්ලිපොත්තානෙයි ආදී ගම්වල කිරි ගොවීන්ට සිය ගවයන්ට තණ කැවීම සදහා කන්තලේ සීනි කම්හල ආසන්නයේ ඉඩම් අක්කර 2000 ක භුමියක් රජය විසින් වෙන් කර තිබු බවයි.
කිරි ගොවීන්ගෙන් වැඩි පිරිස දෙමළ ජාතිකයන් වන අතර මුස්ලිම් සහ සිංහල කිරි ගොවීන් කිහිප දෙනෙකුද වේ.
නමුත් මේ වන විට එම අවට ගම්වල වාසය කරන සිංහල ජනතාව රජයේ කිසිදු අවසරයකින් හෝ අනුදැනුමකින් තොරව කෘෂිකාර්මික වගා කටයුතු වෙනුවෙන් ඉඩම් අක්කර 500 ක් පමණ භාවිත කර ඇති බව වාර්තාකරුවන් වැඩි දුරටත් පෙන්වා දෙයි.
තමුන් මුහුණ දී සිටින අපහසුතාවය පිළිබදව පොලිසියට පැමිණිල කළද ඒ සම්බන්ධයෙන් පොලිසිය කිසිදු ක්‍රියාමාර්ගයක් නොගන්නා බවට චෝදනා කරන දෙමළ කිරි ගොවීන් පෙන්වා දෙන්නේ යම් හෙයකින් තමන්ගේ ගවයකු ගොවීන්ගේ වගා භුමි පාළු කළහොත් ඊට වන්දි ගෙවන ලෙස පොලීසිය නියෝග කරන බවයි.
සිංහල ගොවීන් විසින් තමන්ගේ ගවයන් සොරාගෙන මස් පිනිස ඝාතනය කර ඇති බවටත් චෝදනා කරන දෙමළ කිරි ගොවීන් වැඩි දුරටත් පවසන්නේ තෘණ භුමියේ ඉඩම් අල්ලාගෙන ගොවිතැන් කටයුතු වල නිරතවී සිටින සිංහල ගොවීන් නිසා තමන් නිරන්තරයෙන් පීඩාවට පත් වන බවයි.
මෙම ගැටළුවට විසදුම් ලබා දීම සදහා වහාම මැදිහත් වන ලෙස ඔවුහු රජයේ බලධාරීන්ගෙන් ඉල්ලා සිටි.
Facebook Comments
