ඩයලොග් බ්‍රෝඩ් බෑන්ඩ් සමාගම සතුවූ රහස්‍ය තොරතුරු ලබාගත් ආකාරය පිළිබඳව කරුණු දක්වන ලෙස කොළඹ වාණිජ අධිකරණය ශ්‍රී ලංකා ටෙලිකොම් සමාගමට නියෝග කර තිබේ.
නීතිවිරෝධී සහ සදාචාර විරෝධී ලෙස තම බ්‍රෝඩ් බෑන්ඩ් සමාගම සතු තොරතුරු ලබාගත් බවට චෝදනා කරමින් ඩයලොග් සමාගම විසින් ශ්‍රී ලංකා ටෙලොකොම් සමාගමට විරුද්ධව පසුගිය ජුලි 18 වෙනි දින වාණිජ උසාවියේදී නඩුවක් ගොනු කරනු ලැබීය.
තම සමාගමට සේවාවන් සපයන තෝරාගත් සමාගම් වෙත ලබාදුන් සිය බ්‍රෝඩ් බෑන්ඩ් සේවා ජාලයේ ඉදිරි සැලසුම් සහ ක්‍රියාකාරකම් රැගත් අතිශය රහස්‍ය හෙළිනොකරන බවට වූ ගිවිසුම් වල අඩංගු කරුණු ලබාගෙන ඇති බවට තම පැමිණිල්ල ඔස්සේ ඩයලොග් සමාගම අධිකරණය වෙත කරුණු දක්වා ඇත.
තොරතුරුවල රහස්‍යභාවය ආරක්ෂා කරගැනීම සඳහා ගත හැකි සෑම පියවරක්ම ගෙන ඇති බව අවධාරණය කරන ඩයලොග් සමාගම චරපුරුෂ සේවාවක් යොදා ගනිමින් අදාල තොරතුරු ලබා ගැනීමට ශ්‍රී ලංකා ටෙලිකොම් සමාගම කටයුතු කර ඇති බව අධිකරණය හමුවේ චෝදනා කර සිටී.
2003 අංක 36 දරන බුද්ධිමය දේපල පනත යටතේ රහස්‍ය තොරතුරු වංචනික ලෙස ලබාගැනීමට කටයුතු කිරීම නීති විරෝධී වන අතර ශ්‍රී ලංකා ටෙලිකොම් සමාගම එම නිතිය උල්ලංඝනය කර ඇති බව ඩයලොග් සමාගම සිය චෝදනා සමඟ සටහන් කර ඇත.
අදාල කරුණු සැලකිල්ලට ගනිමින් වාණිජ මහාධිකරණ විනිසුරු රුවන් ප්‍රනාන්දු එකී රහස්‍ය තොරතුරු ලබාගත් ආකාරය අනාවරණය කරන ලෙස ටෙලිකොම් සමාගමට නියෝග කරනු ලැබීය.
Facebook Comments
