අවුරුදු උදාවේ ඇමරිකා ගිය ගෝඨාට කැලිෆෝනියාවේ දී නඩු

විවේකයක් ගත කිරීම සඳහා ඇමරිකාවට ගොස් සිටින ශ්‍රී ලංකාවේ හිටපු ආරක්ෂක ලේකම්වරයාට එරෙහිව ඇමරිකාවේදී වධ හිංසා පැමිණවීම හා මාධ්‍යවේදියකු මරා දැමීම සම්බන්ධයෙන් නඩු පවරා තිබේ.

දස වසරකට ඉහත දී අධි ආරක්ෂිත කලාපයක මරා දමනු ලැබු සන්ඩේ ලීඩර් පුවත් පතේ ආරම්භ කතෘ ලසන්ත වික්‍රමතුංග ඝාතනයට කිරීමට සහ රාජපක්ෂ පාලන සමයේ තුන් අවුරුද්දක් රඳවාගෙන වද දෙනු ලැබූ දෙමළ ජාතිකයකු මෙසේ කැලිෆෝනියා ප්‍රන්තයේ නඩු පවරා ඇත.

ලසන්ත වික්‍රමතුංගගේ දියණිය අහිම්සා වික්‍රමතුංග විසින් සහ වධ බන්ධනයට ලක්වු රෝයි මනොජ්කුමාර් සමාදානම් ඇමරිකානු පුරවැසිභාවය හිමි ගෝඨාභය රාජපක්ෂ හට මෙසේ කැලිෆෝනියාවේදී නඩු පවරා ඇත.

ඇමරිකාවට ගොස් සිටින ගෝඨාභය රාජපක්ෂ හට නඩුවට අදාළ සිතාසි කැලිෆෝනියාවේ Traders Joe’s American Grocery Store නම් සුපිරි වෙළෙඳ සංකීර්ණයේදී බාර දී ඇත.

මහින්ද රාජපක්ෂ අගමැති ධුරයට පත් කරමින් සිදුවු දේශපාලන කුමන්ත්‍රණය අවස්ථාවේ දී ජනාධිපති මෛත්‍රීපාල සිරිසේන විසින් අපරාධ පරික්ෂණ දෙපාර්තුමේන්තුවේ සමුහ මංකොල්ල අංශයේ ස්ථානාධිපති පොලිස් පරික්ෂක නිශාන්ත සිල්වා හට ස්ථාන මාරුවක් ලබා දුන් අවස්ථාවේද අහිංසා වික්‍රමතුංග එයට සිය විරෝධය පළ කර ජනාධිපතිවරයා හට ලිපියක් යොමු කර තිබුණි.

පුවත්පත් කතෘ ලසන්ත වික්‍රමතුංග යුද හමුදා විශේෂ බුද්ධි අංශ කණ්ඩායමක් විසින් ඝාතනය කරන ලද බවට අපරාධ පරීක්ෂණ දෙපාර්තුමේන්තුව අධිකරණයට වාර්තා කර තිබේ.

තම පියාගේ ඝාතකයන් ගැන දැනගැනීමට අවශ්‍ය නම් තමන් හමුවන ලෙසට හිටපු ආරක්ෂක ලේකම් ගෝඨාභය රාජපක්ෂ අහිම්සා වික්‍රමතුංග හට මීට පෙර ප්‍රසිද්ධියේම ආරාධනා කළේය.

වෙළෙඳාම සඳහා සිංගප්පුරුවේ සිට ආනයනය කරන ලද දුරකථන 600ක් ළඟ තබා ගැනීම මගින් “අධි තාක්ෂණික සන්නිවේදන මෙවලම් ආනයනය” කිරීමේ වරදට 2007 සැප්තැම්බරයේ මුලින් අත් අඩංගුවට ගන්නා ලද රෝයි මනොජ්කුමාර් සමාදානම් ට පසුව ත්‍රස්තවාදය වැළක්වීමේ පනත යටතේ චෝදනා නගා ඇත්තේ ප්‍රභූන් ඝාතනයට සැලසුම් කිරීම ගැනයි.

රෝයි මනොජ්කුමාර් වෙනුවෙන් නඩු පවරා ඇත්තේ යැස්මින් සුකාගේ නායකත්වයෙන් යුත් ජාත්‍යන්තර සත්‍යය හා යුක්තිය ව්‍යාපෘතිය (ITJP) සහ හව්ස්ෆෙල්ඩ් ඇමරිකානු නීතිඥ ආයතනය විසිනි.

ඔහුගේ අයිතිවාසිකම් උල්ලංඝනය වී ඇතැයි තීන්දු කළ එක්සත් ජාතීන්ගේ සංවිධානයේ ඉහළ පෙළේ ආයතනයක් ඔහුට වන්දි ගෙවන ලෙස වර්තමාන රජයට දැනුම් දී තිබුණේ පසුගිය වසරේ ඔක්තෝම්බර් මාසයේදී ය.

ශ්‍රී ලංකා රජය වගකිවයුත්තන්ට දඬුවම් පමුණුවා, පීඩිතයාට ප්‍රමාණවත් වන්දියක් ගෙවිය යුතුය බවට ද එක්සත් ජාතීන්ගේ මානව හිමිකම් කමිටුව නිර්දේශ කර තිබුණි.