විදේශ වල සිට ක්‍රියාත්මක වන විද්‍යුත් මාධ්‍ය මුදල් ලබා ගෙන තමන් විවේචනය කරන බව ජනාධිපතිවරයා පැවසු දිනයේම ලංකා ඊ නිව්ස් වෙබ් අඩවියට ශ්‍රී ලංකාව තුළදී පිවිසිය නොහැකි අයුරින් අවහිර කර තිබේ.
ශ්‍රී ලංකාව තුල ලංකා ඊ නිව්ස් වෙබ් අඩවිය වාරණය කරන ලෙස සියලුම අන්තර්ඡාල සේවා සපයන ආයතන වෙත නියෝග කර ඇතැයි එම වෙබි අඩිවය වාර්තා කර ඇතත් එම නියෝගය කරන ලද්දේ කවුරුන් විසින්ද යන්න එහි සදහන් කර නොමැත.
කෙසේ වෙතත් විදුලි සංදේශ නියාමන කොමිසමේ අධ්‍යක්ෂ ජනරාල් පී.ආර්.එස්.පී.ජයතිලක ලංකා ඊ නිව්ස් වෙබ් අඩවිය සම්බන්ධයෙන් එවැනි වාරණයක් ක්‍රියාත්මක කර නැති බව මෙන්ම වෙබ් අඩවියට එරෙහිව පැමිණිල්ලක් හෝ ලැබී නැතැයි ද ඔහු ප්‍රකාශ කල බව මාධ්‍ය වාර්තා කර තිබුණි.
මාධ්‍ය මඩ ගහනවා
මේ අතර මහබැංකුවේ බැඳුම්කර නිකුතුවකදී සිදුවූ අක්‍රමිකතා පිලිබඳ චෝදනා විභාග කිරීමට කොමිසමක් පත් කිරීම සම්බන්ධයෙන්ද ආණ්ඩුවේ කොටස්කාරයන් මෙන්ම රාජ්‍ය නොවන මාධ්‍යද “උදේ ඉඳන් රෑ වෙනකල්” තමන් විවේචනය කරන බව ජනාධිපතිවරයා පවසයි.
ඒ වෙනුවෙන් විදේශ වල සිට ක්‍රියාත්මක වන විද්‍යුත් මාධ්‍ය වෙනුවෙන් මුදල් යොදවන බවට ජනාධිපතිවරයා බලයට පත් කිරීමට උරදුන් සාධාරණ සමාජයක් සඳහා වූ ජාතික ව්‍යාපාරයේ කැඳවුම්කාර මාඳුළුවාවේ සෝභිත හිමියන්ගේ දෙවැනි ගුණ සමරුව නිමිත්තෙන් පැවැති උත්සවයේදී ජනාධිපති මෛත්‍රීපාල සිරිසේන කියා සිටියේය.
රාජපක්ෂ පාලන සමයේද ලංකා ඊ නිව්ස් ඇතුළු වෙබි අඩවි ගණනාවකට ශ්‍රී ලංකාව තුල පිවිසීම අවහිර කර තිබු අතර 2015 ජනවාරි 08 සිට එම අවහිරතා ඉවත් කිරීමට වත්මන් ජනපති මෛත්‍රීපාල සිරිසේන කටයුතු කළේය.
Facebook Comments
