මුදල් හා ජනමාධ්‍ය අමාත්‍ය මංගල සමරවීරගේ සංකල්පයක් අනුව ක්‍රියාත්මක වන “ගම්පෙරළිය” වැඩසටහන සඳහා කැබිනට් අනුමැතිය හිමිව තිබේ.
රුපියල් මිලියන 65,811ක වියදමින් “ගම්පෙරළිය” වැඩසටහන ක්‍රියාත්මක කිරිම සඳහා කැබිනට් මණ්ඩලය සිය අනුමැතිය ලබා දුන් බවයි රජය පවසන්නේ.
මෙම වැඩසටහන 2018 වර්ෂයේ තුන්වන කාර්තුවේ සිට ආරම්භ වන වසර දෙකක කාලයක් තුළ ක්‍රියාත්මක කිරීමට යෝජනා වී ඇති අතර 2018 වර්ෂය සඳහා සෑම ප්‍රාදේශීය ලේකම් කොට්ඨාසයකටම රුපියල් මිලියන 200 බැගින් සංවර්ධන කටයුතුවලට ලබා දීමට අපේක්ෂා කරන බවයි මුදල් අමාත්‍යංශය නිවේදනය කරන්නේ.
මෑත වසර වල මුහුණ දීමට සිදු වූ කාලගුණ විපත් හේතුවෙන් දිවයින පුරා යටිතල පහසුකම්වලට හානි සිදුවීම හා විවිධ හේතුවල බලපෑම නිසා සාමාන්‍ය ආර්ථික වර්ධන වේගය අඩුවීම හේතුවෙන් බොහෝ පිරිසකට සිය ජීවනෝපාය සංවර්ධන කටයුතුවලදී යම් යම් අපහසුතාවයන්ට මුහුණ දීමට සිදු වී තිබෙන බැවින් ජනතාවගේ ජීවනෝපාය සංවර්ධනය කිරීම සඳහා කඩිනම් පියවර ගැනීමේ අවශ්‍යතාවය සහ අත්‍යාවශ්‍ය යටිතල පහසුකම් වැඩිදියුණු කිරීම මඟින් ආර්ථික වර්ධනය වේගවත් කිරීම සඳහා අවශ්‍ය පියවර කඩිනමින් ගැනීමට රජය මෙම වැඩසටහනට ක්‍රියාවට නංවා තිබේ.
ශ්‍රී ලංකාවේ සියලුම දිස්ත්‍රික්ක ආවරණය වන පරිදි වාරිමාර්ග, ග්‍රාමීය මාර්ග, පාසල් සනීපාරක්ෂක පහසුකම් හා ක්‍රීඩාපිටි, සතිපොළ, හරිත උයන, විදුලිබලය, ආගමික හා පුරාවිද්‍යාත්මක ස්ථාන අලුත්වැඩියාව, නිවාස සංවර්ධනය, ඉඩම් ඔප්පු නිකුත් කිරීම සහ ව්‍යවසායකත්වය යන ක්ෂේත්‍ර සංවර්ධනය කිරීම සඳහා ‘ගම්පෙරළිය’ නමින් වේගවත් ග්‍රාමීය සංවර්ධන වැඩසටහනක් ක්‍රියාත්මක කිරීමට සැලසුම් කර ඇති බවයි රජය වැඩි දුරටත් පවසන්නේ.
Facebook Comments
