සීගිරිය කැටපත් පවුරේ කොටසක දීලීරයක් පැතිරයාමේ අවදානමක් මතුව ඇති බැවින් කැටපත් පවුරේ අදාළ කොටසේ සංරක්ෂණ කටයුතු මේ වන විට ආරම්භ කර ඇති බව මධ්‍යම සංස්කෘතික අරමුදල පවසයි.
පුරාවිද්‍යා අධ්‍යක්ෂ ජනරාල් මහාචාර්ය පී. බී. මණ්ඩාවල සහ මධ්‍යම සංස්කෘතික අරමුදලේ අධ්‍යක්ෂ ජනරාල් මහාචාර්ය ප්‍රිශාන්ත ගුණවර්ධන යන අයවලුන්ගේ අධීක්ෂණය මත රසායනික සංරක්ෂණය පිළිබඳ විශේෂඥයින් සීගිරි කැටපත් පවුරේ අදාළ කොටසේ සංරක්ෂණ කටයුතු 06 අඟහරුවාද ආරම්භ කර ඇත.
දිලීර වර්ධනය මෙන්ම උෂ්ණත්වය නිරීක්ෂණය සහ ගණනය කළ හැකි අධි තාක්ෂණික කැමරාද යොදා ගනිමින් මෙම සංරක්ෂණ කටයුතු සිදු කරන බවයි මධ්‍යම සංස්කෘතික අරමුදල පවසන්නේ.
කැටපත් පවුරේ කොටසක දීලීරයක් පැතිරයාමේ අවදානමක් මතුව ඇති බව විෂය භාර අමාත්‍යයා දැනුවත් කිරීමෙන් අනතුරුව මෙම තත්වයට වහා පිළියම් යෙදීම සඳහා සෑම පියවරක් ම ගන්නා ලෙසත්, අවශ්‍යතාව මත විදෙස් විශේෂඥ සහය ලබා ගන්නා ලෙසට ද අමාත්‍ය අකිල විරාජ් කාරියවසම් උපදෙස් දී තිබේ.
මෙය සාමාන්‍යයෙන් දේශගුණික විපර්යාස සමඟ සිදුවන ස්වභාවික සංසිද්ධියක් බැවින් රසායනික ප්‍රතිකාර හරහා නැවත යථාතත්වයට පත් කළ හැකි බවටයි මධ්‍යම සංස්කෘතික අරමුදලේ අධ්‍යක්ෂ ජනරාල් මහාචාර්ය ප්‍රිශාන්ත විශ්වාසය පල කරන්නේ.
Facebook Comments
