අධිකරණ හා බුද්ධශාසන අමාත්‍ය විජේදාස රාජපක්ෂ හට සිය ධුරයෙන් ඉල්ලා අස්වීම සදහා මේ මස 17 වැනිදා දක්වා කාලය ලබා දී ඇතැයි එක්සත් ජාතික පක්ෂ ආරංචි මාර්ග පැවසීය.
එම කාලය ඇතුලත ඇමැතිවරයා ඉල්ලා අස් නොවන්නේ නම් විජේදාස රාජපක්ෂට එරෙහි විශ්වාසභංග යෝජනාව පාර්ලිමේන්තුවට ඉදිරිපත් කිරීමටද එක්සත් ජාතික පක්ෂ මන්ත්‍රීවරු පිරිසක් තීරණය කර තිබේ.
එක්සත් ජාතික පක්ෂයේ කෘත්‍යාධිකාරී මණ්ඩලය සහ එක්සත් ජාතික පෙරමුණේ පාර්ලිමේන්තු කණ්ඩායමේ ඒකාබද්ධ හමුවක් ලබන 17 වැනිදා සිරිකොත පක්ෂ මූලස්ථානයේදී පැවැත්වීමට නියමිත අතර එහිදි විජේදාස රාජපක්ෂ සම්බන්ධ චෝදනා සාකච්ඡාවට ගැනීමට නියමිතව බවද වාර්තා වේ.
රාජපක්ෂ පාලන සමයේ සිදු වූ බව කියන වංචා, දූෂණ සහ අපරාධ සම්බන්ධ ලිපිගොනු 82කට වැඩි ප්‍රමාණයක් නීතිපති දෙපාර්තමේන්තුව තුළ ගොඩගැසී තිබීමත්, ඒ සම්බන්ධ ක්‍රියාමාර්ග ප්‍රමාද වීමත් හේතුවෙන් මෙලෙස ආණ්ඩු පක්ෂ මන්ත්‍රීවරුන් විසින් ඇමැති විජේදාස රාජපක්ෂ එරෙහිව විශ්වාසභංග යෝජනාවක් ගෙන ඒමට තීරණය කර තිබේ.
අදාළ විශ්වාසභංග යෝජනාව මේ වනවිට සකසා අවසන් බව මෙන්ම මන්ත්‍රීවරුන් බොහෝමයක් මේ වනවිට ඒ සඳහා අත්සන් තබා ඇති බවයි නම සඳහන් කිරිමට නොකැමති වු එක්සත් ජාතික පක්ෂ මන්ත්‍රීවරයෙක් සිලෝන් ජර්නල්ස් වෙත කියා සිටියේ.
Facebook Comments
