ඉන්දීය අග්‍රාමාත්‍ය රජීව් ගාන්ධි ඝාතන සිද්ධිය සම්බන්ධයෙන් සිර දඬුවම් විඳ ඉන්දීය ශ්‍රේෂ්ඨාධිකරණය විසින් නිදහස් කරන ලද හත්දෙනාගෙන් අයකු වන එම්.ටී ශාන්තන් සිය මව සමග එක්වීමට ශ්‍රී ලංකාව බලා පිටත්කරන යවන ලෙස ඉන්දීය රජයෙන් ඉල්ලීම් කර තිබේ.
තමන් නිදහස් කිරීමට ෆෙඩරල් රජය දැනුවත් කිරීම සඳහා මැදිහත්වන ලෙස ඉල්ලීමක් කරමින් තමිල්නාඩු මහ ඇමැතිට ඔහු ලිපියක් ලියා ඇත.
“පසුගිය වසර 32ක කාලයක් පුරාවට මම මාගේ මව දැක නොමැත. ඇයගේ ජීවිතයේ අවසාන, වයෝවෘද්ධ සමයේදී ඇය සමග සිටිමින් ඇයට සහය වීමට මම කැමැත්තෙමි. මාගේ අපහසුකම් සැලකිල්ලට ගනිමින්, කරුණාකර මධ්‍යම රජයට මේ පිළිබඳව පැහැදිලි කරන්න.”
සිය පුත්‍රයාගේ නිදහස සහ සිය ජීවිතය අවසන්වීමට පෙර සිය පුත්‍රයා දැකීමට දශක තුනක් පුරා බලාසිටි බව පැහැදිලි කරමින්,මහේෂ්වරී තිල්ලෛඅම්බලම් මවද මෑතකදී දැඩි වේදනාවෙන් යුතුව ඉන්දීය අග්‍රාමාත්‍ය නරේන්ද්‍ර මෝදිට ඉල්ලීමක් ඉදිරිපත් කළාය.
ඇය දුර්වල සෞඛ්‍ය තත්වයකින් පසුවෙමින් මෝදිට සිය ඉල්ලීම හැගීම්බරව ඉදිරිපත් කරන වීඩියෝ පටයක් මෑතකදී දැඩි ලෙස කතාබහට පත්විය.
සිය කුඩා ඉඩමේ අඹයක් ඉදෙන වාරයක් පාසා එය ආහාරයට ගැනීමට සිය පුත්‍රයා එහි සිටියානම් යැයි ඇය ප්‍රාර්ථනා කරන බවත්, සිය පුත්‍රයා ඉක්මනින් නැවතත් පැමිණෙන බව අසන්නට ලැබෙන වාරයක් පාසා ඔහුට විශේෂ ආහාර වේලක් පිළියෙළ කිරීමට යමක් මිලදී ගන්නා බවත්, එම වීඩියෝව හරහා ඇය පැවසුවාය.
“මගේ දරුවා එනවා කියලා හිතාගෙන මම මගේ අනිත් ළමයින්ට කියලා එක එක ජාතියේ කෑම අරගෙන තිබ්බා. සෑම දෙයක්ම කල් ඉකුත් වෙලා. මම හිතාගෙන ඉන්නේ අඹ ගහක අඹ ගෙඩියක් හැදුනත් මගේ දරුවා කන්න එයි කියලා”
ඉන්දීය ශ්‍රේෂ්ඨාධිකරණය නිදහස ලබාදුන් පුද්ගලයන් හත්දෙනාගේ නිදහස ලබාගැනීමට තමිල්නාඩු මහ ඇමති එම්.කේ. ස්ටාලින්ගේ පියා වන අභාවප්‍රාප්ත ‘කලයිඥාර්’ කරුණානිධි සහ හිටපු මහ ඇමැතිවරියක වන අභාවප්‍රාප්ත ජයලලිතා විසින් දැරූ ප්‍රයත්න පිළිබඳව සුතෙන්තිරරාජා හෙවත් ශාන්තන් මහ ඇමැති ස්ටාලින්ට යොමුකළ ලිපියේ මෙනෙහි කළේය.
කෙසේනමුත්, පෙර කී නඩු තීන්දුව නැවත සලකාබලන ලෙස මධ්‍යම රජය විසින් පෙත්සමක් ඉදිරිපත් කර ඇත.
ඔවුන්ගේ නිදහස් කිරීම සම්බන්ධයෙන් දැක්වූ සහයෝගය සහ අධිකරණයේදී ඉදිරිපත් කළ තර්ක සම්බන්ධයෙන් තමිල්නාඩු රජයට ස්තුති කරමින් සාන්තන් පැවසුවේ ශ්‍රේෂ්ඨාධිකරණයෙන් නිදහස්කිරීමෙන් පසු දිනයේදී, එනම් 2022 නොවැම්බර් 12 වනදා සිට, ශ්‍රී ලාංකිකයකු ලෙස ඔහුව විශේෂ කඳවුරක රඳවා තැබූ බවයි.
“අධිකරණයෙන් නිදහස ලැබුවාට පසු මාස අටක් යනතුරුත් කඳවුරෙන් නිදහස ලබාදීම සම්බන්ධයෙන් කිසිඳු ඉදිරි පියවරක් ගෙන නොමැත. මාගේ නිදහස භුක්ති විඳීමට මා හට නොහැකි අතර, විශේෂ කඳවුර තුළ මෙවැනි ජීවිතයක් බලාපොරොත්තු වූයේද නොමැත,” යනුවෙන් තමිල්නාඩු මහ ඇමතිට යොමු කළ ලිපියේ සඳහන් විය.
වැඩිදුර උපදෙස් සඳහා චෙන්නායි හි පිහිටි ශ්‍රී ලංකා නියෝජ්‍ය මහ කොමසාරිස් කාර්යාලය වෙත තමන්ව රැගෙන යන ලෙසද සාන්තන් සිය ඉල්ලීම හරහා ඉල්ලා සිටියේය.
රජීව් ගාන්ධි ඝාතන සිද්ධිය පිළිබඳව පැවති දීර්ඝ නඩු විභාගය 2022 නොවැම්බර් 11 වනදා අවසන් විය. ඒ, එම වසරේ මැයි 18 වනදා අනෙක් වැදිකරුවකු වන පෙරරිවලන් නිදහස් කර තිබීම පූර්වාදර්ශයක් ලෙස සඳහන් කරමින් නඩුවේ අවසන් විත්තිකරුත් නිදහස් කිරීමට බී.ආර්. ගවයි සහ බී. වී. නාරගත්න ගෙන් යුත් විනිසුරු මඩුල්ල තීරණය කිරීමත් සමගයි. විත්තිකරුවන් හත්දෙනා අතර, ඉන්දියානු ජාතික නලිනී, ඇයගේ සැමියා වන ලාංකික දෙමළ මුරුගන් සහ රටවල් දෙකටම අයත් තවත් පුද්ගලයන් පස්දෙනකු විය.
රජීව් ගාන්ධි ඝාතනය සම්බන්ධයෙන් වැරදිකරුවන් වී හෝ ජීවිතාන්තය දක්වා සිරදඬුවම් විඳින සියලු දෙනාම අදාළ කාලය සම්පූර්ණ කිරීමට පෙර නිදහස් කරන ලෙස ශ්‍රේෂ්ඨාධිකරණය ඒ හරහා නියෝග කර තිබිණ.
ඉන්දීය ව්‍යවස්ථාවේ 142 වැනි පරිච්ඡේදය යටතේ එන අතිවිශේෂ බලතල (“සිය අධිකරණමය බලයන් ක්‍රියාත්මක කිරීමේදී, අධිකරණය ඉදිරියේ පවතින ඕනෑම කරුණක් සම්බන්ධයෙන් සම්පූර්ණ වූ යුක්තිය ලබාදීම සඳහා අත්‍යාවශය වන තීන්දු ගැනීමට සහ නියෝග ලබාදීමට හැකිය.”) භාවිත කරමින් ඉන්දියානු ශ්‍රේෂ්ඨාධිකරණය විසින් දශක තුනක් පුරාවට සිර ගතකොට සිටි පෙරරිවාලන්ට නිදහස ලබාදෙන ලදී.
කෙසේ නමුත්, මධ්‍යම රජය විසින් මෙම තීන්දුවට එරෙහිව පෙත්සමක් ඉදිරිපත් කොට ඇත.
මධ්‍යම ආණ්ඩුව සිය පෙත්සම හරහා පවසා තිබුණේ, අදාළ නඩුවට අත්‍යවශ්‍ය පාර්ශවයක් වූවත් අදාළ නියෝගය අනුමත වූයේ තමන්ට එය විභාගයට ගැනීමට ප්‍රමාණවත් අවස්ථාවක් ලබා නොදෙමින් බවත් එය පටිපාටීමය දෝෂයක් බවත් ය.
එය අවධාරණය කළේ මධ්‍යම රජයේ භූමිකාව අතිශයින්ම වැදගත් බවයි.
එම පෙත්සම සලකා බැලීමට කාල රාමුවක් නොමැති බවත්, ඒ සම්බන්ධයෙන් තීරණයක් ගැනීම විනිසුරු මඩුල්ලේ සහ අධිකරණයේ අභිමතය බවත් නීතීඥයෝ පවසති.
1991 මැයි 21 වැනිදා තමිල්නාඩුවේ ශ්‍රී පෙරුම්බුදුර්හිදී දෙමළ විමුක්ති කොටි සංවිධානයේ මරාගෙන මැරෙන බෝම්බ ප්‍රහාරයකින් මැතිවරණ ප්‍රචාරක රැළියක දී ඉන්දීය අග්‍රාමාත්‍ය රජීව් ගාන්ධි ඝාතනය කරන ලදී.
Facebook Comments
