හිරගෙදර PHI ලා හැටියට අලුතින් විශ්‍රාමික හමුදා නිලධාරීන්

0

හිරගෙවල ආසාදිත සංඛ්‍යාව හයසියය ඉක්මවා යද්දී කොරෝනා වසංගතය හමුවේ බන්ධනාගාරවල සෞඛ්‍යාරක්ෂාව තහවුරු කරන ලෙස ඉල්ලා රැඳවියන් විසින් කරන ලද උද්ඝෝෂණ මාලාවකට ප්‍රතිචාර වශයෙන් විශ්‍රාම ගිය හමුදා නිලධාරීන් මහජන සෞඛ්‍ය පරීක්ෂකවරුන් ලෙස පත් කිරීමට සැලසුම් කෙරෙමින් පවතී.

එමගින්, දස දහස් සංඛ්‍යාත සිරකරුවන්ද හයදහසකට ආසන්න කාර්ය මණ්ඩලයක්ද ඉන්නා රැඳවුම් මධ්‍යස්ථාන තිහකට වැඩි සංඛ්‍යාවකට අනුයුක්ත කර සිටින මහජන සෞඛ්‍ය පරීක්ෂකවරුන්ගේ (PHI) සංඛ්‍යාව නොවැම්බර් 23 සඳුදා සිට අටදෙනා දක්වා ඉහළ දැමීම බලධාරීන්ගේ අපේක්ෂාවයි.

බන්ධනාගාර දෙපාර්තමේන්තුව පවසන පරිදි මේ වන විට සිරගෙවල් ආශ්‍රිතව කොරෝනා වෛරසය ආසාදිත රෝගීන් සංඛ්‍යාවද හයසියය ඉක්මවා ගොස් තිබේ.

බන්ධනාගාර සෞඛ්‍ය සේවා අධ්‍යක්‍ෂ ප්‍රියන්ත අතපත්තු පවසන පරිදි ඊට රැඳවියන් 558 දෙනකුද නිලධාරීන් 43 දෙනකුද ඇතුලත්ය

මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මාධ්‍යවේදීන් හා කියා ඇත්තේ මේ දක්වා දිවයිනේ සියලුම බන්ධනාගාර රැදවියන්ගේ කටයුතු වෙනුවෙන් යොදවා සිටියේ මහජන සෞඛ්‍ය පරීක්ෂකවරුන් දෙදෙනකු පමණක් බවයි.

ඔවුන් දෙදෙනාද අනුයුක්ත කර ඇත්තේ කොළඹ මැගසින් බන්ධනාගාරයටය.

බන්ධනාගාර දෙපාර්තමේන්තුවේ මධ්‍යස්ථාන 36 ක රැඳවියන් තිස්දහසකට ආසන්න සංඛ්‍යාවක් සිරකොට තබාගෙන සිටින බව දැනට එළිදක්වා ඇති අධිකරණ අමාත්‍යංශ සංඛ්‍යාලේඛන වලින් අනාවරණය වෙයි.

එම මධ්‍යස්ථාන අතර සංවෘත බන්ධනාගාර හතරක්, වැඩ කඳවුරු දහයක්, විවෘත සිර කඳවුරු දෙකක්, සහ තරුණ වරදකරුවන් සඳහා වන මධ්‍යස්ථාන දෙකක් ද ඇතුලත්ය. මීට අමතරව රිමාන්ඩ් බන්ධනාගාර 18කි. රට පුරා ඇති පොලිස් රැඳවුම් 23ක් ද බන්ධනාගාර දෙපාර්තමේන්තුව යටතේ පවතී.

මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ වැඩි දුරටත් පෙන්වා දෙන්නේ අද දිනයේ මහජන සෞඛ්‍ය පරීක්ෂකවරුන් ලෙස පත්වීම් ලබන්නේ හමුදා සේවයෙන් විශ්‍රාම ගිය හය දෙනකු බවයි.

ඔවුන් සියලු දෙනා වෘත්තියට අදාල අධ්‍යාපන සුදුසුකම් සපුරා ඇති බවත් ඔහු මාධ්‍යවේදීන් හා වැඩි දුරටත් කියා තිබේ.

මහජන සෞඛ්‍ය පරීක්ෂකවරුන්‌ ලෙස සෞඛ්‍ය දෙපාර්තමේන්තුව යටතේ පත්වීම් ලබන ඔවුන් බන්ධනාගාරවල සේවයට අනුයුක්ත කරන බව ඔහු වැඩි දුරටත් පවසා තිබේ.

ඒ අනුව නව මහජන සෞඛ්‍ය පරීක්ෂකවරුන්‌ හය දෙනා මීගමුව, බෝගම්බර, හම්බන්තොට හා ත්‍රිකුණාමලයේ පිහිටි බන්ධනාගාරවල සේවයේ යෙදවීමට නියමිත බව ඔහු වැඩි දුරටත් සදහන් කරයි.

රැඳවියෙක් මරුට

රාගම රෝහලේ ප්‍රතිකාර ලබමින් සිටිය දී මියගොස් ඇති 82 වියැති බන්ධනාගාර රැඳවියකුට කොවිඩ් වෛරසය ආසාදිත වී මරුමුවට පත්වී තිබේ.

මරණයට පත් පුද්ගලයා මහර බන්ධනාගාරයේ රැඳවියෙකි.

ඇති වු හදිසි අසනීප තත්ත්වයක් හේතුවෙන් ඔහු රාගම රෝහලට ඇතුළත් කර තිබෙන අතර, එහිදී ඔහු මියගොස් ඇති බව බන්ධනාගාර දෙපාර්තමේන්තුව පවසයි.

පසුව සිදුකළ පීසීආර් පරීක්ෂණයක දී ඔහු කොවිඩ් ආසාදිතයෙක් බව තහවුරු වී තිබේ.

ශ්‍රී ලංකාව තුළ කොරෝනා වසංගත තත්වය වාර්තා වු ආරම්භක සමයේම එය බන්ධනාගාරතුලට පැතිර යාමේ අවදානම සම්බන්ධයෙන් ජනාධිපතිවරයාට ලිපියක් යොමු කරමින් සිරකරු අයිතිවාසිකම් සුරැකීමේ කමිටුව බන්ධනාගාර තුළ පවතින අධික තදබදයට විසඳුමක් ලෙස ආණ්ඩුවට යෝජනා කර තිබුනේ සුළු වැරදිවලට සිරගතවූවන් සහ දඩ ගෙවා ගැනීමට නොහැකිව රඳවාගෙන සිටින්නන් කොන්දේසි මත හෝ නිදහස් කරන ලෙසයි.

එමෙන්ම වයස්ගත සහ දැඩි ලෙස රෝගී තත්වයන්ගෙන් පෙලෙන රැඳවියන් නිදහස් කිරීම වෙනුවෙන් ඇති නීතිමය ප්‍රතිපාදනත් එම කමිටුව විසින් ආණ්ඩුවේ බලධාරීන්ට පෙන්වා දී තිබුනි.

සිරකරු අයිතිවාසිකම් සුරැකීමේ කමිටුව පසුගිය කාලය පුරා රජයට අවධාරණය කර තිබුනේ සමාලෝචන ක්‍රියාවලිය නිසි අයුරින් ක්‍රියාත්මක කිරීම තුළ බන්ධනාගාර වල පවතින අධික තදබදය අවම කර ගත හැකි බවයි.

ඇප ලබාදිය හැකි රැඳවියන් කිහිපදෙනකු පසුගිය කාලයේදී නිදහස් කළද බන්ධනාගාර තුළ පවතින අධික තදබදය අඩුවීමට එම ප්‍රමාණය ප්‍රමාණවත් නොවු බව සිරකරු අයිතිවාසිකම් සුරකීමේ කමිටුවේ අදහසයි.

සිරකරුවන් 580,000 ක්

දෙවැනි වසංගත රැල්ලට ගොදුරු වීමට බියේ ශ්‍රී ලංකාවේ බන්ධනාගාර කිහිපයකම සිරකරුවන් නිදහස ඉල්ලා වහල මත නැග විරෝධතා පවත්වද්දී කෝවිඩ්-19 පැතිරීම වැලක්වීමට අවම වශයෙන් රටවල් 80 ක රැඳවියන් ලක්ෂ පහමාරකට වැඩි පිරිසක් නිදහස් කිරීමට බලධාරීන් අවසර ලබා දී ඇති බව අලුත්ම සමීක්ෂණ වාර්තාවකින් අනාවරණය කර තිබේ.

ජනමාධ්‍ය වාර්තා, රාජ්‍ය සහ රාජ්‍ය නොවන වෙනත් මූලාශ්‍ර ඇසුරින් එලි දක්වා ඇති ජාත්‍යන්තර ජනමාධ්‍ය විමර්ශනයකින් පෙන්වා දී ඇති පරිදි සිරකරුවන් 580,000 ක් මුදා හැර ඇත්තේ ජනාධිපති සමාව, අමාත්‍ය නියෝග, නීති සම්පාදනය, හදිසි රෙගුලාසි සහ අධිකරණ නිලධාරීන්ගේ විධාන ආදී විවිධ නිර්දේශ යටතේය.

2020 මාර්තු 15 සිට මැයි 22 දක්වා කාලය ඇතුළත පල වූ වාර්තා ඇසුරෙන් කරන ලද මෙම සමීක්ෂණයෙන් හෙළිවන පරිදි වැඩිම පිරිසක් නිදහස් කර යවා ඇත්තේ ඉරානය හා තුර්කියයි. ඒ දෙරටම සිරගතව සිටි ලක්ෂයක් බැගින් මුදා හැර ඇත.

මේ කාලය තුලදී ශ්‍රී ලංකාවේ රැඳවියන් 3000 ක් නිදහස් කර ඇතැයි ජනාධිපති කාර්යාංශය උපුටා දක්වන වාර්තාව පවසයි. ඒ කිසිවකුත් මුදා හැර ඇත්තේ වසංගත උවදුරෙන් ගලවා ගැනීම පිණිස නොවේ.

Facebook Comments

wedding people