ගෝඨාගේ ඇමරිකන් පුරවැසි කම තවමත් ප්‍රශ්නයක්

0
Ivory Agency Sri Lanka
wedding people

මතබේදයට තුඩු දී තිබෙන ශ්‍රී ලංකාවේ ජනාධිපතිවරයාගේ දාහත් අවුරුද්දක් තිස්සේ දැරූ එක්සත් ජනපද පුරවැසි භාවය තවමත් අත් හැර ඇති බවක් ඇමරිකාව විසින් ප්‍රසිද්ධියට පත් කර තිබෙන නවතම නිල ලියවිලි වලින් තහවුරු කර නැත.

එක්සත් ජනපද දේශීය ආදායම් දෙපාර්තමේන්තුව විසින් තුන් මාසයකට වතාවක් ප්‍රසිද්ධියට පත් කරනු ලබන එම නාම ලේඛනය හැඳින්වෙන්නේ “6039G ඡේදය අනුව පුරවැසි භාවය අත්හැරීමට තීරණය කළ පුද්ගලයන් පිළිබඳ ත්‍රෛමාසික ප්‍රකාශනය” යනුවෙනි.

මේ වසරේ ජනවාරි 27 දා දිනය සහිතව පෙබරවාරි 11 වනදා ප්‍රසිද්ධියට පත් කර තිබෙන පිටු පහකින් යුත් අලුත්ම ලැයිස්තුවේ නන්දසේන ගෝඨාභය රාජපක්ෂගේ නම සඳහන් නොවී.

එහි ඇත්තේ පසුගිය අවුරුද්දේ දෙසැම්බර් 31 දා වනවිට එක්සත් ජනපද පුරවැසි කම අත හරින ලද බවට ලේකම්වරයාට දැනුම් දී ඇති අයගේ නම් ය.

පසුගිය වසරේ ඇමරිකානු පුරවැසි භාවය අත් හරින ලද නාම ලේඛන කිසිවකත් ගෝඨාභය රාජපක්ෂගේ නම සඳහන්ව නොතිබුනි.

ද්විත්ව පුරවැසිභාවය

පසුගිය ජනාධිපතිවරණයේදී ශ්‍රී ලංකා පොදු ජන පෙරමුණ නියෝජන කරමින් ජනපති සටනට පැමිණි වත්මන් ජනාධිපති ගෝඨාභය රාජපක්ෂගේ ශ්‍රී ලාංකික පුරවැසි භාවයේ වලංගුතාව අභියෝගයට ලක්කරමින් මහාචාර්ය චන්ද්‍රගුප්ත තේනුවර සහ ප්‍රවීන සාහිත්‍යවේදී ගාමිණී වියන්ගොඩ විසින් අභියාචනාධිකරණය හමුවේ පෙත්සමක් ගොනු කර තිබුනි.

එහිදී ඔහුගේ ද්විත්ව පුරවැසිභාවය සම්බන්ධ මුල් අයදුම්පත් හා ලියකිවිලි ශ්‍රී ලංකාවේ ආගමන හා විගමන දෙපාර්තමේන්තුවේ නොමැති බව අධිකරණයේදී හෙළි විය.

කෙසේ වෙතත් අභියාචනාධිකරණයේ සභාපති විනිසුරු යසන්ත කෝදාගොඩ, මහින්ද සමයවර්ධන සහ අර්ජුන ඔබේසේකර යන අයගෙන් සමන්විත අභියාචනාධිකරණ විනිසුරු මඬුල්ලක් විසින් ඒකමතිකව ප්‍රතික්ෂේප කරා ලද එම පෙත්සම පිළිබඳ තීන්දුව අභියෝගයට ලක් කරමින් අභියාචනයක් ගොනු කර ඇතත් එය මෙතෙක් විභාගයට ගෙන නැත.

ගෝඨාභය රාජපක්ෂ 2003 ජනවාරියේ සිට ඇමරිකා එක්සත් ජනපද පුරවැසියෙක් වන අතර එසේ තිබියදී තම සහෝදර මහින්ද රාජපක්ෂගේ රජය යටතේ 2005 නොවැම්බර් 24 දා ආරක්ෂක ලේකම් ධුරයේ දිවුරුම් දුන් ඔහු 2005 නොවැම්බර් 30 දා තමන්ගේම අමාත්‍යාංශයෙන් ශ්‍රී ලංකාවේද පුරවැසි භාවය ප්‍රදානය කොටගෙන තිබේ. එතැන් පටන් ඔහු ද්විත්ව පුරවැසියෙකි.

තමන් ඇමරිකානු පුරවැසි භාවය අත් හැර පූර්ණ ශ්‍රී ලාංකික පුරවැසියකු වූ බව තහවුරු වන එක්සත් ජනපද ලියවිලි ජනාධිපති ගෝඨාභය රාජපක්ෂ නිල වශයෙන් ප්‍රකාශ කළ වගක් මේ තාක් දැන ගන්නට නොමැත.

ශ්‍රී ලංකාවේ ආණ්ඩුක්‍රම ව්‍යවස්ථාවේ 92 වගන්තිය අනුව රටේ ජනාධිපති වීමට නම් පූර්ණ වශයෙන් ශ්‍රී ලංකික පුරවැසියකු විය යුතුය.

Facebook Comments