උඩරට මුස්ලිම් විරෝධී ප්‍රහාරයට දෑවුරුද්දයි – මානව හිමිකම් කොමිසම් වාර්තාව තවම නෑ

කන්ද උඩරට මුස්ලිම් ජනයා ඉලක්ක කරගනිමින් දියත් කළ ප්‍රහාරයට දෙවසරක් ගතව ඇතත් ඒ සම්බන්ධයෙන් පවත්වන ලද සාක්ෂි විභාගයේ විමර්ශන වාර්තාව ප්‍රසිද්ධියට පත් කිරීමට ශ්‍රී ලංකාවේ මානව හිමිකම් කොමිසම මේ තාක් අපොහොසත් වී තිබේ.

2018 වසරේ මාර්තු හතර රාත්‍රියේ දිගනින් ආරම්භ වී මහනුවර වෙලාගත් ප්‍රචණ්ඩ ක්‍රියා රැල්ල සම්බන්ධයෙන් එම වසරේම මැයි මස 9 දින සිට 12 දින දක්වා ශ්‍රී ලංකා මානව හිමිකම් කොමිසම විසින් සාක්ෂි විමසීමේ කාර්යය සිදු කොට තිබුනි.

කොමිසමේ සභාපතිනි ආචාර්ය දීපිකා උඩුගමගේ සහ කොමසාරිස්වරුවන් කිහිප දෙනෙකුගේ ප්‍රධානත්වයෙන් මහනුවරදී සාක්ෂි විමසීම සිදු වු අතර කොමිසමේ සභාපතිනිය එවකට ප්‍රකාශ කර තිබුනේ විමර්ශන වාර්තාව එම වසරේම ජුලි මාසයේ ප්‍රසිද්ධියට පත් කරන බවයි.

පරීක්ෂණ කටයුතු සඳහා කොමසාරිස් ගසාලි හුසේන්, පරීක්ෂණ හා විමර්ශන අංශ අධ්‍යක්ෂ නිහාල් චන්ද්‍රසිරි, නීතිඥ ඒ ඩබ්ලිව් එම් අහමඩ්, මහනුවර සම්බන්ධීකාරිකා කුමුදුණී විතාරණ හා නීති නිලධාරිනී ප්‍රදීපා වීරවික්‍රම ද සභාපතිනියට සහාය වී තිබුනි.

මුස්ලිම් විරෝධි ප්‍රචණ්ඩ ක්‍රියා වැලැක්වීමට නිසි කලට පියවර නොගත් රජයේ ආරක්ෂක භට පිරිස් කැරළිකාර සිංහල අන්තවාදීන්ට ආධාර කළ බවට එවකට රජයේ මැති ඇමතිවරුන් ගේද දෝෂ දර්ශනයට ලක් වෙද්දී සන්නද්ධ STF භටයන් මුස්ලිම්වරුන්ට පහරදෙනු දැක්වෙන වීඩියෝ දර්ශන ද ප්‍රසිද්ධියට පත් වී තිබුනි.

2018-03-05 දින පස්වරු 4:59 ලෙස වේලාව සටහන් වී ඇති වීඩියෝව දිගන, හිජ්රාපුර ජුම්මා දේවස්ථානයේ පටිගත වූවක් බව JDS සංවිධානය පවසයි.

මුස්ලිම් විරෝධී ප්‍රහාරයට රජයේ ආරක්ෂක අංශ ද හවුල් වීම සම්බන්ධ පරීක්ෂණ නොපැවැත්වීම එක්සත් ජාතීන්ගේ සංවිධානයේ දැඩි අවධානයටද ලක්වී තිබේ.

ගැටුම සම්බන්ධයෙන් මහනුවර පැවති තුන් දින පරීක්ෂණය අවසානයේ ශ්‍රී ලංකා මානව හිමිකම් කොමිසමේ සභාපතිනිය ප්‍රකාශ කර තිබුනේ කැරළි සමයේ රාජ්‍ය නිලධාරීන්ගේ භූමිකාව විමර්ශනයට ලක් වූ බවයි.

එම විමර්ශන වාර්තාව මේ තාක් ප්‍රසිද්ධියට පත් කිරීමට ශ්‍රී ලංකා මානව හිමිකම් කොමිසන් සභාව අපෙහොසත් වුයේ මන්දැයි විමසීමට ග න්නා ලද උත්සාහය පල දැරුවේ නැත.

මහනුවර දිස්ත්‍රිකය නියෝජනය කළ හිටපු මුස්ලිම්, ආගමික කටයුතු හා තැපැල් අමාත්‍ය මොහොමඩ් හසීම් අබ්දුල් හලීම්ගෙන් කළ විමසීමකදී ඔහු සදහන් කළේ ගැටුමෙන් විනාශ වු හා හානියට පත් වු දේපල සදහා රජයෙන් වන්දි පිරිනැමීමක් සිදු කළ බවයි.

නමුත් පුජාපිටිය වෙලේ කඩෙි ප්‍රදේශයේ විනාශයට පත් ලී මෝල් කිහිපයක යන්ත්‍ර උපකරණ සදහා වන්දි ගෙවීමක් මේ තාක් සිදු කර නොමැති බවක් තමාට දැනගන්නට ඇති බව හිටපු අමාත්‍යවරයා වැඩි දුරටත් සදහන් කළේය.

ජිනීවා වාර්තාව

ආගම හෝ ඇදහීමේ නිදහස පිළිබඳ එක්සත් ජාතීන්ගේ විශේෂ නියෝජිත ආචාර්ය අහ්මඩ් ෂහීඩ් ජිනීවාහි මානව හිමිකම් කොමිසමේ 43 සැසිවාරයට ඉදිරිපත් කළ ශ්‍රී ලංකාව පිළිබඳ විශේෂ වාර්තාවේ දිගන ප්‍රහාරය ගැන සදහන් වන්නේ තුන් දිනක ප්‍රහාර වලින් එක් පුද්ගලයකු මරා දමා, හාරසියයකට වැඩි දේපල, සිද්ධස්ථාන සහ වාහන සංඛ්‍යාවක් විනාශ කර දමා ඇති බවයි.

බලධාරීන් විසින් කිහිප දෙනකු අත් අඩංගුවට ගන්නා ලද්දේ වුවද, දේශපාලන චරිත පසුව නිදහස් කර යවන ලද බව එහි වැඩි දුරටත් සදහන් වෙි.

2014 වසරේ සිදුවු අලුත්ගම ප්‍රහාරයත් , 2017 වසරේ ගිංතොට හා 2018 වසරේ සිදුවු අම්පාර සහ දිගන මුස්ලිම් විරෝධී ප්‍රහාර සම්බන්ධයෙන් එහි වැඩි දුරටත් සදහන්ව ඇත්තේ “සෑම සිද්ධියකදීම ප්‍රමාණවත් සාක්ෂි තිබුනත්, ආණ්ඩුව කිහිප දෙනකු අත් අඩංගුවට ගෙන ඇතැම් පීඩිතයන්ට වන්දි ගෙවා තිබුනත්, අවුරුදු කිහිපයක් ගතවුවත්, කිසිදු අපරාධකාරයෙක් වගඋත්තරකරුවකු කර නැත,” යනුවෙනි.

අලුත්ගම සහ දිගන සිද්ධීන් සම්බන්ධයෙන් ගත්කල, වෛරක්කාරී උද්ඝෝෂණ වැලක්වීමට පියවර නොගත් බවට පොලිසියට චෝදනා නැගී තිබු බවද එම වාර්තාව මගින් මතක් කර දී තිබේ.

“ඊටත් වඩා, පෙර දිනවල සිදුවූ මුස්ලිම් විරෝධී කැරැලි වලට පොලිස් නිලධාරීන් ක්‍රියාකාරීව සහාය දුන් බවට වාර්තා තිබුනත්, එම වාර්තා සම්බන්ධයෙන් පරීක්ෂණ පවත්වා නොමැත” යි එහි වැඩි දුරටත් සදහන්ය.

ශ්‍රී ලංකා මානව හිමිකම් කොමිසමේ වාර්තාව තවමත් පල නොවීම ගැන එක්සත් ජාතීන්ගේ විශේෂ නියෝජිතයා කිසිත් සඳහන් කර නැත.