යුද්ධය අවසන් වුවද ජාතික ප්‍රශ්නය නිම වී නැති බව පෙන්වා දෙන අගමැතිවරයා මහජන වරම අනුව ආරම්භ කරන ලද ව්‍යවස්ථා සම්පාදන ක්‍රියාදාමය අත් නොහරින බවට සහතික වී තිබේ.
ජාතික ප්‍රශ්නයට විසඳුම් ලබාදී සංහිඳියාව ඇති කරන ව්‍යවස්ථාවක් සම්මත කොටගෙන සංවර්ධනය උදා කිරීම සඳහා සියලු ජාතීන්ට සහ ආගම් වලට අයත් ජනතාව ලබා දුන් වරම අනුව කටයුතු කරන බවට අගමැති රනිල් වික්‍රමසිංහ පොරොන්දු වුනේ දෙමළ ජනතාවට බලය බෙදා දෙන ව්‍යවස්ථාවකට සහාය නොදෙන බවට මහනාහිමිවරුන් ජනාධිපතිවරයාට අනතුරු ඇඟවීමෙන් දිනකට පසුවයි.
යුද්ධය අවසන් වු පමණින් ජාතික ප්‍රශ්නය නැති බව කී අගමැතිවරයා රට තුළ ජාතිවාදය තවත් වැඩිවී ඇති බව කියා සිටි.
ජාතික ප්‍රශ්නයට දේශපාලන විසඳුමක් ලබා දී සංහිඳියාව ඇති කිරීම සඳහා චීනය සහ ඉන්දියාව ඇතුළු විදේශීය රටවල් ශ්‍රී ලංකාවට උපකාර කරනු ඇති බවට අගමැති වික්‍රමසිංහ විශ්වාසය පල කළේය.
මේ වනවිට සියලුම ආගම් නියෝජනය කරන නායකත්වය ඇතුළු සැම තරාතිරමකම පුරවැසියන් ව්‍යවස්ථා සම්පාදනය සඳහා මත විමසන කමිටුවට අදහස් දක්වා ඇති බව ඔහු විසින් සිහිපත් කර දෙන ලදී.
“ජනාධිපති තුමයි, මමයි, එක්සත් ජාතික පක්ෂයයි, ශ්‍රී ලංකා නිදහස් පක්ෂයයි තීරණය කරලා තියෙනවා බුද්ධාගමේ ප්‍රමුඛ ස්ථානය එලෙසම පවත්වාගෙන යන්න,” යි ඔහු බහුතර මුස්ලිම් හා දෙමල ජනකායක් සහභාගි වූ උත්සව සභාවේ කියා සිටියේය. ” සෑම ආගමකටම තිබෙන අයිතිවාසිකම් ආරක්ෂා කිරීමට ද අප මෙහිදී කටයුතු කරනවා.”
“මේක ඔබේ ව්‍යවස්ථාව. මගේ ව්‍යවස්ථාවක් නොවේ,” යි අගමැති වික්‍රමසිංහ වැඩිදුරටත් කියා සිටියේය.
Facebook Comments
