මැලේරියාවට යළි ඉඩක් නැහැ – සුව ඇමති

මැලේරියා රෝගයට යළි හිස එසවීමට ඉඩ ලබා නොදෙන බව සෞඛ්‍ය පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න පවසයි.

ස්විස්ටර්ලන්තයේ ජිනීවා නුවර පැවැත්වෙන ලෝක සෞඛ්‍ය සංවිධානයේ 70 වන සැසිවාරයට සමගාමීව පැවැති මැලේරියා රෝගය තුරන් කිරිම පිළිබඳ උත්සවයක දී සෞඛ්‍ය අමාත්‍යවරයා ඊයේ (23) මේ බව ප්‍රකාශ කර තිබේ.

ආසියා සහ නැගෙනහිර ආසියා රටවලින් මැලේරියා රෝගය තුරන් කිරීමෙි සහතිකය ලබාගැනීමට ශ්‍රී ලංකාව සහ මාලදිවයින සමත් වී ඇති අතර ඒ සඳහා සහයෝගය ලබාදූන් ලෝක සෞඛ්‍ය සංවිධානයට සහ අනෙකුත් සංවිධානවලට ස්තූතිය පුද කිරිම වෙනුවෙන් මෙම උත්සවය සංවිධානය කර ඇත්තේ සෞඛ්‍ය පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න ප්‍රමුඛ ශ්‍රී ලාංකික දූත පිරිස විසිනි.

“ශ්‍රී ලංකාවෙි මැලේරියා රෝගය තුරන් කිරීමට දායක වූ සැමට ස්තූතිය පුද කරනවා. මැලේරියා රෝගය තුරන් කිරිම දූෂ්කර කාර්යයක්. වසර 50 ක කාලයක් ඒ සඳහා කටයුතු කිරිමට සිදූ වුනා. 1935 දී මැලේරියා රෝගීන් මිලියන 1.5 ක් වාර්තා වුවද, 1963 වර්ෂය වන විට රෝගීන් වාර්තා වූයේ 17 ක් පමණයි. මැලේරියා රෝගය තුරන් කිරිම සඳහා උපක්‍රමශීලී සැළසුම් දියත් කළ අතර, 2012 වර්ෂය වන විට මැලේරියා රෝගය ලංකාවෙන් සම්පුර්ණයෙන් තුරන් කිරිමට හැකි වුනා. යළි එම රෝගයට හිස එසවීමට ඉඩ ලබා නොදීමට ලක් රජය කටයුතු කරනවා” යැයි අමාත්‍ය රාජිත සේනාරත්න පැවසීය.

මෙහිදී මැලේරියා රෝගය තුරන් කිරිමට සහයෝගය ලබාදූන් ලෝක සෞඛ්‍ය සංවිධානයේ අධ්‍යක්ෂ ජනරාල් වෛද්‍ය මාග්‍රට් චෑන් සහ දකුණු හා නැගෙනහිර ආසියා රටවල අධ්‍යක්ෂිකා ප්‍රනම් චෙත්‍රපාල් සිං වෙත සෞඛ්‍ය අමාත්‍යවරයා සමරු සිහිවටන පරිත්‍යාග කරන ලදි.