උතුරේ සිදුවන සංවිධානාත්මක ප්‍රචණ්ඩ ක්‍රියා රටේ ජාතික ආරක්ෂාවට තර්ජනයක් බවට කරන බිය ගැන්වීම් දැඩිව ප්‍රතික්ෂේප කරන හමුදාපතිවරයා එම සිදුවීම් වලට එල්ටිටිඊ සංවිධානය සම්බන්ධ නොමැති බවද අවධාරණය කරයි.
මෙම ප්‍රචණ්ඩ ක්‍රියා වලින් සිදුවීම් කිහිපයකට පමණක් හිටපු කොටි සාමාජිකයන් සම්බන්ධ වී සිටියත් එය ආවා කල්ලියට හා කොටි සංවිධානය අතර සම්බන්ධයක් නොවන බව හමුදාපති මහේෂ් සේනානායක අවධාරණය කළේය.
දකුණේ මෙන්ම උතුරේද සිදු වන්නේ සුලු පාතාල ක්‍රියාකාරකම් වුවද ඇතැම් පිරිස් උතුරේ සිදුවීම් පමණක් විශාල කර පෙන්වීමට උත්සාහ දරන බවට යාපනයේ හිටපු ආඥාපති ද වූ හමුදාපතිවරයා චෝදනා කර සිටියේ 15 අඟහරුවාදා කොළඹ දී මාධ්‍යවේදීන් අමතමිනි.
කෙසේ වෙතත් ප්‍රචණ්ඩකාරි කල්ලි කිහිපයක් පොලිස් නිලධාරීන් දෙදෙනකුට පහරදීමෙන් පසුව යාපනයේ සංචාරයක නිරත වු පොලිස්පති පුජිත ජයසුන්දර එල්. ටී. ටී. ඊ සංවිධානය ආරම්භවීමට මුල්වූ සිදුවීම් නැවත පටන්ගෙන ඇතැයි කියා තිබුණි.
හිටපු කොටි සාමාජිකයන් නැවත සංවිධානය වන බවක් උතුරේ අපරාධ කල්ලි ක්‍රියාත්මක වීමෙන් ඇඟවෙන්නේ නැති බව මෙන්ම මෙම සිදුවිම් තුළින් රටේ ජාතික ආරක්ෂාවට කිසිඳු තර්ජනයක් නොමැති බවයි හමුදාපතිවරයා පෙන්වා දෙන්නේ.
පොලිස්පතිට එල්ටීටීඊ
යාපනයේ වෙඩි තැබීම සහ පහරදීමේ සිද්ධීන් සම්බන්ධයෙන් අත් අඩංගුවට ගෙන සිටින්නේ “මනාව පුහුණුව ලද” හිටපු එල්ටීටීඊ සාමාජිකයන් බවයි පොලිස්පතිවරයා උතුරු සංචාරයෙන් පසුව මාධ්‍ය වෙත කියා සිටියේ.
මෙම සිදුවිම් වලින් පසුව උතුරේ වීදිවලට කැඳවන ලද සන්නද්ධ පොලිස් භට සේනා ප්‍රදේශවාසීන් බිය ගන්වමින් ගෙයින් ගෙට ගොස් සෝදිසි මෙහෙයුම් කර තරුණයන් අත් අඩංගුවට ගන්නා බවට චෝදනා කළ උතුරේ මහ ඇමැතිවරයා “අවි පුහුණුව ලත් කල්ලියක් ශ්‍රී ලංකා රජයේ හමුදාව සමග එක්වී” උතුරේ සන්නද්ධ ප්‍රචණ්ඩතා වල නිරත වන බවට චෝදනා කළේය.
Facebook Comments
