පාලන මිලට ඖෂධ නැත්නම් දැනුම් දෙන්න

වත්මන් රජය විසින් අත්‍යවශ්‍ය ඖෂධ 48ක් සඳහා මිල පාලන ක්‍රමයක් පසුගිය දා හඳුන්වාදුන් අතර එම මිලට වඩා වැඩිපුර අයකරන්නේ නම් එවැනි කටයුතු 0113 071 073 සහ 0113 092 269 දුරකතන අංකයන් ඔස්සේ හෝ ෆැක්ස් අංක 0112 686 113 අංක වෙත දැනුම් දෙන ලෙස කැබිනට් මාධ්‍ය ප්‍රකාශකවරයා ජනතා‍වගෙන් ඉල්ලා සිටී.

අත්‍යවශ්‍ය ඖෂධ 48ක් සඳහා මිල පාලන ක්‍රමය ගෙන එනු ලැබූවේ සෞඛ්‍ය මිනුම්, විශ්ලේෂණ සහ සේවා, උපදේශනය, තාක්ෂණ සේවා සපයන ජාත්‍යන්තරව පිළිගත් ආයතනයක් වන ඉන්ටර්කොන්ටිනෙන්ටල් අලෙවි සේවා (IMS) ආයතනයේ දත්ත උපයෝගිකරගනිමින් බවත් මෙහිදී නව්‍ය ඖෂධ මිල පාලනයට යටත් කොට නොමැති බවත් අමාත්‍ය රාජිත සේනාරත්න පැවසීය.

ඒ මහතා මේ බව සඳහන් කළේ ඊයේ (09) රජයේ ප්‍රවෘත්ති දෙපාර්තමේන්තුවේ පැවැති කැබිනට් තීරණ දැනුම්දීමේ ප්‍රවෘත්ති සාකච්ඡාවට එක්වෙමිනි.

ඉතා කල්පනාකාරීව කිසිවෙකුටත් අසාධාරණයක් නොවන අයුරින් මෙම මිල පාලන කටයුතු සිදු කිරීමට කටයුතු කරනු ලැබූ බවත් ඒ හරහා කිසිවෙකුගේ ඖෂධ සමාගමක් වසා දැමීමේ අරමුණක් නොවන බවයි ඇමතිවරයා පෙන්වා දෙන්නේ.

ඖෂධ 48ක් සඳහා මිල පාලනයක් සිදු කොට ඇතත් තවමත් යම් යම් ස්ථානයන් හි පාලන මිලට ඖෂධ නොමැති බවට මාධ්‍ය වේදීන් විසින් කරුණු ඉදිරිපත් කළ අවස්ථාවේ දී අමාත්‍යවරයා කියා සිටියේ එය හදිසියේ කළ නොහැක්කක් බවත් එබැවින් ඖෂධ වැටලීම් සිදු කරමින් පවතින බවත්ය.