යහපාලන රජය බිහි කිරිම නිසාවෙන් ගම තුල තිබු පක්ෂ භේදය අවසන් වු බවට ශ්‍රී ලංකා නිදහස් පක්ෂයේ හිටපු ලේකම්වරයෙකු ප්‍රකාශ කර තිබේ.
ශ්‍රී ලංකා නිදහස් පක්ෂය හා එක්සත් ජාතික පක්ෂය එක්ව බිහි කරන ලද යහපාලන රජයෙන් සිදුවු හොඳ දෙයක් හැටියට ගමේ සමගිය ඇති වීම පෙන්වා දිය හැකි බවයි පාර්ලිමේන්තු මන්ත්‍රී දුමින්ද දිසානායක පවසන්නේ.
“යහපාලන ආණ්ඩුවක් තිබුණ නිසා දැන් අපේ තිබුණු පරණ තරහා නැති වෙලා තියෙනවා, වෙනදා නම් ශ්‍රී ලංකාකාරයෙක් යූ.එන්.පී කාරයෙක් දිහා බලන්නේ නෑ, ශ්‍රී ලංකා කෙනෙක් යූ.එන්.පී මළ ගෙදරක යන්නේ නෑ.යූ.එන්.පී කෙනෙක් ශ්‍රී ලංකා මළ ගෙදරක යන්නේ නෑ,, සමහර වෙලාවට එකම පවුලේ ඥාතිකම් නැති කර ගෙන තියෙනවා දේශපාලනය නිසා.”
“හැබැයි මෛත්‍රීපාල සිරිසේන මැතිතුමන්ට පිං සිද්ධ වෙන්න අපිට යහපාලන ආණ්ඩුව තුළ මොන මොන අඩුපාඩුකම් තිබුණත් මම දකින එකම දේ තමයි ගම සමගි වුණා.” යැයි මන්ත්‍රීවරයා නොච්චියාගම, තිඹිරිවැව පානීය ජල යෝජනා ක්‍රමය ජනතා අයිතියට පත් කිරීමේ උත්සවයට සහභාගී වෙමින් කියා සිටියේය.
දේශපාලන නායකයන් රට තුල වෛරය, ක්‍රෝදය වැපිර වු බව පැවසු මන්ත්‍රී දුමින්ද දිසානායක රටේ ජාතිවාදය ඇති කිරීමට දේශපාලන පක්ෂ මුල් වු බවට චෝදනා කළේය.
“රටේ තියෙන ජාතිවාදය හදන්න මුල් වෙලා තියෙන්නෙත් දේශපාලන පක්ෂ. සමහර ජාතීන්ගේ අඩුපාඩුත් තියෙනවා. සිංහල අපේ, දෙමළ අයගේ, මුස්ලිම් අයගේ අඩුපාඩු තියෙනවා හැබැයි, මේ ජාතිවාදය දැන් වැඩියෙන් කථා කරන්නේ දේශපාලඥයෝ.” යැයි මන්ත්‍රීවරයා වැඩි දුරටත් පෙන්වා දුන්නේය.
Facebook Comments
