රාජපක්ෂ පාලන සමයේ ඇමැතිවරුන් කරන ලද සංවර්ධන ක්‍රියාවන් පවා මහින්ද චින්තනය ගොණු කර හිටපු ජනාධිපතිවරයා විශ්වකර්මයෙක් ලෙස ප්‍රතිරූපය ගොඩනංවා ගත් බවට සුව ඇමැතිවරයා චෝදනා කර තිබේ.
වත්මන් රජයේ ජනපති චින්තන හෝ අගමැති චින්තයන්ට සීමා නොවී සියලු මැති ඇමැතිවරුන්ගේ චින්තනයන් ක්‍රියාත්මක කිරීමට අවස්ථාව ලැබී ඇති බවයි සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න පෙන්වා දෙන්නේ.
“වර්තමානයේ ජනාධිපතිගේ චින්තන, අගමැතිගේ චින්තන නැහැ. තියෙන්නේ එක් එක් අමාත්‍යවරයාගේ චින්තන පමණයි. නමුත් පසුගිය රජය සමයේ තිබුන එකම චින්තනය මහින්ද චින්තනය විතරයි. ඇමැතිවරයෙක් වැඩක් කළත් එය මහින්ද චින්තනයට ගොනු කරනවා. එම නිසා සියලු දෙනාම හිතුවා මහින්ද රාජපක්ෂ මහතා විශ්වකර්මයෙක් කියලා.”
යහපාලන රජය සිය සංවර්ධන කටයුතු සඳහා ප්‍රචාරණයන් ලබා නොදීමට ගත් තීරණය “ගොන් තීන්දුවක්” ලෙස රාජිත සේනාරත්න ඇමැතිවරයාගේ විවේචනයට ලක් විය.
“යහපාලන රජයක් පිහිටුවීමට ගත් තීන්දුව හොදයි. ඒ අතරේ ගොන් තීන්දුවක් ද ගත්තා. ඒ තමයි ප්‍රචාරණය නතර කිරිම. ජර්මනියේ තිබෙන යහපාලනය මෙරටට ඒ අයුරින්ම ගැලපෙන්නේ නැහැ. සංශෝධන ඇති කළ යුතුයි.” යනුවෙන් සුව ඇමැතිවරයා 06 ඉරිදා කළවාන මුලික රෝහලේ ඉදිකිරීමට යෝජිත මහල් 03 කින් යුත් වාට්ටු සංකීර්ණය සදහා මුල්ගල් තැබීමේ උත්සවයේ දී කියා සිටියේය.
විපක්ෂ නායක මහින්ද රාජපක්ෂ විසින් ජනතාවට වැරදී උගන්වා ඇති බවට චෝදනා කල සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න “මහින්ද රාජපක්ෂ මහතා ලබාදෙන්නේ හොද දේවල්. රනිල් වික්‍රමසිංහ මහතා ලබාදෙන්නේ නරක දේවල් එහෙම තමයි ජනතාවට උගන්වලා තිබෙන්නේ.” යැයි වැඩි දුරටත් සඳහන් කළේය.
Facebook Comments
