රැකියා සුරක්ෂිත භාවය වෙනුවෙන් සටන් වැඳ සිටින ටෙලිකොම් මෑන් පවර් සේවකයින් අදියර 4 යටතේ ශ්‍රී ලංකා ටෙලිකොම් ආයතනය වෙත අන්තර්ග්‍රහණය කිරීමට එම ආයතනයේ අධ්‍යක්ෂක මණ්ඩලයට උපදෙස් දීමට කැබිනට් මණ්ඩලය තීරණය කර ඇත.
වර්ෂ 2017 සිට 2020 දක්වා කාලය තුළ පලපුරුදු හා සුදුසුකම්ලත් සේවකයින් මෙසේ අන්තර්ග්‍රහණය කිරීමට තීරණය කර ඇත්තේ මෙම ගැටලුව සම්බන්ධව විදුලි සන්දේශ හා ඩිජිටල් යටිතල පහසුකම් අමාත්‍ය හරින් ප්‍රනාන්දු ඉදිරිපත් කළ කරුණු සැලකිල්ලට ගෙන බව පැවසේ.
සේවකයින්ගේ ඉල්ලීමට අනුව එසේ අන්තර්ග්‍රහණය කලහොත් ටෙලිකොම් ආයතනයට රුපියල් බිලියන 1.6 ක අතිරේක පිරිවැයක් දැරීමට සිදුවුවද මෙම ගැටලුවට සානුකම්පිත පියවරක් වශයෙන් මෙම තීරණය ගත් බව කැබිනට් පත්‍රයේ සඳහන් වේ.
ශ්‍රී ලංකා ටෙලිකොම් ආයතනයේ උප සමාගමක් වන SLT හියුමන් කැපිටල් සොලියුෂන් පුද්ගලික ආයතනයේ සේවකයින් ලෙස 2650 බඳවාගෙන ඇති බවත් ඉන් 2180ක් ටෙලිකොමි හි අනියුක්ත සෙවකයින් වන අතර ඔවුන්ගෙන් සේවකයින් 1331 දෙනෙක්ගේ සේවය ස්ථිර කර ඇති බවද කැබිනට් පත්‍රිකාවේ වැඩි දුරටත් සඳහන් කර තිබේ.
සිය රැකියා සුරක්ෂිත කරන ලෙස ඉල්ලා ටෙලිකොම් ආයතනයේ සේවකයින් දින 86 වැඩි කාලයක් ටෙලිකොම් මුලස්ථානය ඉදිරිපිට සත්‍යග්‍රහයක් ආරම්භ කර ඇති අතර මේ වන විට සේවකයින් කිහිප දෙනෙක් උපවාසයක්ද ආරම්භ කර ඇත.
Facebook Comments
