දිවා ආහාරය ඔතන ලද ලන්ච් ෂීට් සහ පත්තර කඩදාසි බලහත්කාරයෙන් පාසල් සිසුන්ට කැවීම සම්බන්ධයෙන් චෝදනා ලැබ සිටින මහනුවර පාසලක විදුහල්පතිවරයකු කලාප අධ්‍යාපන කාර්යාලයට අනුයුක්ත කිරීමට අධ්‍යාපන බලධාරීන් කටයුතු කර තිබේ.
පාර්ලිමේන්තුවේ දී විශේෂ ප්‍රකාශයක් සිදුකරමින් නොවැම්බර් 23 වැනිදා අධ්‍යාපන අමාත්‍ය සුසිල් ප්‍රේමජයන්ත සදහන් කළේ පරීක්ෂණ කටයුතු වල පහසුව වෙනුවෙන් එම ක්‍රියාමාර්ගය ගෙන ඇති බවයි.
“මේ සම්බන්ධයෙන් වන පරීක්ෂණ කටයුතු වල පහසු වනු පිනිස රඹුක්පිටිය මහා විද්‍යාලයේ විදුහල්පතිතුමා වහාම ක්‍රියාත්මක වන පරිදි ගම්පොළ කලාප අධ්‍යාපන කාර්යාලයට අනුයුක්ත කිරීමට පළාත් බලධාරීන් විසින් කටයුතු කර ඇත.”
අධ්‍යාපන අමාත්‍ය සුසිල් ප්‍රේමජයන්ත සදහන් කරන්නේ පාසල් පරිශ්‍රය පොලිතීන්වලින් තොරව පවත්වාගෙන යන බැවින් 11 ශ්‍රේණියේ සිසුන් පිරිසක් දිවා ආහාරය ඔතාගෙන ආ ලන්ච් ෂීට් සහ පත්තර බලහත්කාරයෙන් කැවීමට උත්සාහ ගෙන ඇත්තේ මහනුවර,ගම්පොළ, රඹුක්පිටිය මහා විද්‍යාලයේ විදුහල්පතිවරයා බවයි.
“ඒ සිදුවීම සිදුවී තිබෙන්නේ 23.11.21 වැනි දින දිවා ආහාර වෙලාව ගන්නා අවස්ථාවේදී.”
මේ පිළිබදව ගම්පොළ කලාප අධ්‍යාපන කාර්යාලය වෙත පසුදිනම තොරතුරු වාර්තා වු අතර 22 වැනි දින පෙරවරු වන විටත් සිද්ධියට මුහුණ දුන් අවුරුදු 16 ක් වයසැති රඹුක්පිටිය මහා විද්‍යාලයේ සිසුන් දෙදෙනකු නාවලපිටිය මුලික රෝහලේ නේවාසිකව ප්‍රතිකාර ලබන බවට වාර්තා වී ඇතැයි අමාත්‍යවරයා වැඩි දුරටත් සදහන් කළේය.
“මේ සිද්ධියට මුහුණ දී ඇති අනෙක් සිසුන් පස්දෙනාගේ නම් පහත සදහන් කර ඇති අතර ඔවුන් අද දින පාසල් පැමිණ ඇත.”
නාවලපිටිය පොලීසියට මේ සම්බන්ධයෙන් නොවැම්බර් 22 වැනි දින පැමිණිලි කර ඇති බව අවධාරණය කරන අමාත්‍යවරයා පාර්ලිමේන්තුවේදී වැඩි දුරටත් සදහන් කළේ 22 වැනි දින පස්බාගේ කොට්ඨාස අධ්‍යාපන අධ්‍යක්ෂක මගින් ස්ථානීය පරීක්ෂණයක් ද සිදු කර ඇති බවයි.
ශ්‍රී ලංකාවද අනුමත කර ඇති ළමා අයිතිවාසිකම් පිළිබඳ එක්සත් ජාතීන්ගේ සම්මුතිය ප්‍රකාර පාසල තුළ විනය ආරක්ෂා කිරීමේදී ශාරීරික දඬුවම් දීමෙන් වැළකී සිටීමටත්, පාසල් විනය පරිපාලනය ළමයාගේ මානව ගරුත්වය රැකෙන ආකාරයෙන් සිදුකිරීමටත් දී ඇති නිර්දේශ පිළිබදව දිවයිනේ සියළු පාසල් දැනුවත් කිරීමේ අවශ්‍යතාව ශ්‍රී ලංකා මානව හිමිකම් කොමිෂන් සභාව විසින් පසුගිය වසරේද අධ්‍යාපන අමාත්‍යාංශය වෙත අවධාරණය කර තිබුනි.
එම මාර්ගෝපදේශ ඇතුලත් කොට අධ්‍යාපන අමාත්‍යාංශය මගින් හදුන්වා දී ඇති පාසල තුළ විනය ආරක්ෂා කිරීම සඳහා වන 12/16 චක්‍රලේඛය ගුරුවරුන්ගේ විවේකාගාරවල ප්‍රදර්ශනය කිරීමේ අවශ්‍යතාවයද එහිදි මතු විය.
පාසල් වල දරුවන් සම්බන්ධයෙන් විනය ක්‍රියාමාර්ග ගැනීම පිළිබදව අධ්‍යාපන අමාත්‍යාංශය නිකුත් කර තිබෙන චක්‍ර ලේඛයට පටහැනිව කටයුතු සිදුකිරීම තුල පාසල් පද්ධතියට එරෙහිව බරපතල සමාජ විරෝධයක් එල්ල වී තිබෙන ආකාරය ලංකා ගුරු සංගමයේ ප්‍රධාන ලේකම් ජෝසප් ස්ටාලින් විසින්ද අවස්ථා ගණනාවකදීම පෙන්වා දී තිබේ.
සිසුන්ට දඬුවම් දෙන ගුරුවරුන්ට එරෙහිව ළමුන් කෘරත්වයට භාජනය කිරීම සහ මූලික අයිතිවාසිකම් උල්ලංඝනය කිරීම යටතේ නඩු පැවරිය හැකි බවත්, විනය ක්‍රියාමාර්ග ගත හැකි බවත් අධ්‍යාපන අමාත්‍යංශ චක්‍රලේඛයේ දැක්වේ.
දිවා ආහාරය ඔතන ලද ලන්ච් ෂීට් සහ පත්තර කඩදාසි විදුහල්පතිවරයකු විසින් බලහත්කාරයෙන් පාසල් සිසුන්ට කැවීමට ගත් උත්සාහය සම්බන්ධයෙන් අධ්‍යාපන අමාත්‍ය සුසිල් ප්‍රේමජයන්ත පාර්ලිමේන්තුවේදී සිදු කළ පැහැදිලි කිරීම පහත වීඩියෝවෙන් නරඹන්න.
Facebook Comments
