ජනාධිපති ගෝඨාභය රාජපක්ෂ අද පෙරවරුවේ විපක්ෂ නායක සජිත් ප්‍රේමදාසට දුරකතන ඇමතුමක් ලබා දී අගමැතිකම බාරගෙන නව ආණ්ඩුවක් පිහිටුවන ලෙස ආරාධනා කොට ඇතැයි මාධ්‍ය වාර්තාකර තිබේ.
අගමැති ධුරය බාර නොගන්නේ නම් පාර්ලිමේන්තු මන්ත්‍රීවරුන්ගෙන් 113ක බහුතරයකගේ කැමැත්ත ලබාගෙන පාර්ලිමේන්තුව විසුරුවා හැරීමේ යෝජනාවක් සම්මත කරන ලෙසත් එවිට තමන් පාර්ලිමේන්තු විසුරුවා හැරීමට කටයුතු කරන බවත් ජනාධිපතිවරයා විසින් සජිත් ප්‍රේමදාස ට දැනුම් දී ඇත.
මෙහිදී විපක්ෂනායකවරයා සදහන් කොට ඇත්තේ තමන් තනි තීන්දු නොගන්නා බවත්, මන්ත්‍රී කණ්ඩායම කැඳවා ඒ සම්බන්ධයෙන් සාකච්ජා කොට පිළිතුරු ලබා දිය හැකි බවත්ය.
ඒ අනුව අද පැවති සජබ රැස්වීමේදී යෝජිත අන්තර්වාර ආණ්ඩුවට එකඟතාව පළකර ඇතත්, අගමැති ධුරය හා අමාත්‍ය ධුර බාර ගැනීම සම්බන්ධයෙන් එකඟත්වයකට පැමිණ නොමැත.
විපක්ෂ නායකවරයා ඒ සම්බන්ධයෙන් සිය තීරණය හෙට දිනයේ දී ප්‍රකාශ කරනු ඇතැයි වාර්තා වේ.
කෙසේ වෙතත් ශ්‍රී ලංකා නීතිඥ සංගමය විසින් ඉදිරිපත් කරන ලද යෝජනා මාලාව මත පදනම්ව, අර්බුදයට විසඳීම සඳහා වූ ජාතික වැඩසටහනක් සඳහා සිය සහයෝගය ලබාදීමට තීරණය කළ බව සමගි ජන බලවේගයේ නිවේදනයක් කරමින් කියා සිටියේය.
වර්තමාන ජනාධිපතිවරයා ධූරයෙන් ඉවත්වීම සඳහා ශ්‍රී ලංකා නීතිඥ සංගමය විසින් ද යෝජනා කර ඇති අතර විධායක ජනාධිපති ක්‍රමය අහෝසි කිරීමේ වැඩපිළිවෙල සහ පවතින ජාතික අර්බුදය විසඳීම සඳහා වන මුලික අවශ්‍යතාවයක් ලෙස සලකන බව ද එම නිවේදනයේ වැඩිදුරටත් සඳහන් වේ.
මෛත්‍රී ගෙන් සජිත්ට හා අනුරට ආරාධනයක්
සර්ව පාක්ෂික අන්තර්කාලීන ආණ්ඩුවක් පිහිටුවීමට එක්වන්නැයි මෛත්‍රීපාල සිරිසේන, ජනතා විමුක්ති පෙරමුණට හා සමගි ජන බලවේගයට ආරාධනා කර සිටි.
හිටපු ජනාධිපති මෛත්‍රීපාල සිරිසේන විසින්, “සර්ව පාක්ෂික අන්තර්කාලීන ආණ්ඩුවක් පිහිටුවීම” යන ශීර්ෂපාඨයෙන් ජනතා විමුක්ති පෙරමුණේ නායක, අනුර කුමාර දිසානායක ට හා සමගි ජන බලවේගයේ නායක සජිත් ප්‍රේමදාස වෙත එම ලිපි නිකුත් කරමින් ඒ බව දැනුම්දී තිබේ.
වර්තමානයේ රටේ උද්ගත වී ඇති ආර්ථික, සමාජීය හා දේශපාලනික අර්බුදයන් තුළ සාමාන්‍ය ජනතාවට බලවත් අපහසුතාවයන්ට පත්වී සමස්ත දේශපාලන ධාරාවන්ට ම චෝදනා එල්ල කරමින් සිටින බවත් එම තත්ත්වය වටහා ගෙන අර්බුද අවස්ථාවේ ලබාදිය හැකි හොඳම විසඳුම පාර්ලිමේන්තුව නියෝජනය කරන සියලු දේශපාලන පක්ෂවලින් සමන්විත අර්බුද විසඳීම සඳහා ප්‍රතිපත්තිමය එකඟතාවයකට එළැඹිම බව ද මෛත්‍රීපාල සිරිසේන එම ලිපි වලින් අවධාරණය කර ඇත.
Facebook Comments
