යලිත් වරක් ජනාධිපතිවරණයට ඉදිරිපත් නොවන බව පවසමින් 2015 ජනාධිපතිවරණයට තරඟ කල මෛත්‍රීපාල සිරිසේන ජනාධිපතිවරයා නැවත 2020 ජනපතිවරණයට තරඟ කිරිමේ අපේක්ෂාව පල කර තිබේ.
“සමහර අය මගෙන් අහනවා මම 2020 විශ‍්‍රාම යනවද කියලා. මේ දවස්වල සමාජ වෙඞ් අඩවිවල යනවා 2020 මම විශ‍්‍රාම යනවා කියලා. මම 2020 විශ‍්‍රාම යන්නේ නැහැ, කරන්න වැඩ හුඟක් තිබෙනවා.” යි ජනාධිපතිවරයා 07 සඳුදා මඩකලපුවේදී පැවති ශ‍්‍රී ලංකා නිදහස් පක්ෂ මැයි දින රැළිය අමතමින් කියා ඇත.
පසුගිය වසර තුනක මහඟු අත්දැකීම් සමුදාය ඒ සඳහා ආශිර්වාදයක් කර ගන්නා බව සඳහන් කර ඇති ජනාධිපතිවරයා රටට සහ ජනතාවට ආදරය කරන අවංක දේශපාලනඥයින් පිරිසක් එම වැඩපිළිවෙළ වටා ඒකරාශී කරගන්නා බව ද ප්‍රකාශ කර තිබේ.
“ජාතික සමගියට කම්කරු ජවය” තේමාව යටතේ දිවයිනේ සියලූ පළාත්වලින් පැමිණි ශ‍්‍රී ලංකා නිදහස් පාක්ෂිකයින් විශාල පිරිසකගේ සහභාගිත්වයෙන් පැවති කම්කරු රැළියට ජාති, ආගම් බේදයකින් තොරව විශාල ජනතාවක් ඒකරාශී වී සිටි බවයි ජනාධිපති මාධ්‍ය අංශය පවසන්නේ.
කිසිදු ජනතාවාදී වැඩපිළිවෙළක් නොමැතිව බලය ලබා ගැනීමට පමණක් සිහින දකිමින් 2020 දී අලූත් ආණ්ඩු සෑදීමට ඇතැමුන් අද සූදානම් වන බව පවසන ජනපති එම පිරිස අතර සොරකම් නොකළ සහ මිනිස් ඝාතන සිදු නොකළ අවංක පිරිස කී දෙනක් සිටිනවා දැයි ප‍්‍රශ්න කර සිටී.
සංහිඳියාවට එක්වන්න
ජාතින් අතර සමගිය සහ සහෝදරත්වය ගොඩනැගීම්දී වෘත්තීය සමිති ව්‍යාපාරයට සහ කම්කරු ජනතාවට ඉටුකළ හැකි මෙහෙවර සුවිශේෂී වන බව පැවසු ජනාධිපතිවරයා රටේ මතු පරපුර වෙනුවෙන් ජාතික සමගිය සහ සංහිඳියාව ගොඩනැගීමේ වැඩපිළිවෙළට එක්වන ලෙසට ඔවුන් ආරාධනා කළේය.
“අපි අවුරුද 30 කට ආසන්න කාලයක් ඉතාම දරුණු ඒවගේම ඛේදනීය යුද්ධයකට මුහුණ දුන්නා. ඒ යුද්ධයේදී සිංහල, දෙමළ, මුස්ලිම් සෑම කොටසකගේමම ජීවිත හානි සිදුවුණා. සෑම ජාතියකම නායකයින් මරණයට පත්වුණා.ඒ වගේම අපේ ආරක්ෂක හමුදා, ති‍්‍රවිධ හමුද, පොලිසිය සහ සිවිල් ආරක්ෂක අංශයේ විශාල පිරිසක් මිය ගියා. ඒ යුද්ධයේ අත්දැකීම් සමග අපි සෑම කෙනෙක්ම වගකීමෙන් කටයුතු කරමින් නැවත මේ රටේ යුද්ධයක් ඇතිවීම වළක්වන්න ඕන. එහිදී වෘත්තීය සමිති ව්‍යාපාරවලට, කම්කරු පංතිවලට විශාල වගකීම් සහ යුතුකම් රාශියක් තිබෙනවා. ජාතික සමගිය ගොඩනැගමේදී විශේෂයෙන්ම ජාතින් අතර සුහදභාවය, මිත‍්‍රශීලිභාවය ගොඩනැගීමේදී කම්කරු ව්‍යාපාරයට, වෘත්තිය සමිති ව්‍යාපාරයට කළ හැකි මෙහෙය ඉතාමත් විශාලයි”
පසුගිය අවුරුදු තුන හමාරක කාලයේ පශ්චාත් යුද සමයක කළයුතු වගකීම් හා යුතුකම් රාශියක් ඉටුකළ බව කී ජනාධිපති සිරිසේන ජාතින් අතර සමගිය ගොඩනැගීම සඳහා රටේ සෑම ජන කොටසකටම සැකයෙන් බියෙන්, අවිශ්වාසයෙන් තොරව ජීවත්වීමේ අයිතිය තහවුරු කර තිබෙන බව ද පෙන්වා දුනි.
වත්මන් රජය ජාතික සංහිඳියව ශක්තිමත් කිරීමට විශාල කැපකිරීමක් කර ඇති බවත් ජාතික සංහිඳියාව ගොඩනගන්න, සමගිය ගොඩනගන්න කරන ලද බොහෝ වැඩසටහන් ඇතැම් දේශපාලන අන්තවාදීන් අපහාසයෙන් සහ උපහාසයෙන් විග‍්‍රහ කළ බව ද ජනාධිපති මෛත්‍රීපාල සිරිසේන වැඩි දුරටත් කියා සිටියේය.
Facebook Comments
